សម្ដេចក្រឡាហោម ស ខេង បានជួបក្រុមប្រឹក្សាកីឡាក្រសួងមហាផ្ទៃចំនួន៤៨នាក់ ដែលត្រៀមចេញទៅប្រកួតកីឡានគរបាល និងកងពន្លត់អគ្គិភ័យពិភពលោក នៅក្នុងប្រទេសកាណាដា។ ការប្រកួតកីឡានគរបាលក្នុងព្រឹត្តិការណ៍The 20th World Police and Fire Games 2023 នៅប្រទេសកាណាដា នឹងមានរយៈពេល៩ថ្ងៃចាប់ពីថ្ងៃទី២៨ ខែកក្កដា រហូតដល់ថ្ងៃទី៦ ខែសីហា។ ប្រទេសដែលនឹងចូលរួមមានសរុប៦០ប្រទេស ដែលនឹងប្រកួតកីឡានគរបាលនេះ ចំនួន ៦៣វិញ្ញាសារកីឡា។ យោងតាមរបាយការណ៍កម្ពុជានឹងបញ្ជូនក្រុមកីឡាករនគរបាលចំនួន៤៨នាក់ ដើម្បីចូលរួមក្នុងការប្រកួតនោះ។ យោងតាមអនុរដ្ឋលេខាធិការក្រសួងមហាផ្ទៃលោក សរ សិទ្ធិ ការរៀបចំកីឡានគរបាល និងកងពន្លត់អគ្គិភ័យពិភពលោក គឺដើម្បីបង្ហាញពីសមាគ្គីភាព, សមត្ថភាព និងទេព្យកោសល្យរបស់កងនគរបាល នៃប្រទេសនីមួយៗ។ លោកបានថ្លែងថាប្រទេសកម្ពុជាធ្លាប់បានបញ្ជូនប្រតិភូកីឡាចូលរួមចំនួន២លើក ក្នុងចំណោមការរៀបចំចំនួន២០លើករួចមកហើយនេះ។ កីឡាករនៃក្រុមនគរបាលកម្ពុជា នឹងចូលរួមប្រកួតលើ១៣ប្រភេទកីឡារួមមានកីឡាវាយសី, កីឡាលើកទំងន់, កីឡាយូដូ, កីឡាជីជិតស៊ូ, កីឡាការ៉ាតេ, កីឡាហែលទឹក, កីឡាវាយកូនឃ្លីលើតុ, កីឡាបាល់ទះក្នុងសាល, កីឡាបាល់ទះឆ្នេរខ្សាច់, កីឡាចំបាប់, កីឡាចំបាប់កាច់ដៃ, កីឡាវាយកូនគោល, កីឡាលើកទម្ងន់សាច់ដុំ Bench Press និងកីឡាទាញសាច់ដុំ Push…

