អត្តពលិក និងប្រតិភូជាង៩ពាន់នាក់ បានចុះឈ្មោះចូលរួមប្រកួតកីឡា SEA GAMES 2023។ អគ្គលេខាធិការគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ និងអាស៊ានប៉ារ៉ាហ្គេម ឆ្នាំ២០២៣ លោក វ៉ាត់ ចំរើន បានថ្លែងបញ្ជាក់ថាចំនួនដែលបានចុះឈ្មោះចូលរួមនេះ គឺគិតត្រឹមថ្ងៃទី៩ ខែមីនា ឆ្នាំ២០២៣។ ក្នុងចំនួននេះលោកបានបញ្ជាក់ថា កីឡាករនិង កីឡាការិនីពី១១ ប្រទេសនៅអាស៊ាននេះ មានជិត៥ពាន់៥០០នាក់ ដែលនឹងត្រូវចូលរួមប្រកួតកីឡាស៊ីហ្គេម និងអាស៊ានប៉ារ៉ាហ្គេម ដែលកម្ពុជាធ្វើជាម្ចាស់ផ្ទះ។ លោក វ៉ាត់ ចំរើន បានបញ្ជាក់ថា កម្ពុជានៅមិនទាន់បិទប្រព័ន្ធចុះឈ្មោះទទួលកីឡាករនៅឡើយទេ និងរំពឹងថាកីឡាករ និងកីឡាការីនី ដែលនឹងរំពឹងចូលរួមប្រកួតនឹងមានច្រើនដល់៦ពាន់ទៅ៧ពាន់នាក់។ រាជរដ្ឋាភិបាលកម្ពុជា បានត្រៀមចំណាយថវិកាប្រមាណជាង ១០០លានដុល្លាអាមេរិក ដើម្បីរៀបចំព្រឹត្តិការណ៍កីឡាស៊ីហ្គេម និងអាស៊ានប៉ារ៉ាហ្គេម ដែលនឹងមកដល់ក្នុងរយៈពេល៥៧ថ្ងៃ ខាងមុខទៀតនេះ។

ព្រឹត្តិការណ៍កីឡាស៊ីហ្គេមលើកទី៣២ ដែលកម្ពុជានឹងត្រូវធ្វើជាម្ចាស់ផ្ទះជាលើកដំបូងនោះ គឺសល់រយៈពេល៥៧ថ្ងៃទៅមុខទៀតប៉ុណ្ណោះ។ ការរាប់ថយក្រោយរយៈពេល១០០ថ្ងៃ បានកន្លងផុត៤៣ថ្ងៃមកហើយ។ កម្ពុជាខកខានមិនបានធ្វើជាម្ចាស់ផ្ទះនៃកីឡាស៊ីហ្គេមនេះ ក្នុងអម្លុងពេល៦៤ឆ្នាំ ដោយសារតែស្ថានការណ៍វិវត្តន៍មិនទៀងទាត់កើតឡើងក្នុងប្រទេសកម្ពុជា ប៉ុន្តែនៅក្នុងខែឧសភា ឆ្នាំ២០២៣ ជិតមកដល់នេះ កម្ពុជាបានថ្លែងប្តេជ្ញាការធ្វើជាម្ចាស់ផ្ទះ នៃព្រឹត្តិការណ៍ស៊ីហ្គេមជាលើកដំបូង។ យោងតាមមន្ត្រីរៀបចំកីឡា ចាប់ពីថ្ងៃទី២៥ មេសា ឆ្នាំ២០២៣, កម្ពុជានឹងទទួលបានភ្ញៀវជាគណៈប្រតិភូក្នុងក្រុមកីឡាករដែលនឹងមកដល់ជាបណ្តើរៗ។ នៅថ្ងៃទី២៩មេសានឹងត្រូវចាប់ផ្តើមការប្រកួតបាល់ទាត់ និងរហូតដល់ថ្ងៃទី៥ឧសភាឆ្នាំ២០២៣ ពិធីប្រកាសដ៏ធំនៃការបើក ព្រឹត្តិការណ៍កីឡាស៊ីហ្គេម និងអាស៊ានប៉ារ៉ាហ្គេម នឹងចាប់ផ្តើម។ មុខកីឡាដែលនឹងត្រូវដាក់ ចេញប្រកួតទាំងអស់ ក្នុងកីឡាស៊ីហ្គេមដែលកម្ពុជានឹងត្រូវធ្វើជាម្ចាស់ផ្ទះ មានទាំងអស់ចំនួន ៣៧ប្រភេទកីឡា។

អគ្គមេបញ្ជាការរង និងជាមេបញ្ជាការកងទ័ពជើងគោក លោកឧត្តមសេនីយ៍ឯក ហ៊ុន ម៉ាណែត បានអញ្ជើញចូលរួមក្នុងពិធីប្រកាសតែងតាំងផ្លាស់ប្តូរមុខតំណែង ជូននាយទាហានកងពលតូចអន្តរាគមន៍លេខ១២៨ យោធភូមិភាគទី១ នាខេត្តស្ទឹងត្រែង និងបានមានប្រសាសន៍បញ្ជាក់លើភាពចាំបាច់នៃការធ្វើកំណែទម្រង់យោធា។ ថ្លែងក្នុងពិធីនៅថ្ងៃទី៩មីនាឆ្នាំ២០២៣ លោកឧត្តមសេនីយ៍មេបញ្ជាការកងទ័ពជើងគោកបានបញ្ជាក់ថា «កងទ័ពជើងគោកផ្ទាល់ រួមទាំងបណ្តាស្ថាប័ន-កងឯកភាពចំណុះ ចាំបាច់ត្រូវបន្ត ជំរុញនូវដំណើរការកែទម្រង់របស់ខ្លួន ដើម្បីឆ្លើយតបឱ្យមានប្រសិទ្ធិភាព និងដើរទាន់ការវិវត្ត នៃសភាពការណ៍ដែលបន្តប្រែប្រួលឥតឈប់ឈរ»។ ឧត្តមសេនីយ៍ឯក ហ៊ុន ម៉ាណែត បានថ្លែងថាកំណែទម្រង់យោធាគឺជា ”ការពង្រឹងប្រៀបការពារជាតិ ដែលជាកាតព្វកិច្ចស្របតាមរដ្ឋធម្មនុញ្ញ ដើម្បីពង្រឹងសមត្ថភាពកងទ័ពបម្រើឱ្យការបំពេញភារកិច្ចថែរក្សាសន្តិភាព ស្ថិរភាព សន្តិសុខ និងសណ្តាប់ធ្នាប់សាធារណៈ »។ លោកឧត្តមសេនីយ៍ឯក ហ៊ុន ម៉ាណែត បានថ្លែងកោតសរសើរ និងវាយតម្លៃខ្ពស់ចំពោះយោធភូមិភាគទី១, កងពលតូចអន្តរាគមន៍លេខ១២៨ ក៏ដូចជាគ្រប់បណ្តាស្ថាប័ន-កងឯកភាពចំណុះយោធភូមភាគទី១ ដែលបានខិតខំបំពេញភារកិច្ចក្នុងការការពារអធិបតេយ្យ បូរណភាពទឹកដី នៅតាមខ្សែបន្ទាត់ព្រំដែន ក្នុងភូមិសាស្ត្រទទួលខុសត្រូវរបស់ខ្លួន និងការបំពេញកិច្ចសហការជាមួយអាជ្ញាធរដែនដី និងស្ថាប័នពាក់ព័ន្ធគ្រប់លំដាប់ថ្នាក់ ក្នុងការ ថែរក្សាការពារសន្តិសុខសណ្តាប់ធ្នាប់សាធារណៈ និងសុវត្ថិភាព បានល្អប្រសើរជូនប្រជាជន ក្នុងរយៈកន្លងមកនេះ ទទួលបានលទ្ធផល និងស្នាដៃល្អប្រសើរ គួរជាទីមោទនៈ។ លោកឧត្តមសេនីយ៍មេបញ្ជាការបានផ្តល់អនុសាសន៍បីសម្រាប់ថ្នាក់ដឹកនាំក្នុងជួរបញ្ជាការ ដែលក្នុងនោះរួមមានទី១. រក្សាសមិទ្ធផលរបស់ថ្នាក់ដឹកនាំជំនាន់មុនដែលបានកសាង, ទី២.…

