អង្គការមជ្ឈមណ្ឌលអាមេរិកាំងសម្រាប់សាមគ្គីភាពការងារអន្តរជាតិហៅកាត់ថា (ACILS) បានស្នើកម្ពុជាសុំបន្តការធ្វើអនុស្សារណៈយោគយល់គ្នាជាមួយនឹងក្រសួងការងារ ក្នុងជំនួបពិភាក្សាមួយជាមួយរដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ លោក អ៊ិត សំហេង នៅថ្ងៃទី៤ កក្កដា ឆ្នាំ២០២៣។ ការស្នើសុំបន្តនេះ បានធ្វើឡើងខណៈកិច្ចសហការរវាង ACILS របស់អង្គការអាមេរិកាំងនេះ នឹងត្រូវផុតកំណត់នៅថ្ងៃទី២៨កក្កដាខាងមុខនេះហើយ។ អប្សរាណិតរាយការណ៍

រាជរដ្ឋាភិបាលបានបណ្តេញជនបរទេសចំនួន២២នាក់ ដែលជាសមាជិកក្រុមប្រឹក្សាភិបាលត្រួតពិនិត្យ នៃក្រុមហ៊ុន Meta Platform Inc. ក្នុងសេចក្តីថ្លែងការណ៍មួយដែលបានប្រកាសនៅថ្ងៃនេះ។ ឈ្មោះជនបរទេសទាំង២២ ត្រូវបានដាក់បង្ហាញទាំងអស់នៅក្នុងសេចក្តីថ្លែងការណ៍ របស់ក្រសួងការបរទេសថ្ងៃទី៤កក្កដានេះ។ សេចក្តីថ្លែងការណ៍បានទុកពេលវេលារយៈពេល ៤៨ ម៉ោងសម្រាប់ជនបរទេសទាំង២២នាក់នោះ ត្រូវចាកចេញពីទឹកដីកម្ពុជា គិតចាប់តាំងពីម៉ោង៤ រសៀលថ្ងៃទី៤ កក្កដា ឆ្នាំ២០២៣។ ការបណ្តេញមនុស្សទាំង២២នាក់នេះ បានធ្វើឡើងបន្ទាប់ពីក្រុមហ៊ុន Meta Platform Inc បានប្រកាសផ្អាកជាបណ្តោះអាសន្នចំពោះគណនី Facebook ផ្លូវការរបស់សម្តេចតេជោ ហ៊ុន សែន។ ក្រសួងការបរទេសកម្ពុជាចាត់ទុកថាសេចក្តីសម្រេចផ្អាក គណនីហ្វេសប៊ុករបស់សម្តេចតេជោ ហ៊ុន សែន ដោយក្រុមហ៊ុន Meta Platform Inc. គឺមាន «លក្ខណៈនយោបាយ»។ សេចក្តីថ្លែងការណ៍បន្តថា ការសម្រេចនេះទៀត «មានចេតនារារាំងសេរីភាពសារព័ត៌មាន របស់ប្រជាពលរដ្ឋកម្ពុជា និងសិទ្ធិរបស់ប្រជាពលរដ្ឋក្នុងការទទួលបាន ព័ត៌មានពិតពីថ្នាក់ដឹកនាំដែលពលរដ្ឋគាំទ្រ និងពេញចិត្ត»។ សម្តេចតេជោបានថ្លែងតាមបណ្តាញ Channel Telegram ជាមួយការបង្ហាញរូបថតជនបរទេសទាំង២២នាក់នោះបញ្ជាក់ថា «អ្នកទាំងនោះមិនត្រូវបានឱ្យចូលស្រុកខ្មែរអស់មួយជីវិត»។ ប្រមុខរាជរដ្ឋាភិបាលបញ្ជាក់ទៀតថា «នេះជាលទ្ធផលដែលពួកអ្នកបង្កឡើង តាមរយៈនយោបាយជ្រៀតជ្រែកចូលកិច្ចការផ្ទៃក្នុងកម្ពុជា»។

