តួលេខឆ្លងថ្មីកូវីដ១៩ ក្នុងប្រទេសអាស៊ាននៃរយៈពេល ២៤ម៉ោងចុងក្រោយនេះ បានបន្តកើនឡើងវិញចំនួន១៩៨ករណីថែមទៀត បើប្រៀបធៀបនឹងតួលេខឆ្លងកាលពីម្សិលមិញ។ តួលេខឆ្លងថ្មីកូវីដ១៩ នៅអាស៊ានថ្ងៃនេះមានចំនួន១ពាន់ ៣៦៤ករណី។ ការឆ្លងក្នុងរយៈពេល ២៤ ម៉ោងកន្លងមកនេះ បានកើតលើប្រទេសចំនួន៧ នៅអាស៊ាន រួមមានប្រទេសឥណ្ឌូនេស៊ី, ម៉ាឡេស៊ី, វៀតណាម, ឡាវ, មីយ៉ាន់ម៉ា, ប្រុយណេ និងប្រទេសហ្វីលីពីន ។ ប្រទេសឥណ្ឌូនេស៊ី គឺជាប្រទេស ដែលមានតួលេខឆ្លងច្រើនជាងគេ ដែលមានចំនួន ២៧៨ ករណី ។ តួលេខឆ្លងតិចជាងគេ គឺប្រទេសមីយ៉ាន់ម៉ា ដែលមានចំនួនអ្នកឆ្លងចំនួន ១០ករណី ។ ប្រទេសថៃ កម្ពុជា និងប្រទេសឡាវ គឺជាប្រទេសដែលគ្មានសេចក្តីរាយការណ៍ជុំវិញតួលេខឆ្លង និងស្លាប់ឡើយ ក្នុងរយៈពេល ២៤ម៉ោងចុងក្រោយនេះ។ តួលេខស្លាប់ដោយសារកូវីដ១៩ ក្នុងប្រទេសអាស៊ានរយៈពេល ២៤ម៉ោងចុងក្រោយនេះ មានចំនួន ១៧នាក់ ដែលជាពលរដ្ឋនៃប្រទេសឥណ្ឌូនេស៊ី, ម៉ាឡេស៊ី និងប្រទេសហ្វីលីពីន ។ គិតសរុបរួមនៃប្រទេសទាំង១០ អាស៊ាននាពេលនេះ ការឆ្លងសរុបមានចំនួន ៣៥លាន ៦១ម៉ឺន ១ពាន់…

រយៈពេល២៤ម៉ោងចុងក្រោយនេះ កម្ពុជាមិនមានតួលេខអ្នកឆ្លងថ្មីកូវីដ១៩ ឡើយ។ យោងតាមក្រសួងសុខាភិបាលកម្ពុជា ក្នុងរយៈពេលប្រមាណ ១ខែកន្លងមកនេះ ការឆ្លងមានការថយចុះ ដែលមានតួលេខឆ្លងប្រចាំថ្ងៃមានតិចតួចប៉ុណ្ណោះ និងគ្មានអ្នកឆ្លងសោះឡើយនៅ ថ្ងៃទី៣ មីនានេះ។ កម្ពុជាបានចាប់ផ្តើមចាក់ដូសជំរុញទី៦ ចាប់តាំងពីដើមខែមករា ដែលរហូតមកទល់ពេលនេះ មានពលរដ្ឋទៅចាក់បានចំនួន ២៨ម៉ឺន ១ពាន់ ៧៨៦នាក់ហើយ។ កម្ពុជាបច្ចុប្បន្នកំពុងរៀនរស់នៅជាមួយនឹងជម្ងឺកូវីដ១៩ ខណៈដែលការចាក់វ៉ាក់សាំងដូសមូលដ្ឋានទូទាំងប្រទេសមាន ប្រមាណជាង ៩៥ភាគរយរួចមកនេះ។