រាជធានីភ្នំពេញបានរៀបចំសន្និបាតបូកសរុបលទ្ធផលការងារឆ្នាំ២០២២ និងលើកទិសដៅការងារឆ្នាំ២០២៣ ជាមួយនឹងការពិនិត្យមើលចំណុចប្រឈមនានា និងទិសដៅសម្រាប់ការអភិវឌ្ឍថែមទៀត។ លោកអភិបាលរាជធានី ឃួង ស្រេង បានថ្លែងថាសម្រាប់ផែនការធំៗឆ្នាំ២០២៣ សាលារាជធានីនឹងត្រូវមានកិច្ចការជាច្រើន ដើម្បីដោះស្រាយចំពោះមុខ។ កិច្ចការទាំងនោះរួមមានបញ្ហាសំណល់, ដំណោះស្រាយទំនាស់ក្រៅប្រព័ន្ធតុលាការ ផ្ដោតសំខាន់លើបញ្ហាដីធ្លី, ការត្រៀមខ្លួនធ្វើជាម្ចាស់ផ្ទះ នៃព្រឹត្តិការស៊ីហ្គេម និងប៉ារ៉ាហ្គេម, បន្តអនុវត្តភូមិឃុំ មានសុវត្ថិភាព ឲ្យកាន់តែល្អប្រសើរ និងការងារគ្រោះមហន្តរាយ។រាជធានីភ្នំពេញ គឺបេះដូងសេដ្ឋកិច្ចជាតិដែលកន្លងមកនេះ បានរងប៉ះពាល់ដោយសារតែវិបត្តិកូវីដ១៩។ រាជធានីភ្នំពេញ ក្នុងរយៈពេលដែលពិភពលោកបានរងនឹងវិបត្តិឆ្លងកូវីដ១៩, ការធ្វើអាជីវកម្មបានធ្លាក់ចុះ, ដំណើរការរបស់ក្រុមហ៊ុនសំណង់ និងសហគ្រាសជាច្រើនបានបិទទ្វារ ដែលធ្វើឱ្យដំណើរការជំរុញការអភិវឌ្ឍ បានស្ថិតទ្រឹងមួយកន្លែង ប៉ុន្តែក្រោមនយោបាយចាក់វ៉ាក់សាំងស្រោចស្រពទូទាំងប្រទេស របស់សម្តេចតេជោ ហ៊ុន សែន កម្ពុជាបានបើកប្រទេសរបស់ខ្លួនសាឡើងវិញ នៅដើមខែវិច្ឆិកា ឆ្នាំ២០២១។ លោកអភិបាលរាជធានីភ្នំពេញបានថ្លែងថា កាលពីឆ្នាំ២០២២ សាលារាជធានី បានទទួលការស្នើសុំក្នុងការសាងសង់នូវគម្រោងជាង ១ពាន់ ១០០ គម្រោងក្នុងទំហំទុនប្រមាណជាង ៦០៥លានដុល្លារអាមេរិក។ លោក ឃួង ស្រេង បានថ្លែងថាបច្ចុប្បន្នក្នុងរាជធានី មានរោងចក្រ សហគ្រាស ជាង៦ពាន់កន្លែង ដែលជួយផ្ដល់ការងារ ជាង៥១ម៉ឺនកន្លែង និងសរុបតម្លៃផលិតផលមានជាង២ពាន់លានដុល្លារអាមេរិក ។…

ពិធីបីនារីយករង្វាន់ដើម្បីអបអរទិវាសិទ្ធិនារីអន្តរជាតិ៨មីនា បានរកឃើញអ្នកឈ្នះពិតប្រាកដរបស់ខ្លួន ដែលអាចទ្រាំទ្របីស្ត្រីជាទីស្រឡាញ់រហូតដល់រយៈពេលជាង៨ម៉ោង។ ពិធីបីនារី យករង្វាន់នេះ គឺជាល្បែងកំសាន្តលើកដំបូង ដែលគេទើបប្រទះឃើញក្នុងប្រទេសកម្ពុជា ក្រោមការរៀបចំរបស់ក្រុមហ៊ុន Boostrong ប្រព្រឹត្តទៅនៅក្នុងបរិវេណមជ្ឈមណ្ឌលកោះពេជ្រ។ យោងតាមអ្នករៀបចំការប្រកួត, មនុស្សដែលចូលរួមមានចំនួនប្រមាណ៥០០គូ ដែលគេតម្រូវឱ្យបុរសត្រូវបីស្ត្រី