ព្រឹត្តិការណ៍កីឡាស៊ីហ្គេមលើកទី៣២ ដែលកម្ពុជានឹងត្រូវធ្វើជាម្ចាស់ផ្ទះជាលើកដំបូងនោះ គឺសល់រយៈពេល៥០ថ្ងៃទៅមុខទៀតប៉ុណ្ណោះ។ សម្តេចតេជោ ហ៊ុន សែន បានបញ្ជាក់ថា ការរាប់ថយក្រោយរយៈពេល១០០ថ្ងៃ បានកន្លងផុត៥០ថ្ងៃមកហើយ នៃការរៀបចំព្រឹត្តិការណ៍ ដែលកម្ពុជាទើបបានធ្វើជាម្ចាស់ផ្ទះលើកដំបូង ក្រោយការខកខាន៦៤ឆ្នាំកន្លងមកនេះ។ សម្តេចតេជោ ហ៊ុន សែន បានបញ្ជាក់ផងដែរថា ព្រះមហាក្សត្រខ្មែរទ្រង់នឹងប្រទាន «ព្រះអគ្គីកីឡាស៊ីហ្គេម» នៅមុខប្រាសាទអង្គរវត្តនៅថ្ងៃទី២១ ខែមីនា ឆ្នាំ២០២៣ ដែលនឹងដង្ហែចេញពីប្រាសាទអង្គរវត្ត កាត់តាមវង់តូច និងចូលមកក្រុងសៀមរាបដោយរក្សាទុកក្នុងវត្តរាជបូណ៌ បន្ទាប់មកនឹងដង្ហែចេញទៅកាន់បណ្តាប្រទេសនៅអាស៊ាន មុននឹងវិលត្រឡប់មកកម្ពុជាវិញ។ ព្រះមហាក្សត្រខ្មែរព្រះបាទសម្ដេចព្រះបរមនាថនរោត្តម សីហមុនី និងសម្តេចម៉ែបានយាងនិវត្តន៍កាន់មាតុប្រទេសវិញនារសៀលថ្ងៃទី១៦ ខែមីនា ឆ្នាំ២០២៣ បន្ទាប់ពីព្រះអង្គទាំងទ្វេ បានគង់សម្រាកពិនិត្យព្យាបាលព្រះរាជសុខភាពនៅរដ្ឋធានីប៉េកាំង សាធារណរដ្ឋប្រជាមានិតចិន អស់មួយរយៈពេលមក។

សម្តេចតេជោ ហ៊ុន សែន បានថ្លែងថ្កោលទោសការចោទប្រកាន់របស់អ្នកវិភាគមានទំនោរ នយោបាយប្រឆាំងម្នាក់ ជុំវិញករណីអគ្គិភ័យឆេះព្រះរាជដំណាក់តូច ក្នុងខេត្តសៀមរាប។ ក្រសួងព្រះបរមរាជវាំង បានចេញសេចក្តីថ្លែងការណ៍បញ្ជាក់ថា អគ្គិភ័យឆេះព្រះរាជដំណាក់តូច កាលពីរាត្រីថ្ងៃទី១២ មីនា ឆ្នាំ២០២៣ គឺដោយសារការឆ្លងចរន្តអគ្គិសនី។ ប៉ុន្តែអ្នកវិភាគនៅ ក្រៅប្រទេសម្នាក់ឈ្មោះ គឹម សុខ បាននិយាយចោទថាការឆេះនោះគឺជាការរៀបចំរបស់ គណបក្សប្រជាជនកម្ពុជា ដែលកាន់អំណាច។ សម្តេចតេជោ ហ៊ុន សែន ថ្លែងក្នុងប្រសាសន៍សំណេះសំណាល ក្នុងឱកាសចែកសញ្ញាបត្រជូននិស្សិតថ្ងៃទី១៦មីនានេះ បានថ្កោលទោស ជុំវិញសម្តីចោទប្រកាន់ដែលគ្មានការពិតនោះ។ ការឆេះព្រះរាជដំណាក់ មានរយៈពេលជាងមួយម៉ោង ប៉ុន្តែក្រោមការជួយធ្វើអន្តរាគមន៍ពីកម្លាំងសមត្ថកិច្ចជំនាញ, អគ្គិភ័យត្រូវគ្រប់គ្រងបានទាំងស្រុងនៅវេលាម៉ោងប្រមាណ១២យប់ ដោយប្រើប្រាស់រថយន្តពន្លត់អគ្គិភ័យចំនួនជិត១០គ្រឿង។