កម្ពុជាកាន់តែពង្រីកភាពសុខដុមនីយកម្មលើវិស័យសាសនាក្នុងសម័យដឹកនាំរបស់សម្តេចតេជោ ហ៊ុន សែន ដែលមានសន្តិភាព។ វត្តមហារាជវរារាម ហៅវត្តស្លែង ដែលទើបបានសាងសង់សង់រយៈកាល៣១ឆ្នាំក្នុងឃុំជីបាល, ស្រុកស្រីសន្ធរខេត្តកំពង់ចាម បានធ្វើពិធីបញ្ចុះខ័ណ្ឌសីមាសម្ពោធឆ្លង ក្រោមអធិបតីភាពបណ្ឌិត ស៊ាង ប៊ុនលាង និងលោកជំទាវ ហ៊ុន ប៊ុនធឿន ក្នុងសម័យរីកចំរើនវិស័យសាសនានៃសតវត្សទី២១។ សូមទស្សនាសេចក្តីរាយការណ៍

ប្រទេសអ្នកមានចំនួន២០លើសកលលោកបានជួបគ្នានៅក្រុង New Delhi ប្រទេសឥណ្ឌា ក្នុងកិច្ចប្រជុំ G20 ប៉ុន្តែការជួបជុំស្វែងរកកិច្ចសហប្រតិបត្តិការគ្នា បានរងនូវភាពអាប់អួរដោយសារការមិនចុះសម្រុងនឹងបញ្ហាសង្គ្រាមក្នុងប្រទេសអ៊ុយក្រែន។ កិច្ចប្រជុំ G20 បានបញ្ចប់នៅថ្ងៃទី២ មីនា ឆ្នាំ២០២៣ ដោយមិនមានការចេញសេចក្តីថ្លែងការណ៍រួមណាមួយឡើយ។ លោក ម៉ារ យ៉ារិទ្ធិ រាយការណ៍ពិនិត្យស្ថានការណ៍នេះ

ព្រឹត្តិការណ៍កីឡាស៊ីហ្គេមលើកទី៣២ ដែលកម្ពុជានឹងត្រូវធ្វើជាម្ចាស់ផ្ទះជាលើកដំបូងនោះ គឺសល់រយៈពេល៦៣ថ្ងៃទៅមុខទៀតប៉ុណ្ណោះ។ ការរាប់ថយក្រោយរយៈពេល១០០ថ្ងៃ បានកន្លងផុត៣៧ថ្ងៃមកហើយ។ គេហទំព័ររបស់សម្តេចតេជោ ហ៊ុន សែន បានសរសេរថា «ថ្ងៃទី៣ ខែមីនា ឆ្នាំ២០២៣នេះ គឺនៅសល់តែ៦៣ថ្ងៃទៀតប៉ុណ្ណោះ នឹងឈានដល់ព្រឹត្តិការណ៍ស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២ ដែលកម្ពុជានឹងធ្វើជាម្ចាស់ផ្ទះក្នុងឆ្នាំ២០២៣នេះ»។ កម្ពុជាខកខានមិនបានធ្វើជាម្ចាស់ផ្ទះ នៃកីឡាស៊ីហ្គេមនេះក្នុងអម្លុងពេល៦៤ឆ្នាំ ដោយសារតែស្ថានការណ៍វិវត្តន៍មិនទៀងទាត់កើតឡើងក្នុងប្រទេសកម្ពុជា។ ក្រោយប្រទេសកម្ពុជា ចាប់ផ្តើមមានសន្តិភាពសាឡើងវិញក្រោមនយោបាយឈ្នះឈ្នះ ដាក់ចេញដោយសម្តេចតេជោ ហ៊ុន សែន នោះមក, កម្ពុជាក៏នៅមិនទាន់បំពេញកាតព្វកិច្ចរបស់ខ្លួនក្នុងការរៀបចំព្រឹត្តិការណ៍ ប្រកួតកីឡាជាអន្តរជាតិក្នុងតំបន់នោះផងដែរ ប៉ុន្តែនៅក្នុងខែឧសភា ឆ្នាំ២០២៣ ជិតមកដល់នេះ កម្ពុជាបានបញ្ជាក់ការប្តេជ្ញាត្រៀមរៀបចំខ្លួនរួចរាល់ជាស្រេច ក្នុងការធ្វើជាម្ចាស់ផ្ទះ នៃព្រឹត្តិការណ៍ស៊ីហ្គេមជាលើកដំបូង។