ជាភរិយាឬជាម្តាយ, ឬជាសង្សារណាដែលទ្រាំទ្រយូរជាងគេបំផុត ដើម្បីទទួលបាននូវពានរង្វាន់លេខ១, លេខ២ និងលេខជាបន្តបន្ទាប់។ យោងតាមលក្ខខណ្ឌការបីត្រូវឈរស្ងៀមមួយកន្លែងដោយមិនឱ្យកម្រើកខ្លួន និងមិនឱ្យរង្គើខ្លួនឡើយ។ តាមរយៈការចាប់ផ្តើមប្រកួតដែលមានតាំងពីម៉ោង៥ល្ងាចនោះមក, ក្នុងរង្វង់៥០០គូនោះ គឺមានគូចំនួន២តែប៉ុណ្ណោះ ដែលអាចទ្រាំយូរជាងគេដល់រយៈពេលជាង៨ម៉ោង។ គូដែលឈ្នះ ក្នុងរង្វាន់ទី១នោះ ឈ្មោះ យិន សំអុល ដែលមានដើមកំណើតពីខេត្តតាកែវ ដែលអាចទ្រាំទ្របី ដៃគូជាទីស្រឡាញ់របស់ខ្លួនមានរយៈពេល៨ម៉ោង១៧នាទី។ ចំណែកអ្នកឈ្នះទី២ឈ្មោះ ព្រំ សំណាង មកពីខេត្តកំពង់ស្ពឺ។ ព្រំសំណាង គឺជាកីឡាករប្រដាល់ល្បីល្បាញម្នាក់ដែលកំពុង មានប្រជាប្រីយ៍ភាពក្នុងប្រទេសកម្ពុជា។

សកម្មជនអតីតគណបក្សសង្គ្រោះជាតិ ១៦នាក់ ដែលជាខ្មែរកម្ពុជាក្រោម បានប្រកាសផ្តាច់ខ្លួន និងចូលរួមជីវភាពនយោបាយជាមួយគណបក្សប្រជាជនកម្ពុជា។ ប្រធានសមាគមសប្បុរសធម៌ខ្មែរកម្ពុជាក្រោមលោក សឿង សុធានី ត្រូវបានគេដកស្រង់សម្តី ដែលបានថ្លែងនៅថ្ងៃទី៩មីនាថា ការចូលជាសមាជិកគណបក្សប្រជាជនកម្ពុជា គឺដោយសារមានការជឿជាក់លើគណបក្សប្រជាជនកម្ពុជា ក្រោមការដឹកនាំប្រកបដោយគតិបណ្ឌិត របស់សម្ដេចតេជោ ហ៊ុន សែន ដែលធ្វើឲ្យប្រទេសជាតិមានសុខសន្តិភាព និងការរីកចម្រើន លើគ្រប់វិស័យ។ លោក សឿង សុធានី បានជូនដំណឹងថា នៅមានសកម្មជនអតីតគណបក្សសង្គ្រោះជាតិជាង១០០នាក់ថែមទៀត ដែលកំពុងរស់នៅកម្ពុជាក្រោម ដែលគ្រោងនឹងដាក់ពាក្យស្នើសុំចូលរួមជីវភាពជាមួយនឹងគណបក្សប្រជាជនកម្ពុជា ដោយសារតែពួកគេអស់ជំនឿ លើគណបក្សប្រឆាំង។ អតីតគណបក្សសង្គ្រោះជាតិ ត្រូវគេរាយការណ៍ថាដើម្បីប្រមែប្រមូលរកអ្នកគាំទ្រពីខ្មែរកម្ពុជាក្រោម បានសន្យាពូកគេថា នៅពេលដែលបានកាន់អំណាចនឹងរកលទ្ធភាពជួយតវ៉ាយកទឹកដីកម្ពុជាក្រោមឱ្យក្លាយជាទឹកដីរបស់ប្រទេសកម្ពុជាវិញ ដែលសម្តីកុហកនេះហើយ ជារឿយៗបានធ្វើឱ្យខ្មែរកម្ពុជាក្រោមខ្លះ បានលង់នឹងការជឿលើការឃោសនាអកុសលនេះ។

