ប្រទេសមួយចំនួននៅអាស៊ាននៅតែបន្តមានករណីឆ្លង និងស្លាប់ដោយសារកូវីដ១៩ ក្នុងនោះកម្ពុជាក៏បន្តរកឃើញឆ្លងថ្មី ៣ករណីថែមទៀតផងដែរ ក្នុងរយៈពេល២៤ម៉ោងចុងក្រោយនេះ។ យោងតាមក្រសួងសុខាភិបាលកម្ពុជាការឆ្លងថ្មី៣ករណី នៅថ្ងៃនេះជាតួ លេខឆ្លងថេរ បើប្រៀបធៀបនឹងម្សិលមិញ។ តួលេខឆ្លងថ្មីកូវីដ១៩ ក្នុងប្រទេសអាស៊ាននៃរយៈពេល ២៤ម៉ោងចុងក្រោយនេះ មានចំនួន ៦១៦ករណី ដែលជាតួលេខឆ្លងបន្តថយចុះចំនួន ៣៧៥ករណី ធៀបនឹងការឆ្លងកាលពីថ្ងៃម្សិលមិញ។ ការឆ្លងក្នុងរយៈពេល ២៤ម៉ោងកន្លងមកនេះ បានកើតលើប្រទេសចំនួន ៥ នៅអាស៊ានរួមមានប្រទេសឥណ្ឌូនេស៊ី, ហ្វីលីពីន, វៀតណាម, ឡាវ និងប្រទេសកម្ពុជា។ ប្រទេសហ្វីលីពីន គឺជាប្រទេសដែលមានតួលេខឆ្លងច្រើនជាងគេ ដែលមានការឆ្លងចំនួន ៣៣៩ករណី។ តួលេខឆ្លងតិចជាងគេ គឺប្រទសកម្ពុជា ដែលមានការឆ្លងចំនួន ៣ករណី។ ប្រទេសសឹង្ហបុរី, ថៃ, ម៉ាឡេស៊ី, ប្រុយណេ និងប្រទេសមីយ៉ាន់ម៉ា គឺជាប្រទេសដែលគ្មានសេចក្តីរាយការណ៍ជុំវិញតួលេខឆ្លង និងស្លាប់ឡើយ ក្នុងរយៈពេល ២៤ម៉ោងចុងក្រោយនេះ។ តួលេខស្លាប់ដោយសារកូវីដ១៩ ក្នុងប្រទេសអាស៊ានរយៈពេល ២៤ម៉ោងចុងក្រោយនេះ មានចំនួន ៤នាក់ ដែលជាពលរដ្ឋនៃប្រទេសឥណ្ឌូនេស៊ី។ គិតសរុបរួមនៃប្រទេសទាំង១០ អាស៊ាននាពេលនេះ ការឆ្លងសរុបមានចំនួន ៣៦លាន ២៤ម៉ឺន ២០០ករណី,…

តម្លៃប្រេងសាំង បានឋិតនៅថេរ ខណៈប្រេងម៉ាស៊ូតបានកើនតិចតួចថែមទៀត សម្រាប់ក្នុងការលក់រយៈពេល១០ថ្ងៃខាងមុខនេះ។ យោងតាមក្រសួងពាណិជ្ជកម្ម តម្លៃប្រេងឥន្ធនៈ សម្រាប់ការលក់រវាងពី់ថ្ងៃទី២១រហូតដល់ថ្ងៃទី៣០ ខែមិថុនា ឆ្នាំ២០២៣ គឺប្រេងសាំងធម្មតា មានតម្លៃ៤ពាន់២០០រៀលក្នុង១លីត្រ ដែលតម្លៃនេះគឺឋិតនៅថេរ បើធៀបទៅការលក់រយៈ ពេល១០ថ្ងៃមុន… ចំណែកប្រេងម៉ាស៊ូត មានតម្លៃចំនួន៣ពាន់៩៥០រៀលក្នុង១លីត្រ ដែលតម្លៃនេះបានកើនឡើងចំនួន៥០រៀល បើធៀបទៅនឹងការលក់រយៈពេល១០ថ្ងៃមុន។ សូមជម្រាបថា រាជរដ្ឋាភិបាលតែងតែចំណាយប្រាក់ ជួយខាតយ៉ាងហោច ៦ចុច ៥សេន ក្នុងមួយលីត្រ ដើម្បីជាការទប់ស្កាត់តម្លៃប្រេង ក្នុងការជួយសម្រាលបន្ទុកដល់ពលរដ្ឋ។