ប្រទេសមួយចំនួនក្នុងអាស៊ាននៅតែមានករណីឆ្លង និងស្លាប់ដោយសារកូវីដ១៩ ក្នុងនោះប្រទេសកម្ពុជា ក្នុងរយៈពេល ៧២ម៉ោងចុងក្រោយនេះ ក៏មានករណីឆ្លងថ្មីចំនួន ១២ករណីផងដែរ។ យោងតាមក្រសួងសុខាភិបាល នេះជាករណីឆ្លងកើនឡើងចំនួន ៩ករណី បើប្រៀបធៀបនឹងសប្តាហ៍មុន ដែលបានរកឃើញកាលថ្ងៃសៅរ៍ចំនួន ៣ករណី, ថ្ងៃអាទិត្យមាន ២ករណី និងនៅថ្ងៃច័ន្ទនេះមាន ៧ករណីផងដែរ។ តួលេខឆ្លងថ្មីកូវីដ១៩ ក្នុងប្រទេសអាស៊ាននៃរយៈពេល ៧២ម៉ោងចុងក្រោយនេះ មានចំនួន ២ពាន់ ២៩២ករណី ដែលជាតួលេខឆ្លងថយចុះមកវិញចំនួន ១ពាន់ ៦៨៧ករណី បើប្រៀបធៀបការឆ្លងបីថ្ងៃដូចគ្នាកាលពីសប្តាហ៍មុន។ ការឆ្លងក្នុងរយៈពេល ៧២ម៉ោងកន្លងមកនេះ បានកើតលើប្រទេសចំនួន ៧ នៅអាស៊ាន រួមមានប្រទេសឥណ្ឌូនេស៊ី, ហ្វីលីពីន, វៀតណាម, ម៉ាឡេស៊ី, មីយ៉ាន់ម៉ា, កម្ពុជា និងប្រទេសឡាវ។ ប្រទេសហ្វីលីពីន គឺជាប្រទេសដែលមាន តួលេខឆ្លងច្រើនជាងគេ ដែលមានការឆ្លងចំនួន ១ពាន់ ១៣៩ករណី។ តួលេខឆ្លងតិចជាងគេ គឺប្រទេសកម្ពុជា ដែលមានការឆ្លងចំនួន ១២ករណី។ ប្រទេសសឹង្ហបុរី, ថៃ និងប្រទេសប្រុយណេ គឺជាប្រទេសដែលគ្មានសេចក្តីរាយការណ៍ជុំវិញតួលេខឆ្លង និងស្លាប់ឡើយ ក្នុងរយៈពេល…

តម្លៃប្រេងសាំងធម្មតា បានចុះតម្លៃតិចតួច ខណៈគណបក្សនយោបាយទាំង១៨ បាននិងកំពុងធ្វើយុទ្ធនាការឃោសនាបោះឆ្នោតប្រកួតប្រជែងសម្រាប់ការបោះឆ្នោតថ្ងៃទី២៣កក្កដា ឆ្នាំ២០២៣។ យោងតាមក្រសួងពាណិជ្ជកម្ម, តម្លៃប្រេងឥន្ធនៈសម្រាប់ការលក់រវាងពីថ្ងៃទី០១ រហូតដល់ថ្ងៃទី១០ ខែកក្កដា ឆ្នាំ២០២៣ គឺប្រេងសាំងធម្មតា មានតម្លៃ៤ពាន់ ១៥០រៀលក្នុង១លីត្រ ដែលតម្លៃនេះបានថយចុះមកវិញចំនួន៥០រៀល បើធៀបទៅការលក់រយៈពេល១០ថ្ងៃ មុន…ចំណែកប្រេងម៉ាស៊ូតមានតម្លៃចំនួន៣ពាន់៩៥០រៀល ក្នុង១លីត្រ ដែលតម្លៃនេះគឺនៅថេរ បើធៀបទៅ នឹងការ លក់រយៈពេល១០ថ្ងៃមុន។ ដោយឡែកតម្លៃប្រេងស៊ុបពែ័រវិញ គឺមិនបានកំណត់ក្នុងតារាងក្រសួងពាណិជ្ជកម្មនោះទេ ប៉ុន្តែតម្លៃលក់តែង តែខ្ពស់ជាងតម្លៃប្រេងសាំងធម្មតា។ នៅថ្ងៃនេះប្រេងសាំងស៊ុបពែ័រ តាមស្ថានីយ៍ខ្លះគឺមានតម្លៃចំនួន៤ពាន់ ៧៥០រៀល, កន្លែងខ្លះមានតម្លៃចំនួន៤ពាន់៨០០រៀល និងកន្លែងខ្លះមានតម្លៃចំនួន៤ពាន់៨៥០រៀល ក្នុងមួយលីត្រ។ សូមជម្រាបថា រាជរដ្ឋាភិបាលតែងតែចំណាយប្រាក់ជួយខាតយ៉ាងហោច ៦ចុច៥សេន ក្នុងមួយលីត្រ ដើម្បីជាការទប់ស្កាត់តម្លៃប្រេង ក្នុងការជួយសម្រាលបន្ទុកដល់ពលរដ្ឋ។

យ៉ាងហោចខណ្ឌចំនួន៥ក្នុងរាជធានីបានរងការលិចលង់ដោយសារការធ្លាក់ភ្លៀងខ្លាំងនាវេលារសៀលថ្ងៃទី៣ កក្កដា ឆ្នាំ២០២៣។ យោងតាមមន្ទីរសាធារណការរាជធានីភ្នំពេញ «ទឹកភ្លៀងមានកំពស់១៥៣មីលីម៉ែត្រ» បានលិចតំបន់មួយចំនួនក្នុងតំបន់កណ្តាលក្រុង ដូចជា ខណ្ឌសែនសុខ, ខណ្ឌមានជ័យ, ខណ្ឌច្បារអំពៅ និងខណ្ឌពោធិ៍សែនជ័យ។ មន្ទីរសាធារណការ បានថ្លែងថា នេះគឺជាកម្ពស់ទឹកភ្លៀងធ្លាក់ខ្លាំងដែលមិនធ្លាប់មាន ក្នុងរយៈពេល៣ឆ្នាំចុងក្រោយនេះ។ ភាពលិចលង់ខ្លាំងនេះ ត្រូវគេនិយាយថាដោយសារតែការស្ទះមុខទឹកហូរដោយសារសំរាម។ មន្ទីរសាធារណការបានអំពាវនាវពលរដ្ឋមេត្តាយោគយល់អធ្យាស្រ័យ និងចូលរួមកាយសំរាមដែលស្ទះទឹកនៅមុខចំរឹងអណ្តូងលូ ដែលស្ថិតនៅមុខលំនៅដ្ឋានរៀងៗខ្លួន។

ខណ្ឌដូនពេញកំពុងសាងសង់សំណង់នៅក្រោមដី ដែលរួមមានចំណតរថយន្តផ្សារទំនើប, ភោជនីយដ្ឋាន និងសេវាកម្មផ្សេងៗទៀត ដែលនឹងមានជាលើកដំបូងបង្អស់ បន្ទាប់ពីមានការបណ្តាក់ទុនមួយនៃវិស័យឯកជន។ ពិធីក្រុងពាលី និងការបញ្ចុះបឋមសិ​លា បានធ្វើវេលាព្រឹកថ្ងៃទី៣ កក្កដា ឆ្នាំ២០២៣ ក្រោមអធិបតីភាពលោក ឃួង ស្រេង អភិបាលនៃគណៈអភិបាលរាជធានីភ្នំពេញ នៅក្រោមដីឡូត៍ នៃផ្លូវលេខ ១០៦-១០៨ និងលេខ ១៣-១៩ ក្នុងសង្កាត់វត្តភ្នំ ខណ្ឌដូនពេញ រាជធានីភ្នំពេញ។ លោក ឃួង ស្រេង បានថ្លែងថា៖ ចំណតរថយន្ត ផ្សារទំនើប ភោជនីយដ្ឋាន និងសេវាកម្មផ្សេងៗទៀតនេះ ត្រូវបានស្ថាបនាឡើងដោយក្រុមហ៊ុនក្នុងស្រុកអ៊ីឌីស៊ីជូតា (ខេមបូឌា)។ លោកស្រីឧកញ៉ា ចាន់ សុទ្ធា អគ្គនាយិកា ក្រុមហ៊ុន អ៊ីឌីស៊ីជូតា (ខេមបូឌា) បានថ្លែងក្នុងឱកាសនោះថា៖ ចំណតរថយន្ត ផ្សារទំនើប ភោជនីយដ្ឋាន និងសេវាកម្មផ្សេងៗទៀតនេះ ត្រូវបានអនុញ្ញាតដោយរាជរដ្ឋាភិបាល ដោយសាងសង់ចំនួន៤ជាន់, ២ជាន់ជាចំណតរថយន្ត និង២ជាន់ទៀតជាផ្សារទំនើបនៅលើផ្ទៃដីទំហំ៣ម៉ឺន ៣ពាន់ ១២០ម៉ែត្រការ៉េ ដែលអាចចតរថយន្តបានចំនួន ៥១៦គ្រឿង។ លោក ឃួង…