រដ្ឋមន្ត្រីក្រសួងសាធារណការ និងដឹកជញ្ជូន និងរដ្ឋមន្ត្រីក្រសួងបរិស្ថាន បានយល់ព្រមជាមួយគ្នាលើការកសាងផ្លូវ និងស្ពានតភ្ជាប់កំពង់ឆ្នាំង និងកំពង់ធំប្រវែង៥៨គីឡូម៉ែត្រ។ តម្លៃនៃការសាងសង់នោះ នឹងគ្រោងក្នុងទំហំ២៥០លានដុល្លារ និងការសាងសង់នឹងកំណត់ចាប់ផ្តើមក្នុងឆ្នាំ២០២៤។ ក្នុងដំណើររួមគ្នាមួយចុះពិនិត្យទីតាំងធ្វើផ្លូវនិងស្ពានឆ្លងទន្លេតភ្ជាប់ពី ខេត្តកំពង់ឆ្នាំង និងខេត្តកំពង់ធំនោះ, លោករដ្ឋមន្ត្រី ស៊ុន ចាន់ថុល និងលោករដ្ឋមន្ត្រី សាយ សំអាល់ នៅថ្ងៃទី៩មីនានេះ បានបញ្ជាក់ប្រាប់អ្នកសារព័ត៌មាននូវគម្រោងដែលត្រូវសាងសង់នោះ។ យោងតាមគម្រោង, ស្ពានដ៏វែងមួយប្រវែង៣ពាន់៣០០ម៉ែត្រនឹងត្រូវកសាងឆ្លងកាត់ទន្លេ និងមានកសាងស្ពានដទៃទៀតប្រមាណចំនួន៥ និងមានដាក់លូចំនួន១០០លូ ដើម្បីជាច្រកផ្លូវសម្រាប់សត្វត្រីធ្វើដំណើរចេញចូលផងទៀត។ កម្ពុជាក្នុងសម័យដឹកនាំសម្តេចតេជោ ហ៊ុន សែន ការកសាងផ្លូវ, ស្ពានដើម្បីសម្រួលការធ្វើដំណើរ និងដឹកជញ្ជូនគឺជាកត្តាអាទិភាពមួយ។ កម្ពុជាមិនមានឆ្នាំណាដែលទំនេរក្នុងការកសាង និងអភិវឌ្ឍន៍សមិទ្ធផលរបស់ខ្លួនឡើយ។ ក្នុងគម្រោងកសាងដែលបានដាក់ចេញនាពេលខាងមុខនេះ ក្រសួងសាធារណការបានឱ្យដឹងនូវគម្រោងធ្វើផ្លូវល្បឿនលឿនចំនួន២ថែមទៀត គឺផ្លូវល្បឿនលឿនភ្នំពេញបាវិត ដែលគ្រោងនឹងបើកការដ្ឋានសាងសង់ក្នុងឆ្នាំ២០២៣, ផ្លូវល្បឿនលឿនភ្នំពេញសៀមរាប និងការកសាង «ស្ពានមិត្តភាពកម្ពុជា សាធារណរដ្ឋកូរ៉េ» ឆ្លងកាត់ទន្លេពីផ្សារចាស់ទៅជ្រោយចង្វារ និងពីជ្រោយចង្វារទៅអរិយក្សត្រ និងស្ពាននេះ គ្រោងនឹងចាប់ផ្តើមបុកគ្រឹះសាងសង់ នៅចុងឆ្នាំ២០២៣នេះ។

ពិធីបុណ្យទន្លេខេត្តកំពង់ធំ បានឈានចូលដល់ថ្ងៃទី២នៅថ្ងៃទី៩មីនាឆ្នាំ២០២៣។ ពិធីបុណ្យទន្លេនៅថ្ងៃនេះ មានការអញ្ជើញចូលរួមពីសម្តេចតេជោ ហ៊ុន សែន ផងដែរ។ អប្សរាណិតរាយការណ៍