មន្ត្រីគជបបានថ្លែងថាគេបានទទួលបណ្តឹងចំនួន៣២ករណី ក្នុងរយៈពេល២០ថ្ងៃ នៃយុទ្ធនាការឃោសនាបោះឆ្នោត។ យុទ្ធនាការឃោសនាបោះឆ្នោតជ្រើសតាំងតំណាងរាស្រ្តនីតិកាលទី៧ នឹងបញ្ចប់នៅថ្ងៃចុងក្រោយទី២១ ខែកក្កដា ឆ្នាំ២០២៣នេះហើយ។ អ្នកនាំពាក្យគជប លោក សោម សូរីដា បានបញ្ជាក់ថាក្នុងចំណោមបណ្ដឹងទាំង៣២នោះ មាន១១បណ្ដឹង ត្រូវបានដោះស្រាយចប់រួចរាល់…ចំណែក២១បណ្ដឹងទៀត ត្រូវបាននិងកំពុងដោះស្រាយ។ លោកបានបន្តថាក្នុងចំនោមបណ្តឹងទាំង៣២នោះ មានបណ្តឹងមួយករណីដែលពាក់ព័ន្ធទៅនឹងការបង្ហោះសារ ដែលមានការរើសអើងពូជសាសន៍ និងបណ្ដឹងមួយទៀតពាក់ព័ន្ធនឹងជនមិនស្គាល់អត្តសញ្ញាណ ដែលបានយកស្លាកគណបក្សយោបាយមួយទៅបិទនៅលើរូបថតថ្នាក់ដឹកនាំគណបក្សប្រជាជនកម្ពុជា។ ដោយឡែកចំនួន៣០បណ្តឹងផ្សេងទៀត គឺជាការប្តឹងពាក់ព័ន្ធ នឹងការណែនាំ ឬញុះញង់អ្នកបោះឆ្នោតឲ្យបំផ្លាញសន្លឹកឆ្នោតចោល។ យោងតាមច្បាប់ស្តីពីវិសោធនកម្មច្បាប់ស្តីពីការបោះឆ្នោតជ្រើសតាំងតំណាងរាស្ត្រ ក្នុងមាត្រា១៤២ បានការផាកពិន័យប្រាក់រវាងពី៥លានរៀល ទៅ២០លានរៀល ដោយពុំទាន់គិតពីបទព្រហ្មទណ្ឌផ្សេងទៀតឡើយ ពាក់ព័ន្ធនឹងជនណាដែលប្រើមធ្យោបាយទុច្ចរិតដូចជា «ណែនាំឬញុះញង់ឱ្យអ្នកបោះឆ្នោត, បំផ្លាញឬធ្វើឱ្យខូចសន្លឹកឆ្នោត, ធ្វើឱ្យបាត់ទំនុកចិត្តលើការសម្ងាត់ នៃការបោះឆ្នោត, និងធ្វើឱ្យមានការភាន់ច្រឡំនាំឱ្យបាត់ទំនុកចិត្តលើការបោះឆ្នោត»។

មនុស្សជាង១៤ម៉ឺននាក់ដែលជាប្រធាន, អនុប្រធាន និងសមាជិកគណៈកម្មការការិយាល័យបោះឆ្នោតនៅទូទាំងប្រទេស បានរៀបចំធ្វើពិធីស្បថសច្ចាប្រណិធានប្តេជ្ញាការរក្សា «ឯករាជ្យ, អព្យាក្រឹត, សច្ចៈ, យុត្តិធម៌ និងតម្លាភាព»។ នៅទូទាំងប្រទេសកម្ពុជាការិយាល័យបោះឆ្នោត មានសរុបចំនួន២ម៉ឺន ៣ពាន់ ៧៩៩នាក់ ដែលក្នុងការិយាល័យនីមួយៗមានប្រធាន, អនុប្រធាន និងសមាជិកចំនួន៦នាក់។ បើគិតសរុបនៃចំនួនមនុស្សទាំងអស់, ប្រធាន, អនុប្រធាន និងសមាជិកដែលបានដាក់ពង្រាយ ដើម្បីធ្វើការនៅថ្ងៃបោះឆ្នោតនោះ មានចំនួនសរុប១៤ ម៉ឺន២ពាន់៧៩៤នាក់។ អប្សរាណិតធ្វើសេចក្តីរាយការណ៍

សង្គ្រាមនៃពាក្យសម្តីចោទប្រកាន់ កាន់តែកើនឡើង ខណៈការបោះឆ្នោតសកលនឹងមកដល់នាចុងសប្តាហ៍នេះ។ ពីក្រៅប្រទេស, មេខ្លោងធ្វើនយោបាយ ដែលចង់នាំប្រទេសធ្លាក់ចូលក្នុងសង្គ្រាម បានប្រើពាក្យសម្តីវាយប្រហារ និងចោទប្រកាន់ជាច្រើនដាក់មកលើប្រមុខដឹកនាំរាជរដ្ឋាភិបាលកម្ពុជា។ ប៉ុន្តែការចោទប្រកាន់នូវពាក្យមិនពិតទាំងនោះ បានទទួលការការពារពីប្រជាពលរដ្ឋ និងព្រះសង្ឃផងដែរ។ បណ្ឌិត ហ៊ុន ម៉ាណែត បានថ្លែងក្នុងសប្តាហ៍នេះថា អ្វីដែលសម្តេចតេជោ ហ៊ុន សែន បានធ្វើ គឺដើម្បីតែផលប្រយោជន៍ជាតិ និងប្រជាជនរបស់ខ្លួន តែប៉ុណ្ណោះ។ អប្សរាណិតធ្វើសេចក្តីរាយការណ៍