បណ្ឌិត ហ៊ុន ម៉ាណែត បានថ្លែងថាភាពមិនរើសអើង នៃវិស័យសាសនា គឺជាផ្នែកសំខាន់មួយនៃ «ការធ្វើឱ្យសម្រេចបានការផ្សះផ្សាររួបរួមជាតិខ្មែរ» ដែលប្រសាសន៍នេះបានធ្វើឡើងក្នុងពិធីសម្ពោធសមិទ្ធផលវិស័យសាសនាក្នុងមជ្ឈមណ្ឌលវិបស្សនាធុរៈភូមិភាគឦសាននៃកម្ពុជា នៅក្នុងខេត្តព្រះវិហារនាថ្ងៃទី០៣ ខែមីនា ឆ្នាំ២០២៣។ បណ្ឌិត ហ៊ុន ម៉ាណែត តំណាងដ៏ខ្ពង់ខ្ពស់ របស់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិតក្នុងពិធីសម្ពោធឆ្លងអគារសាលារៀន អគារសាលាវិបស្សនា និងសមិទ្ធផលនានា ក្នុងវត្តព្រះបរមរាជមហាពោធិបញ្ចសហស្សារាម និងបញ្ចុះបឋមសិលាសាងសង់អគារចិញ្ចឹម និងថែទាំមនុស្សចាស់ជរា បានថ្លែងថា «សម្តេចតេជោតែងបានប្រកាន់ខ្ជាប់នូវការខិតខំកសាងអំពើបុណ្យជាមួយប្រជាពលរដ្ឋខ្មែរ… និងមិនមានការរើសអើងដែលនេះ គឺជាមូលដ្ឋានចម្បង ក្នុងការសម្រេចបាននូវការផ្សះផ្សាររួបរួមជាតិខ្មែរ រហូតឈានមកដល់ការបញ្ចប់សង្រ្គាមស៊ីវិលទាំងស្រុង នៅលើទឹកដីអង្គរដ៏បវររបស់កម្ពុជា»។ បណ្ឌិត ហ៊ុន ម៉ាណែត បានថ្លែងអបអរសាទរចំពោះសមិទ្ធផលដែលកើតមាន នៅក្នុងទីអារាមទើបមានអាយុកាលប្រមាណជាង ០៦ ឆ្នាំនេះ និងថ្លែងកោតសរសើរ ចំពោះចក្ខុវិស័យវែងឆ្ងាយ របស់ព្រះចៅអធិការវត្ត ដែលបានផ្តួចផ្តើមប្រកបដោយភាពច្នៃប្រឌិតក្នុងការកសាង សមិទ្ធផលទាំងអស់នេះឱុ្យចេញជារូបរាងទ្បើង។ លោកបានបញ្ជាក់ថា «វឌ្ឍនភាពនេះ មិនអាចកាត់ផ្តាច់បានឡើងពីបរិយាកាសគ្របដណ្តប់ នៃកត្តាសុខសន្តិភាពពេញលេញ នៅទូទាំងប្រទេស ដែលជាបច្ច័យដ៏មានតម្លៃមហាសាលនាំឱ្យមានអ្វីៗគ្រប់យ៉ាងដូចថ្ងៃនេះ»។ លោកនៅបានថ្លែងទៀតថាគណបក្សប្រជាជនកម្ពុជា ជាគណបក្សដែលបានកសាងសមិទ្ធផលលេចធ្លោច្រើនសន្ធឹកសន្ធាប់ ក្នុងការបម្រើជាតិ និងប្រជាជន ក្នុងអតីតកាល និងបន្តរហូតមកដល់បច្ចុប្បន្ន…

គណៈកម្មាធិការជាតិអូឡាំពិកកម្ពុជានៅថ្ងៃទី៣ ខែមីនា ឆ្នាំ ២០២៣នេះ បានចេញសេចក្តីប្រកាសប្រាប់សហព័ន្ធកីឡាជាតិ កីឡាករ កីឡាការិនី ទូទាំងប្រទេសនូវការទទួលព្យាបាល ដោយឥតគិតថ្លៃនៅមន្ទីរពេទ្យតេជោសន្តិភាព ចំពោះកីឡាករណាដែលរងរបួសឬមានបញ្ហាសុខភាពដោយសារការប្រកួត។ មន្ទីរពេទ្យតេជោសន្តិភាព មានទីតាំងនៅភូមិបឹងតាមោក សង្កាត់គោករកា ខណ្ឌព្រែកព្នៅ រាជធានីភ្នំពេញ។ ការប្រកាសរបស់គណៈកម្មាធិការជាតិអូឡាំពិកកម្ពុជានេះ បានធ្វើឡើងបន្ទាប់ពីការប្រកាសរបស់សម្តេចតេជោ ហ៊ុន សែន ថ្ងៃទី១៥ ខែកុម្ភៈ ឆ្នាំ២០២៣ ដែលបង្ហាញនូវការឈឺឆ្អាលចំពោះក្រុមកីឡាករខ្មែរ និងសម្តេចបានស្នើឱ្យក្រសួងសុខាភិបាលរៀបចំគ្រែបំរុងប្រមាណពី១០០ ទៅ២០០គ្រែ ដើម្បីសម្រាប់ព្យាបាលក្រុមកីឡាករដោយឥតគិតថ្លៃ។