ការដាច់ភ្លើងក្នុងសប្តាហ៍នេះ បានមកដល់ទៀតហើយ ដែលមានរយៈពេល៤ថ្ងៃ គឺមាននៅថ្ងៃព្រហស្បតិ៍ ថ្ងៃសុក្រ ថ្ងៃសៅរ៍ និងថ្ងៃអាទិត្យ។ ការដាច់ភ្លើងនេះ បានកើតឡើងនៅក្នុងរាជធានីភ្នំពេញ និងខេត្ដកណ្ដាល ដែលនឹងមានរយៈពេលពី៦ម៉ោង ទៅ៩ម៉ោង។ តើការដាច់ភ្លើងប្រចាំសប្តាហ៍នេះមាននៅទីណាខ្លះ? សូមស្ដាប់សេចក្ដីរាយការណ៍

កម្ពុជាទទួលបានភ្ញៀវទេសចរអន្តរជាតិជាង២លាននាក់ នៅក្នុងរយៈពេល៥ខែដំបូង នៃឆ្នាំ២០២៣។ ក្រសួងទេសចរណ៍បានថ្លែងថាតួលេខនេះកើនឡើងជាង៥៣០% បើធៀបរយៈពេលដូចគ្នានៅឆ្នាំ២០២២។ រដ្ឋមន្ត្រីក្រសួងទេសចរណ៍លោក ថោង ខុន នៅថ្ងៃទី២១ ខែមិថុនា ឆ្នាំ២០២៣ ក្នុងសន្និបាតបូកសរុបការងារទេសចរណ៍, ផែនការស្តារ និងលើកស្ទួយវិស័យទេសចរណ៍ក្នុង និងក្រោយវិបត្តិជំងឺកូវីដ១៩ នៅសណ្ឋាគារសុខាភ្នំពេញ បានបញ្ជាក់ថា ក្នុងរយៈពេល ៥ខែ ដើមឆ្នាំ២០២៣នេះ កម្ពុជាទទួលបានភ្ញៀវទេសចរអន្តរជាតិ មកទស្សនាកម្ពុជា ជាង ២លាន១៦ម៉ឺននាក់ ដែលកើនឡើងជាង៥៣០% បើធៀបរយៈពេលដូចគ្នាឆ្នាំ២០២២។ លោកបានរៀបរាប់ថាភ្ញៀវទេសចរជាតិ មានប្រមាណ១០លាននាក់ កើនឡើង ៧៦,៤% បើធៀបរយៈពេលដូចគ្នាឆ្នាំ២០២២។ រដ្ឋមន្ត្រីក្រសួងទេសចរណ៍ បានរំពឹងថាឆ្នាំ២០២៣នេះ កម្ពុជានឹងអាចទទួលបានភ្ញៀវទេសចរអន្តរជាតិប្រមាណជា ៤លាននាក់ និងទេសចរក្នុងស្រុកប្រមាណ ១៦លាននាក់។ តួលេខភ្ញៀវទេសចររបស់កម្ពុជាបានធ្លាក់ចុះស្ទើរដល់ចំណុចសូន្យក្នុងពេលដែលពិភពលោកបានរងនឹងវិបត្តិកូវីដ១៩។ ក្រោមនយោបាយចាក់វ៉ាក់សាំងស្រោចស្រពទូទាំងប្រទេសលោក ថោង ខុន បានបន្តថា កម្ពុជាទទួលបានជោគជ័យនឹងការប្រយុទ្ធជាមួយជំងឺកូវីដ១៩សកម្មភាបទេសចរក្នុងស្រុក បានត្រឡប់មករកភាពដើមវិញ ហើយទេសចរអន្តរជាតិក៏កំពុងមានកំណើនជាបន្តបន្ទាប់។ កម្ពុជាមានសុទិដ្ឋិនិយមថា នឹងទទួលបានភ្ញៀវទេសចរអន្តរជាតិ ប្រមាណ ៧លាននាក់ នៅក្នុងឆ្នាំ២០២៥ ឬ២០២៦ ហើយនឹងអាចរួមចំណែកជំរុញសេដ្ឋកិច្ចងើបឡើងវិញបានល្អប្រសើរផងដែរ។

