ប្រទេសចំនួនតែ៤ប៉ុណ្ណោះក្នុងអាស៊ាននៅថ្ងៃទី១៧ ឧសភានេះ ដែលមានករណីឆ្លង និងស្លាប់ដោយសារកូវីដ១៩។ ដោយឡែកប្រទេសកម្ពុជាមិនមានការឆ្លងថ្មីឡើយ ក្នុងរយៈពេល ២៤ម៉ោងចុងក្រោយនេះ។ តួលេខឆ្លងថ្មីកូវីដ១៩ ក្នុងប្រទេសអាស៊ាន នៃរយៈពេល ២៤ម៉ោងចុងក្រោយនេះ មានចំនួន ៣ពាន់ ៩០៤ករណី ដែលជាតួលេខឆ្លងថយចុះមកវិញចំនួន ២ពាន់ ៨៩ករណី ធៀបនឹងការឆ្លងកាលពីថ្ងៃម្សិលមិញ។ ការឆ្លងថ្ងៃនេះ បានកើតលើប្រទេសចំនួន ៤ នៅអាស៊ាន រួមមានប្រទេសឥណ្ឌូនេស៊ី, ហ្វីលីពីន, វៀតណាម និងប្រទេសមីយ៉ាន់ម៉ា។ ប្រទេសវៀតណាម គឺជាប្រទេសដែលមានតួលេខឆ្លងច្រើនជាងគេ ដែលមានការឆ្លងចំនួន ២ពាន់ ១៥ករណី។ តួលេខឆ្លងតិចជាងគេក្នុងចំណោមប្រទេសទាំង៤នោះ គឺប្រទេសមីយ៉ាន់ម៉ា ដែលមានការឆ្លងចំនួន ១៦២ករណី។ ប្រទេសម៉ាឡេស៊ី, ថៃ, សឹង្ហបុរី, ឡាវ, ប្រុយណេ និងប្រទេសកម្ពុជា គឺជាប្រទេសដែលគ្មានសេចក្តីរាយការណ៍ជុំវិញតួលេខឆ្លង និងស្លាប់ឡើយ ក្នុងរយៈពេល ២៤ម៉ោង ចុងក្រោយនេះ។ តួលេខស្លាប់ដោយសារកូវីដ១៩ ក្នុងប្រទេសអាស៊ានរយៈពេល ២៤ម៉ោងចុងក្រោយនេះ មានចំនួន ៨នាក់ ដែលជាពលរដ្ឋនៃប្រទេសឥណ្ឌូនេស៊ី។ គិតសរុបរួមនៃប្រទេសទាំង១០អាស៊ាន នាពេលនេះ ការឆ្លងសរុបមានចំនួន…

សមត្ថកិច្ចកម្ពុជាបានបន្តទទួលបានបណ្តឹង១ករណីទៀត ដែលស្នើឱ្យជួយសង្គ្រោះជនជាតិចិនម្នាក់ ក្នុងរយៈពេល២៤ម៉ោងកន្លងមកនេះ។ កម្ពុជានៅតែបន្តយុទ្ធការបង្ក្រាបអំពើជួញដូរមនុស្សពាក់ព័ន្ធនឹងក្រុមទុច្ចរិតដែលមានប្រភពមកពីក្រៅ បានសហការជាមួយនឹងបក្ខពួកក្នុងប្រទេសកម្ពុជា បង្កនូវអំពើចាប់បង្ខាំងមនុស្ស ក្រោមរូបភាពល្បួងមកធ្វើការក្នុងប្រទេសកម្ពុជាដោយសន្យាឱ្យកម្រៃពលកម្មច្រើន។ មន្ត្រីនាំពាក្យក្រសួងមហាផ្ទៃនាយឧត្តមសេនីយ៍ ខៀវ សុភ័គ បានថ្លែងថា គិតត្រឹមរសៀលថ្ងៃទី១៦ ឧសភា ក្រសួងមហាផ្ទៃបានទទួលការស្នើរកការជួយសង្គ្រោះជនជាតិចិនម្នាក់ ដែលមិនបញ្ជាក់នូវអត្តសញ្ញាណ និងទីកន្លែងច្បាស់លាស់ឡើយ។ កម្ពុជាបានធ្វើយុទ្ធនាការស្វែងរក និងជួយសង្គ្រោះមនុស្សដោយសារការជួញដូរមនុស្សខុសច្បាប់នេះ ចាប់តាំងពីថ្ងៃទី១៨ សីហា ឆ្នាំ២០២២។ គិតត្រឹមថ្ងៃទី១៦ ខែឧសភា ឆ្នាំ២០២៣, សំណើស្វែងរកការជួយសង្គ្រោះជនបរទេស មានចំនួន ៨៧៧ករណី ជាមួយមនុស្ស ២ពាន់១៨២នាក់ ដែលមាន ១៤សញ្ជាតិ។ សមត្ថកិច្ច បានស្រាវជ្រាវអង្កេតបឋមបាន ៨៥០សំណើ, បិទសំណុំរឿង ២៩៣សំណើ, រកឃើញ ១ពាន់ ២៦២នាក់, ឃាត់ខ្លួន១៣២នាក់, បិទក្រុមហ៊ុន ៥ទីតាំង, និងផ្អាកអាជីវកម្ម ក៏ដូចជាស្រាវជ្រាវក្រុមហ៊ុន ៤ទីតាំង និងកំពុងបន្តបើកប្រតិបត្តិការស្រាវជ្រាវ និងស៊ើបអង្កេត ៨៤ករណី៕

បណ្ឌិត ហ៊ុន ម៉ាណែត បានអញ្ជើញចូលរួមក្នុងពិធីសម្ពោធសមិទ្ធផលសាសនា ក្នុងខេត្តកណ្តាល និងបានប្រាប់អ្នកចូលរួមជុំវិញភាពជោគជ័យរបស់កម្ពុជា លើការរៀបចំព្រឹត្តិការណ៍កីឡាស៊ីហ្គេម។ ថ្លែងក្នុងពិធីសម្ពោធឆ្លងសាលប្រជុំបុណ្យ និងសមិទ្ធផលនានា ក្នុងវត្តគីរីស្រះស្រង់, ស្ថិតនៅភូមិទួលសុភី ឃុំព្រែកគយ ក្នុងស្រុកស្អាង នៅថ្ងៃទី១៧ ខែឧសភា ឆ្នាំ២០២៣ បណ្ឌិត ហ៊ុន ម៉ាណែត ដែលតំណាងដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានថ្លែងថា ព្រឹត្តិការណ៍កីឡាអាស៊ីអាគ្នេយ៍លើកទី៣២ «គឺជាមោទនភាពដ៏គួរឱ្យស្ញប់ស្ញែងក្នុងនាមជាខ្មែរ ដែលកម្ពុជាអាចសម្រេចបានជោគជ័យយ៉ាងត្រចះត្រចង់ ក្នុងការលើកកម្ពស់កិត្តិនាមកម្ពុជាឱ្យល្បឺរន្ទឺ»។ ព្រឹត្តិការណ៍កីឡាស៊ីហ្គេម ដែលបានប្រកាសបើកដំបូងនៅថ្ងៃទី៥ ឧសភា បានបិទបញ្ចប់វិញនៅថ្ងៃទី១៧ ឧសភានេះ។ បណ្ឌិត ហ៊ុន ម៉ាណែត បានថ្លែងបញ្ជាក់ជុំវិញមេដាយសរុប ដែលកម្ពុជាទទួលបានចំនួន២៨២គ្រឿង និងចាត់ទុកថា «លទ្ធផលដ៏ត្រចេះត្រចង់នេះ គឺកើតចេញពីការគិតគូរយ៉ាងច្បាស់លាស់ និងដាក់ចេញគោលនយោបាយដ៏ត្រឹមត្រូវរបស់រាជរដ្ឋាភិបាល ដែលមានសម្តេចតេជោ ជាប្រមុខដឹកនាំ តាមរយៈការផ្តល់នូវការយកចិត្តទុកដាក់វិនិយោគ រយៈពេលវែង ដែលនឹងបន្តចាក់គ្រឹះរឹងមាំសម្រាប់អភិវឌ្ឍសមត្ថភាពកីឡាករ ព្រមទាំងហេដ្ឋារចនាសម្ព័ន្ធគាំទ្រ ជាពិសេសចលនាគាំទ្រនៅទូទាំងប្រទេស ដែលជាចលករយ៉ាងសំខាន់មិនអាចខ្វះបាន ដោយបានផ្តល់នូវការតម្កល់ផលប្រយោជន៍ជាតិជាធំ»។ បណ្ឌិត…