ព្រះមហាក្សត្រខ្មែរសម្តេចព្រះបរមនាថ នរោត្តម សីហមុនី និងប្រធានាធិបតីចិន បានធ្វើសារលិខិតឆ្លើយឆ្លងគ្នាអបអរទិវាខួបលើកទី៦៥ឆ្នាំ នៃទំនាក់ទំនងការទូតរវាងប្រទេសទាំង២។ ព្រះមហាក្សត្រខ្មែរ និងលោកប្រធានាធិបតីចិន ស៊ី ជីនពីន ក្នុងសារលិខិតឆ្លើយឆ្លងគ្នា បានបញ្ជាក់ការប្តេជ្ញាបង្កើនកិច្ចសហប្រតិបត្តិការកាន់តែរឹងមាំ និងបានសម្តែងក្តីពេញចិត្តលើកិច្ចសហប្រតិបត្តិការត្បូងពេជ្រ រវាងប្រទេសចិន និងកម្ពុជា។ អប្សរាណិតធ្វើសេចក្តីរាយការណ៍

មជ្ឈមណ្ឌលទិន្នន័យជាតិ (National Data Center) តម្លៃជិត៣០លានដុល្លារ ត្រូវបានកម្ពុជា បានសាងសង់ឡើងជាលើកដំបូងដើម្បីផ្ទុកទិន្នន័យជាតិ។ រដ្ឋមន្ដ្រីក្រសួងប្រៃសណីយ៍ និងទូរគមនាគមន៍ លោក ជា វ៉ាន់ដេត នៅថ្ងៃទី១៩ ខែកក្កដា ឆ្នាំ២០២៣ ក្នុងពិធីអញ្ជើញចូលរួមការបញ្ចុះបឋមសិលាបើកការដ្ឋានសាងសង់អគារមជ្ឈមណ្ឌលទិន្នន័យជាតិ បានបញ្ជាក់នូវមូលហេតុដែលកម្ពុជាត្រូវកសាងមជ្ឈមណ្ឌលទិន្នន័យជាតិនេះ។ មជ្ឈមណ្ឌលទិន្នន័យជាតិនេះ នឹងគ្រោងបញ្ចប់ការសាងសង់នៅក្នុងឆ្នាំ២០២៥។

ខេត្តព្រះវិហារបានបើកវគ្គហ្វឹកហ្វឺនពង្រឹងសមត្ថភាពប្រយុទ្ធយោធានៅទីបញ្ជាការដ្ឋានកងវរសេនាតូចលេខ១។ វគ្គហ្វឹកហ្វឺនបានធ្វើនៅថ្ងៃទី១៩កក្កដានេះ ជាមួយការប្តេជ្ញារបស់យោធិន ប្រឆាំងដាច់ខាតការប៉ុនប៉ងណាមួយដែលចង់ផ្តួលរំលំរាជរដ្ឋាភិបាលកម្ពុជា។ អប្សរាណិតធ្វើសេចក្តីរាយការណ៍