អាជ្ញាធរមីន បានស្នើសុំឲ្យរដ្ឋាភិបាលជប៉ុន បន្តជួយគាំទ្រដល់អង្គភាពស៊ីម៉ាក់ លើការងារបោសសម្អាតនៅខេត្តពោធិ៍សាត់ ដើម្បីប្រែក្លាយជាខេត្តអស់គ្រាប់មីន។ ខេត្តពោធិ៍សាត់ គឺជាខេត្តដែលមានសេសសល់ដោយគ្រាប់មីន និងគ្រាប់មិនទាន់ផ្ទុះជាច្រើនកប់នៅក្នុងដី ដោយសារតែខេត្តនេះ មានទឹកដីមួយផ្នែកជាសំបុកលាក់ខ្លួនរបស់ក្រុមឧទ្ទាមទ័ពព្រៃ និងជាខេត្តដែលតែងមានការវាយប្រហារជាច្រើនញឹកញាប់ក្នុងសម័យកម្ពុជាមានសង្គ្រាមស៊ីវិល។ ទេសរដ្ឋមន្រ្តី លី ធុជ ដែលជាអនុប្រធានទី១ អាជ្ញាធរមីន ក្នុងឳកាសជួបពិភាក្សាការងារជាមួយឯកអគ្គរាជទូតជប៉ុនលោកអ៊ូអ៊ីណុ អាត់ស៊ូស្ហ៊ី នៅថ្ងៃទី២១ ខែមិថុនាឆ្នាំ២០២៣ បានស្នើសុំឲ្យ រាជរដ្ឋាភិបាលជប៉ុន បន្តជួយគាំទ្រដល់អង្កភាពស៊ីម៉ាក់ លើការងារបោសសម្អាតនៅខេត្តពោធិ៍សាត់ ដើម្បីប្រែក្លាយជាខេត្តអស់មីន។ លោក លី ធុជ បានវាយតម្លៃខ្ពស់ ចំពោះចំណងទំនាក់ទំនងការទូតជាប្រវត្តិសាស្រ្តរវាងប្រទេសទាំងពីរ រយៈពេល ៧០ឆ្នាំមកនេះ និងលោកបានចាត់ទុកជប៉ុន បានចូលរួមចំណែកយ៉ាងសកម្ម ក្នុងដំណើរស្វែងរកសន្តិភាព និងទ្រទ្រង់ដល់ការស្តារ និងអភិវឌ្ឍន៍សេដ្ឋកិច្ចសង្គមកម្ពុជា។ លោក លី ធុជ បានថ្លែងថាសមិទ្ធផលការងារបោសសម្អាតមីនរយៈពេល ៣០ឆ្នាំ នៅកម្ពុជា គឺមិនអាចខ្វះបានទេពីការចូលរួមគាំទ្រយ៉ាងសកម្មពីប្រទេសជប៉ុន។ លោក អ៊ូអ៊ីណុ អាត់ស៊ូស្ហ៊ី បានវាយតម្លៃខ្ពស់ចំពោះទំនាក់ទំនងការទូតជាប្រវត្តិសាស្រ្តរវាង កម្ពុជា-ជប៉ុន ដែលទំនាក់ទំនងនេះបានឈានដល់កម្រិតជាដៃគូយុទ្ធសាស្រ្តគ្រប់ជ្រុងជ្រោយ រវាងប្រទេសទាំងពីរ។ ឯកអគ្គរាជទូតជប៉ុន បានថ្លែងអំណរគុណរាជរដ្ឋាភិបាលកម្ពុជា ដែលតែងតែផ្តល់នូវកិច្ចសហប្រតិបត្តិយ៉ាងជិតស្និទ្ធ ហើយប្រទេសជប៉ុន…