សម្តេចក្រឡាហោម ស ខេង បានជាសះស្បើយពីជម្ងឺកូវីដ១៩វិញហើយ ក្រោយការឆ្លងរយៈពេល៥ថ្ងៃកន្លងមកនេះ។ សម្តេចក្រឡាហោម ស ខេង ត្រូវបានគេធ្វើតេស្តរកឃើញមានវិជ្ជមានជំងឺកូវីដ១៩ កាលពីថ្ងៃទី១២ ឧសភា។ សម្តេចក្រឡាហោម ស ខេង ដែលជាឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ បានសរសេរក្នុងបណ្តាញសង្គមនៅថ្ងៃទី១៧ ឧសភានេះ បញ្ជាក់ថាសម្តេច «បានជាសះស្បើយពីជម្ងឺកូវីដ១៩ហើយ ក្រោយពីបានអនុវត្តវិធានការសុខាភិបាល»។ សម្ដេចក្រឡាហោម ក្នុងរយៈពេល៥ថ្ងៃដែលមានការឆ្លងជម្ងឺរាតត្បាតនេះ បានលុបចោលកម្មវិធី និងបានអវត្តមានពីគម្រោងការងារមួយចំនួន។ សម្តេចបានសរសេរបន្តក្នុងបណ្តាញសង្គមថា «ចាប់ពីពេលនេះតទៅ ខ្ញុំនឹងមានវត្តមានជាសាធារណៈសាឡើងវិញ ដើម្បីបំរើការងារជួនជាតិនិងប្រជាពលរដ្ឋ»។

សហព័ន្ធគ្រប់គ្រងកីឡាបាល់ទាត់ នៃប្រទេសថៃ Football Association of Thailand បានចេញសេចក្តីថ្លែងការណ៍សុំទោសចំពោះទង្វើរបស់កីឡាករជម្រើសជាតិថៃក្រោមអាយុ២២ឆ្នាំ ដែលបង្កការវាយតប់ដាក់មកលើក្រុមជម្រើសជាតិឥណ្ឌូណេស៊ី ក្នុងវគ្គដណ្តើមមេដាយមាស នៃព្រឹត្តិការណ៍កីឡាស៊ីហ្គេមក្នុងរាជធានីភ្នំពេញ។ កីឡាករថៃដែលបានទាត់ចាញ់ក្រុមជម្រើសជាតិឥណ្ឌូណេស៊ី បានបង្កការវាយតប់ដាក់មកលើក្រុមឥណ្ឌូណេស៊ី ដែលព្រឹត្តិការណ៍នោះ បានបង្កការជ្រួលច្របល់ និងប្រញាប់ឱ្យកងកម្លាំងសន្តិសុខកម្ពុជា ធ្វើអន្តរាគមន៍ទប់ស្កាត់នៅលើតារាង ក្រោមការចូលរួមទស្សនាពីមនុស្សច្រើនម៉ឺននាក់។ សេចក្តីថ្លែងការណ៍សរបស់សហព័ន្ធបាល់ទាត់ថៃបានបញ្ជាក់ថា សហព័ន្ធកីឡាបាល់ទាត់ថៃ មានការខកចិត្តជាខ្លាំង និងសុំទោសចំពោះទង្វើដែលមិនសមហេតុផល ដែលបានកើតឡើង នៅអំឡុងការប្រកួតនាថ្ងៃទី១៦ ខែឧសភា ឆ្នាំ២០២៣ ក្នុងវិញ្ញាសាបាល់ទាត់បុរសរវាងថៃ និងឥណ្ឌូនេស៊ី ដែលមានអ្នកគាំទ្រជាច្រើននៅក្នុងកីឡដ្ឋាន និងជុំវិញពិភពលោក ដែលបានធ្វើឲ្យខូចកិត្តិយសធ្ងន់ធ្ងរដល់មុខមាត់ព្រឹត្តិការណ៍កីឡាតំបន់អាស៊ីអាគ្នេយ៍ និងមុខមាត់បាល់ទាត់ថៃផងដែរ»។ សេចក្តីថ្លែងការណ៍ដដែលបានសន្យាថា សហព័ន្ធកីឡាបាល់ទាត់ថៃ រួមទាំងក្រុមគ្រូបង្វឹកនឹងធ្វើការអប់រំ និងដាក់ទោសទណ្ឌចំពោះកូនក្រុមរបស់ខ្លួន ដើម្បីចៀសវាងមិនឱ្យមានករណីនេះ កើតឡើងនៅលើកក្រោយ ក្នុងកីឡា២ឆ្នាំម្តងនេះទៀតឡើយ។ គួរបញ្ជាក់ថាប្រទេសថៃនឹងត្រូវរៀបចំធ្វើជាម្ចាស់ផ្ទះ នៃព្រឹត្តិការណ៍ស៊ីហ្គេមលើកទី៣៣ នៅក្នុងឆ្នាំ២០២៥។ យោងតាមការចុះផ្សាយរបស់កាសែតខ្មែរក្នុងឆ្នាំ១៩៦៧ បានឱ្យដឹងថា ក្រុមបាល់ទាត់របស់ប្រទេសថៃធ្លាប់បានវាយក្រុមកីឡាបាល់ទាត់កម្ពុជាផងដែរ បន្ទាប់ពីបានចាញ់កម្ពុជា៣ទល់នឹងសូន្យ នៅក្នុងការប្រកួតជាមិត្តភាពអន្តរជាតិមួយ នៅក្នុងពហុកីឡដ្ឋានជាតិអូឡាំពិក ក្នុងរាជធានីភ្នំពេញនាជំនាន់អតីតកាលនោះ។

ព្រឹត្តិការណ៍កីឡាស៊ីហ្គេមលើកទី៣២ ដែលកម្ពុជាបានធ្វើជាម្ចាស់ផ្ទះ បានបង្ហាញលទ្ធផល ជាចុងក្រោយរបស់ខ្លួនហើយ ដោយកម្ពុជាបានស្ថិតជាប្រទេសក្នុងលំដាប់លេខរៀងទី៤ ដោយទទួលបានមេដាយសរុបចំនួន២៨២គ្រឿង។ ព្រឹត្តិការណ៍កីឡាស៊ីហ្គេមលើកទី៣២ បានឈានដល់ថ្ងៃបិទបញ្ចប់របស់ខ្លួននៅថ្ងៃទី១៧ឧសភា។ សម្តេចតេជោ ហ៊ុន សែន បានថ្លែងតាមបណ្តាញសង្គមចាត់ទុកការទទួលបានមេដាយសរុប ២៨២គ្រឿង ក្នុងប្រកួតកន្លងមកនេះ គឺជា «ការរីកចម្រើននៃវិស័យកីឡា» របស់កម្ពុជា និងជា«សមិទ្ធផលរបស់ប្រជាជាតិទាំងមូល ដែលប្រឹងងើបឈរឡើងក្នុងការកសាងជាតិ»។ សម្តេចតេជោបានសរសេរប្រៀបធៀបថា ក្នុងព្រឹត្តិការណ៍ស៊ីហ្គេមឆ្នាំ១៩៩៩, កម្ពុជាមិនទទួលបានមេដាយសោះឡើយ ហើយពេលនោះ បានស្ថិតនៅបាតតារាង នៃចំណាត់ថ្នាក់ទី១០ ក្រោមគេបង្អស់។ សម្តេចបន្តថា «ប៉ុន្តែសម្រាប់ឆ្នាំ២០២៣ ដែលកម្ពុជាធ្វើជាម្ចាស់វិញ កម្ពុជាទទួលមានមេដាយសរុបចំនួន ២៨២គ្រឿង ឈរលេខរៀងទី៣ ដែលមានមេដាយច្រើនជាងគេ និងឈរលេខរៀងទី៤ ដែលមានមេដាយមាសច្រើនជាងគេ»។ សម្តេចបានសរសេរថា «នេះជាសមិទ្ធិផលរបស់ប្រជាជាតិទាំងមូល ដែលប្រឹងងើបឈរឡើងក្នុងការកសាងជាតិ និយាយជារួម និងក្នុងវិស័យកីឡានិយាយដោយឡែក»។ ប្រទេសកម្ពុជាគិតត្រឹមថ្ងៃចុងក្រោយនេះ ទទួលបានមេដាយសរុប ២៨២គ្រឿង ក្នុងនោះ មេដាយមាសចំនួន ៨១គ្រឿង មេដាយប្រាក់ ចំនួន ៧៤គ្រឿង និងមេដាយសំរឹត ចំនួន ១២៧ គ្រឿង។