ក្រុមជនបរទេសដែលចូលរួមក្នុងការសង្កេតការណ៍បោះឆ្នោត បានធ្វើដំណើរមកដល់ប្រទេសកម្ពុជាជាបណ្តើរ និងក្រុមខ្លះទទួលបានការអនុញ្ញាតជួបសាកសួរជាមួយស្ថាប័នជាប់ទាក់ទងនានាជុំវិញ ការចង់ដឹងសភាពការណ៍ទាំងឡាយពាក់ព័ន្ធនឹងដំណើរការបោះឆ្នោតនៅកម្ពុជា។ សមាជិកគជបលោក ឌឹម សុវណ្ណារុំ ដែលជាប្រធានក្រុមប្រតិកម្មព័ត៌មានគជប បានប្រាប់អប្សរាណិតថាក្រុមសង្កេតការណ៍បរទេសបានចាប់ផ្តើមធ្វើដំណើរមកដល់កម្ពុជាតាំងពីថ្ងៃទី១៧ កក្កដា និងជាបន្តបន្ទាប់រហូតដល់ថ្ងៃទី២១កក្កដា។ លោកបានថ្លែងថារហូតដល់ថ្ងៃទី២១កក្កដា គឺនឹងមានការមកដល់នៃប្រធានគជបរបស់ប្រទេសថៃ, ប្រទេសមីយ៉ាន់ម៉ា និងអនុប្រធានគជប នៃប្រទេសឥណ្ឌា។ ដោយឡែកកាលពីថ្ងៃទី១៨ កក្កដា ឆ្នាំ២០២៣, ក្រុមសង្កេតការណ៍ នៃប្រទេសដែលនិយាយភាសាបារាំង នៃក្រុមបេសកកម្មសង្កេតការណ៍បោះឆ្នោត នៃប្រទេសហ្វ្រង់កូហ្វូនី ត្រូវបានអនុញ្ញាតជួបសម្តែងការគួរសមជាមួយ ប្រធានក្រុមប្រឹក្សាធម្មនុញ្ញ គឺកិត្តិនិតិកោសល្យបណ្ឌិត អ៊ឹម ឈុនលឹម។ ក្រុមប្រឹក្សាធម្មនុញ្ញគឺជាស្ថាប័នច្បាប់កំពូលបំផុតរបស់ព្រះរាជាណាចក្រកម្ពុជា។ មន្ត្រីនាំពាក្យក្រុមប្រឹក្សាធម្មនុញ្ញ បានថ្លែងថាក្នុងជំនួបសម្តែងការគួរសមនោះ, ប្រធានក្រុមប្រឹក្សាធម្មនុញ្ញ បានរៀបរាប់ជុំវិញសភាពពាក់ព័ន្ធនឹងការបោះឆ្នោត ទាក់ទងនឹងមូលហេតុដែលគណបក្សចំនួន២អវត្តមានមិនបានចូលរួមក្នុងការបោះឆ្នោត ដោយសារតែកំហុសរបស់គណបក្សនយោបាយ ដែលមិនមានឯកសារបញ្ជាក់ដូចតាមនីតិវិធីដែលជាបញ្ហាច្បាប់ដោយសុទ្ធសាធ។ ប្រធានក្រុមប្រឹក្សាធម្មនុញ្ញបានរៀបរាប់ជុំវិញស្ថានការណ៍បោះឆ្នោតសកលទាំង៦ដង កើតឡើងក្នុងប្រទេសកម្ពុជា និងការកែសម្រួលច្បាប់ឱ្យកាន់តែប្រសើរឡើង ពាក់ព័ន្ធនឹងការបោះឆ្នោត និងភាពរលូន នៃយុទ្ធនាការឃោសនាដែលបាននិងកំពុងប្រព្រឹត្ត ចាប់តាំងពីដើមខែកក្កដាមកនេះ។ មន្ត្រីនាំពាក្យក្រុមប្រឹក្សាធម្មនុញ្ញបានថ្លែងបន្តថាប្រធានក្រុមប្រឹក្សាធម្មនុញ្ញ នៃប្រទេសកម្ពុជា បានលើកទឹកចិត្តដល់ក្រុមអ្នកសង្កេតការណ៍ ហ្វ្រង់កូ ហ្វូនី សូមជួយបន្តការតាមដានដំណើរការបោះ ឆ្នោតបន្ថែមទៀតក្រោមក្រសែភ្នែករបស់អ្នក សង្កេតការណ៍អន្តរជាតិ។

ជម្ងឺគ្រុនឈាមក្នុងរដូវវស្សាធ្លាក់ភ្លៀង ត្រូវគេរកឃើញបានកើតនៅក្នុងខេត្តកំពង់ឆ្នាំង។ ក្នុងរយៈពេល៦ខែដើមឆ្នាំនេះ ការស្លាប់ដោយជម្ងឺគ្រុនឈាមមាន២ករណីជាមួយនឹងការកើតលើកុមារចំនួន១៤៣នាក់។ អប្សរាណិតរាយការណ៍