សកម្មជនគន្លឹះ នៃអតីតគណបក្សសង្គ្រោះជាតិ និងគណបក្សភ្លើងទៀន បានបន្តការស្នើសុំចូលរួមជីវភាពនយោបាយជាមួយនឹងគណបក្សប្រជាជនកម្ពុជា ខណៈការបោះឆ្នោតសកល ខែកក្កដាកាន់តែរំកិលមកកៀកជាលំដាប់។ សេចក្តីរាយការណ៍នៅថ្ងៃទី២១មិថុនានេះ បានបង្ហាញពីសកម្មជនគណបក្សភ្លើងទៀន និងអតីតគណបក្សសង្គ្រោះជាតិ នៃខេត្តព្រះវិហារ, ខេត្តកណ្តាល និងខេត្តកំពង់ចាម។ នេះជាវីដេអូរបស់អតីតអនុប្រធានទី១ នៃអតីតគណបក្សសង្គ្រោះជាតិ នៅខេត្តព្រះវិហារ លោក ជា រុំ។ គណបក្សភ្លើងទៀន ត្រូវបានគជបបដិសេធការចុះបញ្ជីចូលរួមក្នុងការប្រកួតប្រជែងបោះឆ្នោតសកល ដោយសារមិនបានបំពេញតាមលក្ខន្តិកៈ នៃនីតិវិធីដែលគជបបានតម្រូវ។ ក្រុមប្រឹក្សាធម្មនុញ្ញដែលជាស្ថាប័នច្បាប់កំពូលរបស់ជាតិ បានសម្រេចបដិសេធបន្ថែមទៀត ក្រោយការរកឃើញថាគណបក្សភ្លើងទៀននោះបានប្រព្រឹត្តខុសនឹងគតិច្បាប់។ នៅក្នុងខេត្តកំពង់ចាម, ស្លាកគណបក្សភ្លើងទៀនក្នុងមួលដ្ឋានមួយ ត្រូវបានសកម្មជន និងអ្នកគាំទ្របានផ្តួលរំលំចោលជាបន្តបន្ទាប់ ក្រោមហេតុផលអស់ជំនឿ និងការស្អប់ខ្ពើមចំពោះនយោបាយជ្រុលនិយម។ ខែមេសា, ខែឧសភា និងឈានចូលក្នុងខែមិថុនានេះ គឺជាខែដែលមានការស្នើសុំចូលរួមជីវភាពនយោបាយជាច្រើន ពីសកម្មជនទាំងក្នុង និងក្រៅប្រទេសដែលធ្លាប់បានចូលរួមធ្វើសកម្មភាពបំរើគណបក្សប្រឆាំង។ នៅថ្ងៃដដែលនេះផងដែរ, ប្រធានថ្នាក់ស្រុកនៃអតីតបក្សសង្គ្រោះជាតិ និងសកម្មជនបក្សភ្លើងទៀននៅស្រុកខ្សាច់កណ្ដាល ចំនួន៤៥នាក់ បានស្នើសុំចូលរួមក្នុងជីវភាពនយោបាយជាមួយគណបក្សប្រជាជនកម្ពុជាផងដែរ។ ក្នុងសប្តាហ៍នេះផងដែរសកម្មជនគណបក្សភ្លើងទៀននៅខេត្តប៉ៃលិន, ខេត្តកំពត, នៅរាជធានីភ្នំពេញ និងខេត្តត្បូងឃ្មុំ ត្រូវគេឃើញថាបាននាំគ្នាសុំចូលរួមជីវភាពនយោបាយជាមួយគណបក្សប្រជាជនកម្ពុជាជាបន្តបន្ទាប់ នៅមុនការបោះឆ្នោតសកលថ្ងៃទី២៣ កក្កដាឈានមកដល់។