តំណាងអង្គការអន្តរជាតិជាភាសាបារាំង OIF ប្រចាំតំបន់អាស៊ី និងប៉ាស៊ីហ្វិក បានថ្លែងថា កម្ពុជាបានក្លាយជាប្រទេសយ៉ាងសំខាន់ក្នុងប្រតិបត្តិការសន្តិភាពរបស់អង្គការសហប្រជាជាតិ។ តំណាង OIF លោកអេតហ្គា ឌូអឺរីក Edgar DOERIG បានថ្លែងថាកងកម្លាំងកម្ពុជា បំរើការក្រោមឆ័ត្រអង្គការសហប្រជាជាតិ បានធ្វើកិច្ចការរបស់គេប្រកបដោយជំនាញវិជ្ជាជីវៈ និងត្រូវបានទទួលស្គាល់ជាលក្ខណៈអន្តរជាតិ។ ការថ្លែងបញ្ជាក់របស់មន្ត្រីតំណាង OIF បានធ្វើឡើងនៅថ្ងៃទី៣កក្កដា ក្នុងឱកាសជួបពិភាក្សាជាមួយរដ្ឋលេខាធិការប្រចាំការក្រសួងការបរទេស លោក អ៊ុច បូររិទ្ធ ក្នុងឱកាសបើកវគ្គបណ្តុះបណ្តាលភាសាបារាំង ដល់សិក្ខាកាម នៃកងយោធពលខេមរភូមិន្ទនៅមជ្ឈមណ្ឌលជាតិ។ មន្ត្រីតំណាង OIF បានថ្លែងថារយៈ ពេល៣០ឆ្នាំកន្លងមកនេះ កងកម្លាំងរក្សាសន្តិភាពរបស់កម្ពុជា គឺជាកម្លាំងយ៉ាងសំខាន់ក្នុងការបំពេញប្រតិបត្តិការសន្តិភាពក្រោមឆ័ត្រអង្គការ សហប្រជាជាតិ និងលោកបញ្ជាក់ថាបច្ចុប្បន្នមានកងកម្លាំងកម្ពុជា ជាង៨០០នាក់ បាននិងកំពុងបំពេញបេសសកកម្មរបស់សកលលោកនេះ។ លោកបញ្ជាក់ថាជំនាញវិជ្ជាជីវៈ របស់កងយោធពលខេមរភូមិន្ទបច្ចុប្បន្នត្រូវបានទទួលស្គាល់ជាលក្ខណៈអន្តរជាតិ។ លោក អ៊ុច បូររិទ្ធ បានលើកឡើងថា ឆ្នាំ២០២៣នេះ គឺជាខួបលើកទី៣១ នៃវត្តមានកងយោធាមួកខៀវអង្គការសហប្រជាជាតិនៅលើទឹកដីកម្ពុជា ដែលក្នុងនោះក៏មានវត្តមានកងកម្លាំងរក្សាសន្តិភាពបារាំង ក្នុងការចូលរួមចំណែកជួយរក្សាសុខសន្តិភាពនៅលើទឹកដីដ៏កំសត់ ដែលពោរពេញដោយជម្លោះ និងការហែកហួរដោយសង្គ្រាម។ មន្ត្រីជាន់ខ្ពស់ក្រសួងការបរទេសកម្ពុជា បានលើកឡើងថា ការរួមវិភាគទានដ៏ថ្លៃថ្លាក្នុងស្មារតី មនុស្សធម៌របស់កងយោធាមួកខៀវកម្ពុជានេះ បានទទួលការកោតសរសើរ និងវាយតម្លៃខ្ពស់…