តួលេខឆ្លងថ្មីកូវីដ១៩ ក្នុងប្រទេសអាស៊ាន នៃរយៈពេល ២៤ម៉ោងចុងក្រោយនេះមានចំនួន ៥០៧ករណី ដែលបានកើនឡើងចំនួន ១៤២ករណី បើប្រៀបធៀបនឹងតួលេខឆ្លងកាលពីម្សិលមិញ។ ការឆ្លងក្នុងរយៈពេល ២៤ម៉ោងកន្លងមកនេះ បានកើតលើប្រទេសចំនួន៥ នៅអាស៊ានរួមមានប្រទេសឥណ្ឌូនេស៊ី, ហ្វីលីពីន, វៀតណាម, មីយ៉ាន់ម៉ា និងប្រទេសឡាវ ។ ប្រទេសឥណ្ឌូនេស៊ី គឺជាប្រទេសដែលមានតួលេខឆ្លងច្រើនជាងគេ ដែលមានចំនួន ៣៨០ ករណី។ តួលេខឆ្លងតិចជាងគេ គឺប្រទេសឡាវ ដែលមានចំនួនអ្នកឆ្លងតែ ១ករណី ប៉ុណ្ណោះ។ ប្រទេសម៉ាឡេស៊ី, ថៃ, កម្ពុជា, សឹង្ហបុរី និងប្រុយណេ គឺជាប្រទេសដែលគ្មានសេចក្តីរាយការណ៍ជុំវិញតួលេខឆ្លង និងស្លាប់ឡើយក្នុងរយៈពេល ២៤ម៉ោងចុងក្រោយនេះ ។ តួលេខស្លាប់ដោយសារកូវីដ១៩ ក្នុងប្រទេសអាស៊ានរយៈពេល ២៤ម៉ោងចុងក្រោយនេះមាន ចំនួន ១២នាក់ ដែលជាពលរដ្ឋនៃប្រទេសឥណ្ឌូនេស៊ី និងប្រទេសហ្វីលីពីន។ គិតសរុបរួមនៃប្រទេសទាំង១០ អាស៊ាននាពេលនេះ ការឆ្លងសរុបមានចំនួន ៣៥លាន ៦២ម៉ឺន ៣ពាន់ ៧២២ករណី, និងការស្លាប់សរុបមានចំនួន ៣៦ម៉ឺន ៦ពាន់ ៥០៣នាក់ ។…

កម្ពុជាមិនមានតួលេខអ្នកឆ្លងថ្មីកូវីដ១៩ ឡើយ ក្នុងរយៈពេល ២៤ម៉ោងចុងក្រោយនេះ ដែលនាំឲ្យការមិនមានការឆ្លងសោះមានរយៈពេល ៣ថ្ងៃ ជាប់គ្នាមកហើយ។ យោងតាមក្រសួងសុខាភិបាលកម្ពុជា ក្នុងរយៈពេលប្រមាណជាង ១ខែកន្លងមកនេះ ការឆ្លងមានការថយចុះ ដែលមានតួលេខឆ្លងប្រចាំថ្ងៃមានតិចតួចប៉ុណ្ណោះ និងគ្មានអ្នកឆ្លងសោះឡើយ ក្នុងរយៈពេល ៣ថ្ងៃចុងក្រោយនេះ។ កម្ពុជាបានចាប់ផ្តើមចាក់ដូសជំរុញទី៦ ចាប់តាំងពីដើមខែមករា ដែលរហូតមកទល់ពេលនេះ មានពលរដ្ឋទៅចាក់បានចំនួន ៣០ម៉ឺន ៩ពាន់ ៦៤៨នាក់ហើយ ។ ដោយឡែកតួលេខ នៃការចាក់វ៉ាក់សាំងដូសមូលដ្ឋានទូទាំងប្រទេសកម្ពុជាមានជិត ៩៦ភាគរយ។