បណ្ឌិត ហ៊ុន ម៉ាណែត បានបំផុសយុវជនត្រូវរួមគ្នាជម្រុញឱ្យចក្ខុវិស័យរបស់ប្រមុខរាជរដ្ឋាភិបាល ដែលបានដាក់ចេញនាំប្រទេសមានប្រាក់ចំណូលកំរិតខ្ពស់។ សេដ្ឋកិច្ចជាតិរបស់កម្ពុជាក្នុងពេលដែលមានការឆ្លងរាលដាលនូវជម្ងឺកូវីដ១៩ ត្រូវបានធ្លាក់អស់ជាច្រើន។ ប៉ុន្តែក្រោមគោលនយោបាយចាក់វ៉ាក់សាំងស្រោចស្រពទូទាំងប្រទេស ដែលបានធ្វើឱ្យដំណើរការសេដ្ឋកិច្ចជាតិបានងើបសាឡើងវិញបន្តិចម្តងៗនេះ ត្រូវបានប្រមុខរាជរដ្ឋាភិបាលបានថ្លែងថា កម្ពុជានឹងអាចសម្រេចនូវមហិច្ឆិតារបស់ខ្លួនបាន ក្នុងការនាំប្រទេសទទួលបានប្រាក់ចំណូលកម្រិតខ្ពស់ក្នុងឆ្នាំ២០៥០ បើទោះបីជាមានជម្ងឺឆ្លងកូវីដ១៩ក៏ដោយ។ បណ្ឌិត ហ៊ុន ម៉ាណែត ថ្លែងក្នុងពិធីសំណេះសំណាលជាមួយក្រុមការងារយុវជនគណបក្សប្រជាជនកម្ពុជាខេត្តប៉ៃលិននៅថ្ងៃទី២០ ខែមិថុនាថា «យើងនឹងអាចសម្រេចចក្ខុវិស័យនេះបាន, ប្រសិនយុវជនយើងសុទ្ធតែជាមូលធនមនុស្សប្រកបដោយចំណេះដឹង, ចំណេះធ្វើ, ជំនាញ និងគំនិតច្នៃប្រឌិតហើយបូករួមនឹងឧត្តមគតិស្នេហាជាតិ”។ លោកបានថ្លែងទៀតថា ”យុវជនគ្រប់ស្រទាប់វណ្ណៈ មិនថាសិស្ស-និស្សិត ដែលកំពុងសិក្សា, បញ្ចប់ការសិក្សា ឬកំពុងបំពេញការងារនោះទេ គឺពួកគេសុទ្ធតែមានតួនាទីយ៉ាងសំខាន់ ក្នុងការអភិវឌ្ឍសង្គមជាតិទាំងមូល ជាពិសេសដើម្បីសម្រេចបានចក្ខុវិស័យឆ្នាំ២០៥០ ដែលកម្ពុជានឹងក្លាយជាប្រទេសដែលមានចំណូលខ្ពស់។ លោកបានថ្លែងបញ្ជាក់នូវគន្លឹះ៣ដែលនឺងជួយនាំឱ្យយុវជនអាចជួយសម្រេចបាននូវការជម្រុញឱ្យចក្ខុវិស័យរបស់ប្រមុខរាជរដ្ឋាភិបាលក្លាយជាការពិតបាន។ គន្លឹះទាំងបីនោះ គឺមានឆន្ទៈ, ស្គាល់អត្តសញ្ញាណ និងមានក្តីសង្ឃឹម»។

រដ្ឋសភាត្រៀមនឹងបើកកិច្ចប្រជុំដេញដោលពិភាក្សា ដើម្បីរកការអនុម័តសេចក្តីព្រាងវិសោធនកម្មច្បាប់បោះឆ្នោត នៅថ្ងៃសុក្រសប្តាហ៍នេះហើយ បន្ទាប់ពីមានការសិក្សារួចរាល់ពីក្រុមគណៈកម្មការជំនាញ។ គណៈកម្មាធិការអចិន្រ្តៃយ៍រដ្ឋសភានៅព្រឹកថ្ងៃទី២១ ខែមិថុនា ឆ្នាំ២០២៣ ក្រោមអធិបតីភាពសម្តេចអគ្គមហាពញាចក្រី ហេង សំរិន បានកំណត់កាលបរិច្ឆេទយកថ្ងៃទី២៣មិថុនា ដើម្បីបើកកិច្ចសម័យប្រជុំពេញអង្គរដ្ឋសភា សម្រាប់ធ្វើការអនុម័តលើសេចក្តីព្រាងច្បាប់នេះ។ សម្តេចតេជោ ហ៊ុន សែន កាលពីថ្ងៃទី១៣មិថុនា