សមយុទ្ធនាគមាសរួមគ្នារវាងកងទ័ពកម្ពុជា និងកងទ័ពរំដោះប្រជាជនចិន បានកំណត់ពេលវេលាហើយ ដែលនឹងមានរយៈពេល២សប្តាហ៍។ អ្នកនាំពាក្យអគ្គបញ្ជាការដ្ឋានកងយោធពលខេមរភូមិន្ទលោកឧត្តមសេនីយ៍ទោ ថោងសូលីម៉ូ បានថ្លែងថាសមយុទ្ធនាគមាសនឹងមានរវាងពីថ្ងៃទី២៣ ខែមីនារហូតដល់ថ្ងៃទី៥ ខែមេសា ឆ្នាំ២០២៣ នៅមជ្ឃមណ្ឌលហ្វឹកហ្វឺនរបស់កងរាជអាវុធហត្ថតំបន់ភ្នំជុំរីករាយ ដែលស្ថិតនៅក្នុងភូមិសាស្ត្រ ឃុំពាម ស្រុកសាមគ្គីមានជ័យ ខេត្តកំពង់ឆ្នាំង។ មន្ត្រីនាំពាក្យដដែលបានប្រាប់អ្នកសារព័ត៌មានកាលពីថ្ងៃទី៨មីនាថា «សមយុទ្ធនេះ គឺជាការផ្សារភ្ជាប់កិច្ចសហប្រតិបត្តិការរវាងកងទ័ពប្រទេសទាំងពីរក្នុងការលើកកម្ពស់ទំនាក់ទំនងល្អ បង្កើនចំណងសាមគ្គីភាព មេត្រីភាព ការបណ្ដុះបណ្តាលចំណេះដឹង, ចំណេះធ្វើ, ការផ្លាស់ប្ដូរបទពិសោធន៍, ការចេះសម្របសម្រួល ចេះរស់នៅនិងធ្វើការងាររួមគ្នា ជាមួយជាតិសាសន៍ជាច្រើនក្នុងពេលធ្វើប្រតិបត្តិការរួមគ្នា ក៏ដូចជាឆ្លើយតប ទៅនឹងបញ្ហាប្រឈមនានាដែលមិនមែនជាប្រពៃណីជាដើម។ ពិធីបើកសមយុទ្ធនឹងប្រព្រឹត្តទៅក្រោមអធិបតីភាពលោកឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទ និងជាមេបញ្ជាការកងទ័ពជើងគោក។ លំហាត់សមយុទ្ធដែលនឹងមកដល់ថ្ងៃទី២៣មីនា គឺក្នុងដំណាក់កាលដែលកម្ពុជាកំពុងសម្រួចការហ្វឹកហ្វឺនយុទ្ធសាស្ត្រ ក្នុងសម័យបច្ចេកវិទ្យាថ្មី ដើម្បីកាន់តែបង្កើនឡើងថែមទៀត នូវសមត្ថភាពការពារជាតិរបស់ខ្លួន ខណៈដែលពិភពលោកបានវិវត្តន៍រីកចម្រើនយ៉ាងលឿន លើកត្តាបច្ចេកវិទ្យា។ កងកម្លាំងរបស់កម្ពុជា និងកងទ័ពរំដោះប្រជាជនចិន បានធ្វើសមយុទ្ធនាគមាសរួមគ្នានេះបានចំនួន ៤លើករួចមកហើយ គឺនៅក្នុងឆ្នាំ២០១៦, ឆ្នាំ២០១៨, ឆ្នា២០១៩ និងឆ្នាំ២០២០ ។ សមយុទ្ធនាគមាសដែលជិតមកដល់នេះ គឺជាសមយុទ្ធនាគមាសលើកទី៥។

កិច្ចសម្ភាសន៍របស់កូនស្រី កឹម សុខា គឺនាង កឹម មនោវិទ្យា ជាមួយវិទ្យុ ABC អូស្ត្រាលី បានបង្ហាញនូវចំណេះដឹងនយោបាយមួយដែលនៅមានកម្រិត។ កិច្ចសម្ភាសន៍នោះពាក់ព័ន្ធនឹងការកាត់ទោសរបស់តុលាការកម្ពុជា ដែលដាក់គុកចំនួន២៧ឆ្នាំ លើរូបលោក កឹម សុខា។ អប្សរាណិតបានទទួលលិខិតមួយរបស់មិត្តអ្នកអាន ដែលធ្វើប្រតិកម្មលើសម្តីរបស់នាង កឹម មនោវិទ្យា ជាមួយនឹងអ្នកយកព័ត៌មាន ABC អូស្ត្រាលីគឺលោកស្រី Rachel Mealy ក្នុងសប្តាហ៍នេះ