UFO គឺជាពាក្យពេញនៃអក្សរ Unidentified Flying Object មានន័យថា វត្ថុហោះហើរដែលគេមិនស្គាល់អត្តសញ្ញាណ។ ពលរដ្ឋខ្មែរជាទូទៅស្គាល់ថា «ថាសហោះ»។ រឿង «ថាសហោះ» គឺជារឿងអាថ៌កំបាំងដែលមិនទាន់មានការ បកស្រាយណាមួយច្បាស់លាស់ពីក្រុមអ្នកវិទ្យាសាស្ត្រអាចបញ្ជាក់ថា តើមានប្រភពមកពីណា និងអ្នកណាជាអ្នកបង្កើតវានោះទេ។ រឿង UFO ថាសហោះនេះ នៅតែស្ថិតក្នុងការចង់ដឹងជានិច្ចពីប្រជាជនទូទៅ។ កម្មវិធីអប្សរាណិត មានសេចក្តីរាយការណ៍ពាក់ព័ន្ធនឹងរឿង UFO ថាសហោះនេះ ដែលមានខ្លឹមសារដូចតទៅនេះ

ខេត្តតាកែវ បានច្រានចោលព័ត៌មានដែលបណ្តាញសង្គមផ្សាយអំពីរឿងក្មេងទំនើង យកពូថៅគប់កញ្ចក់រថយន្ដ ដែលការផ្សាយនោះ ត្រូវរដ្ឋបាលខេត្តបញ្ជាក់ថា វាជារឿងចាស់មួយ ដែលមិនកើតឡើងក្នុងខេត្តតាកែវនោះទេ។ ខេត្តតាកែវតែងមានសេចក្តីរាយការណ៍អំពីរឿងក្មេងទំនើងដែលបង្កហេតុតាមផ្លូវរំខានដល់ពលរដ្ឋ និងអ្នកធ្វើដំណើរ។ ប៉ុន្តែការផ្សាយអំពីរឿង ក្មេងទំនើងគប់កញ្ចក់ឡាននោះ ត្រូវរដ្ឋបាលខេត្តបាននិយាយថាវាជារឿងដែលបានកើតឡើង នៅក្នុងខេត្តបាត់ដំបង គឺនៅភ្នំសំពៅ កាលពីថ្ងៃទី១០ វិច្ឆិកា ឆ្នាំ២០២២។ រដ្ឋបាលខេត្តបាននិយាយថាព័ត៌មានមិនពិតនោះត្រូវបាន «គេហទំព័រហ្វេសប៊ុកមួយចំនួនជាពិសេសគេហទំព័រហ្វេសប៊ុករបស់ក្រុមប្រឆាំងបានផ្សព្វផ្សាយ» និងថាការផ្សាយព័ត៌មានមិនពិតនោះបានធ្វើឱ្យ «ប៉ះពាល់យ៉ាងធ្ងន់ធ្ងរដល់កិច្ចខិតខំប្រឹងប្រែងបំពេញតួនាទីភារកិច្ចរបស់អាជ្ញាធរមូលដ្ឋាន និងកងកម្លាំងមានសមត្ថកិច្ច ជាពិសេសធ្វើឱ្យប្រជាពលរដ្ឋយល់ច្រឡំ និងបាត់បង់ជំនឿទុកចិត្តមកលើអាជ្ញាធរ»។ រដ្ឋបាលខេត្តបានព្រមានថាគេនឹងចាត់វិធានការផ្លូវច្បាប់យ៉ាងតឹងរ៉ឺងបំផុត ចំពោះជនណាដែលផ្សព្វផ្សាយព័ត៌មានមិនពិត មានចរឹតញុះញង់ និងបំភ្លៃខុសពីការពិតដែលនាំឱ្យប៉ះពាល់ដល់សន្តិសុខសណ្តាប់ធ្នាប់ក្នុងសង្គម។

មេខ្លោងឧទ្ទាម សម រង្ស៊ី បានប្រើសម្តីវាយប្រហារដល់បេក្ខជនអនាគតនាយករដ្ឋមន្ត្រីគណបក្សប្រជាជនកម្ពុជាថែមទៀតហើយ ដែលជាទង្វើ «លេលា» មួយដែលព្យាយាមចង់រារាំងបណ្ឌិត ហ៊ុន ម៉ាណែត មិនឱ្យក្លាយជាប្រមុខដឹកនាំរាជរដ្ឋាភិបាលសម្រាប់អនាគត។ គណបក្សប្រជាជនកម្ពុជាបានបោះឆ្នោតគាំទ្របណ្ឌិត ហ៊ុន ម៉ាណែត ជាបេក្ខភាព នៃអនាគតនាយករដ្ឋមន្ត្រី ដែលការបោះឆ្នោតគាំទ្រនោះ បានផ្អែកលើកត្តាសីលធម៌, សកម្មភាពការងារ, ចំណេះដឹងដ៏ខ្ពង់ខ្ពស់ និងកត្តាមួយចំនួនទៀត។ ប៉ុន្តែ សម រង្ស៊ី បានប្រើល្បិចកលគ្រប់សព្វបែបយ៉ាង ក្នុងបំណងចង់មួលបង្កាច់បង្ខូចកេរឈ្មោះ បេក្ខជនអនាគតនាយករដ្ឋមន្ត្រីគណបក្សប្រជាជនកម្ពុជា។ ការរកល្បិចដើម្បីវាយប្រហារចុងក្រោយនេះទៀត គឺទណ្ឌិត សម រង្ស៊ី នៅថ្ងៃទី១២ មីនា បានចោទថាការសិក្សាក្នុងសាលា West Point របស់បណ្ឌិត ហ៊ុន ម៉ាណែត គឺមិនបានពឹងលើសមត្ថភាពផ្ទាល់ខ្លួននោះទេ។ បណ្ឌិត ហ៊ុន ម៉ាណែត ថ្លែងក្នុងពិធីសម្ពោធសមិទ្ធផលយោធាមួយ ក្នុងខេត្តបាត់ដំបងកាលពីថ្ងៃទី១៤ មីនា ឆ្នាំ២០២៣ បានប្រតិកម្មជុំវិញសម្តីចោទប្រកាន់នោះ។ ទង្វើវាយប្រហាររបស់ទណ្ឌិត សម រង្ស៊ី ដាក់លើបណ្ឌិត ហ៊ុន ម៉ាណែត បានធ្វើជាច្រើនណាស់កន្លងមកនេះ ប៉ុន្តែកលល្បិចទាំងនោះតែងរងនឹងភាពបរាជ័យជាប់ជានិច្ច។

សម្តេចតេជោ ហ៊ុន សែន បានអញ្ជើញជាអធិបតីក្នុងពិធីបើកសន្និសីទជនមានពិការភាព ប្រចាំតំបន់អាស៊ីប៉ាស៊ីហ្វិក លើកទី៥ ឆ្នាំ២០២៣ នៅក្នុងរាជធានីភ្នំពេញ ដោយបានលើកឡើងនូវបញ្ហាប្រឈមធំៗរបស់ពិភពលោក។ សម្តេចបានថ្លែងថាការប្រកួតប្រជែងភូមិសាស្ត្រនយោបាយរបស់ប្រទេសមហាអំណាច គឺជាបញ្ហាដែលពិភពលោកកំពុងប្រឈម ដោយសារតែការប្រកួតប្រជែងនេះ បានបង្កផលប៉ះពាល់ដល់សណ្តាប់ធ្នាប់របស់ពិភពលោក និងប៉ះពាល់ដល់គោលការណ៍គោរពច្បាប់ជាសកលថែមទៀត។ អប្សរាណិតរាយការណ៍