បានស្នើកែទម្រង់ច្បាប់លើសិទ្ធិបោះឆ្នោត បន្ទាប់ពីក្រុមធ្វើនយោបាយប្រឆាំងបានដាក់ចេញនូវឧបាយកលទុច្ចរឹតព្យាយាមរារាំងពលរដ្ឋ មិនឱ្យចេញទៅបោះឆ្នោតសកលនៅថ្ងៃទី២៣ ខែកក្កដាខាងមុខនេះ។ សេចក្តីព្រាងបានសរសេរថាការស្នើធ្វើវិសោធនកម្មច្បាប់នេះ គឺមិនបានដកហូត សិទ្ធិឈរឈ្មោះបោះឆ្នោតណា ចំពោះប្រជាពលរដ្ឋឡើយ ប៉ុន្តែតម្រូវអ្នកដែលឈរឈ្មោះឱ្យគេបោះឆ្នោតនៅគ្រប់កម្រិតទាំងអស់ ត្រូវតែចេញទៅបោះឆ្នោត…ហើយបើសិនជាមិនបានចេញទៅបោះឆ្នោតនោះទេ គឺបុគ្គលនោះ នឹងត្រូវបាត់បង់សិទ្ធិរបស់ខ្លួនក្នុងការឈរឈ្មោះឱ្យគេបោះឆ្នោត។ តើសេចក្តីព្រាងវិសោធនកម្មច្បាប់នោះមានខ្លឹមសារអ្វីខ្លះ? អប្សរាណិតធ្វើសេចក្តីរាយការណ៍

ប្រទេសមួយចំនួននៅអាស៊ាននៅតែបន្តមានករណីឆ្លង និងស្លាប់ដោយសារកូវីដ១៩ ក្នុងនោះកម្ពុជាក៏បន្តរកឃើញឆ្លងថ្មី ៣ករណីថែមទៀតផងដែរ ក្នុងរយៈពេល២៤ម៉ោងចុងក្រោយនេះ។ យោងតាមក្រសួងសុខាភិបាល ការឆ្លងថ្មី ៣ករណីនៅថ្ងៃនេះ ជាតួលេខបន្តកើនឡើងថែមទៀតចំនួន ១ករណី បើប្រៀបធៀបនឹងម្សិលមិញ។ តួលេខឆ្លងថ្មីកូវីដ១៩ ក្នុងប្រទេសអាស៊ាននៃរយៈពេល ២៤ម៉ោងចុងក្រោយនេះ មានចំនួន ៤៨៦ករណី ដែលជាតួលេខឆ្លងបន្តថយចុះច្រើនដល់ចំនួន ១ពាន់ ១៣៣ករណី ធៀបនឹងការឆ្លងកាលពីថ្ងៃម្សិលមិញ។ ការឆ្លងក្នុងរយៈពេល ២៤ម៉ោងកន្លងមកនេះ បានកើតលើប្រទេសចំនួន ៥ នៅអាស៊ានរួមមានប្រទេសឥណ្ឌូនេស៊ី, ថៃ, វៀតណាម, ឡាវ និងប្រទេសកម្ពុជា។ ប្រទេសថៃ គឺជាប្រទេសដែលមានតួលេខឆ្លងច្រើនជាងគេ ដែលមានការឆ្លងចំនួន ២៧២ ករណី។ តួលេខឆ្លងតិចជាងគេ គឺប្រទសកម្ពុជា ដែលមានការឆ្លងចំនួន ៣ករណី។ ប្រទេសសឹង្ហបុរី, ហ្វីលីពីន, ម៉ាឡេស៊ី, ប្រុយណេ និងប្រទេសមីយ៉ាន់ម៉ា គឺជាប្រទេសដែលគ្មានសេចក្តីរាយការណ៍ជុំវិញតួលេខឆ្លង និងស្លាប់ឡើយ ក្នុងរយៈពេល ២៤ម៉ោងចុងក្រោយនេះ។ តួលេខស្លាប់ដោយសារកូវីដ១៩ ក្នុងប្រទេសអាស៊ានរយៈពេល ២៤ម៉ោងចុងក្រោយនេះ មានចំនួន ៨នាក់ ដែលជាពលរដ្ឋនៃប្រទេសថៃ។ គិតសរុបរួមនៃប្រទេសទាំង១០ អាស៊ាននា…