តុលាការរាជធានី បានប្រកាសសាលក្រមផ្តន្ទាទោសលោក កឹម សុខា ចំនួន២៧ឆ្នាំ ក្នុងសំណុំរឿងក្បត់ជាតិ។ សាលក្រមចោទប្រកាន់ពីបទសន្ទិដ្ឋិភាព ចុះថ្ងៃទី៣ មីនា ឆ្នាំ២០២៣ បានដកហូតសិទ្ធិឈរឈ្មោះឲ្យគេបោះឆ្នោត និងសិទ្ធិធ្វើនយោបាយយោងតាមបញ្ញត្តិមាត្រា៤៥០ នៃក្រមព្រហ្មទណ្ឌ ប៉ុន្តែបានអនុញ្ញាតឲ្យលោកស្ថិតនៅផ្ទះ ដោយមិនឲ្យទាក់ទងមនុស្សគ្រប់រូប លើកលែងតែរង្វង់ក្រុមគ្រួសារ។ អប្សរាណិតមានបទអត្ថាធិប្បាយមួយថ្ងៃនេះក្រោមចំណងជើងថា «សាលក្រមផ្តន្ទាទោស កឹម សុខា បានផ្តល់យុត្តិធម៌ និងភាពសុខសាន្តសម្រាប់ប្រជាជនកម្ពុជា»។

ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃសម្តេចក្រឡាហោម ស ខេង កំពុងបំពេញទស្សនកិច្ច៣ថ្ងៃ ក្នុងប្រទេសវៀតណាម ដែលនឹងធ្វើការចុះហត្ថលេខាលើផែនការសហប្រតិបត្តិការឆ្នាំ២០២៣រវាងប្រទេសទាំងពីរ។ ដំណើរបំពេញទស្សនកិច្ចរបស់សម្តេចក្រឡាហោម ក្នុងរដ្ឋធានីហាណូយ បានចាប់ផ្តើមនៅថ្ងៃទី៣មីនានេះ នឹងបញ្ចប់ដល់ថ្ងៃទី៥មីនា តបតាមការអញ្ជើញរបស់រដ្ឋមន្ត្រីក្រសួងនគរបាល នៃសាធារណរដ្ឋសង្គមនិយមវៀតណាម លោកឧត្តមសេនីយ៍ឯក តូ ឡឹម។ មន្ត្រីរាជរដ្ឋាភិបាលបានថ្លែងថាដំណើរទស្សនកិច្ចនេះ គឺជាការបន្តអនុវត្តយន្តការសហប្រតិបត្តិការទ្វេភាគីប្រចាំឆ្នាំរវាងក្រសួងមហាផ្ទៃ នៃព្រះរាជាណាចក្រកម្ពុជា ជាមួយក្រសួងនគរបាល នៃសាធារណរដ្ឋសង្គមនិយមវៀតណាម ដោយរដ្ឋមន្ត្រីក្រសួងមហាផ្ទៃ នៃប្រទេសទាំង២ ធ្វើជាសហប្រធានដឹកនាំកិច្ចប្រជុំពិនិត្យវាយតម្លៃលទ្ធផល កិច្ចសហប្រតិបត្តិការឆ្នាំ២០២២ និងចុះហត្ថលេខាលើផែនការសហប្រតិបត្តិការឆ្នាំ២០២៣ សម្រាប់អនុវត្តបន្តក្នុងក្របខ័ណ្ឌ នៃកិច្ចសហប្រតិបត្តិការទ្វេភាគីរវាងក្រសួងទាំងពីរប្រទេស៕