រាជរដ្ឋាភិបាលបានចេញអនុក្រឹត្យមួយដែលមានប្រយោជន៍ក្នុងការផ្ទៀងផ្ទាត់ឯកសារបញ្ចៀសការក្លែងបន្លំ។ អនុក្រឹត្យចុះថ្ងៃទី៣មីនារៀបចំដោយក្រសួងប្រៃសណីយ៍ និងទូរគមនាគមន៍ និងទទួលបានការឯកភាពពីសម្តេចតេជោ ហ៊ុន សែន បានដាក់ឱ្យប្រើប្រាស់ថ្នាលផ្ទៀងផ្ទាត់ឯកសារ Verify.Gov.KH ដែលតាមរយៈនេះ គេនឹងអាចដឹងថាតើឯកសារណាត្រឹមត្រូវ និងឯកសារណាក្លែងក្លាយ។ អនុក្រឹត្យនេះ បានធ្វើឡើងបន្ទាប់ពីមានឯកសារមួយចំនួន របស់រាជរដ្ឋាភិបាលធ្លាប់ត្រូវបានគេក្លែងបន្លំ និងពិបាកដឹងថាតើឯកសារណាពិត និងឯកសារណាក្លែងក្លាយនោះទេ ប៉ុន្តែការប្រើប្រាស់ថ្នាលផ្ទៀងផ្ទាត់ឯកសារ Verify.Gov.KH នឹងអាចជួយបំបាត់ការក្លែងបន្លំនោះ។ មាត្រាមួយនៃអនុក្រឹត្យបានសរសេរថា «ត្រូវបានដាក់ឱ្យប្រើថ្នាលផ្ទៀងផ្ទាត់ឯកសារ Verify.Gov.KH របស់រាជរដ្ឋាភិបាលដែលអភិវឌ្ឍន៍ដោយក្រសួងប្រៃសណីយ៍ និងទូរគមនាគមន៍ ក្នុងគោលបំណងលុបបំបាត់ការក្លែងបន្លំឯកសារ ផ្តល់ភាពងាយស្រួលក្នុងការប្រើប្រាស់ និងផ្ទៀងផ្ទាត់ភាពត្រឹមត្រូវ នៃឯកសារផ្តល់ទំនុកចិត្ត ចំណេញពេលវេលា និងកាត់បន្ថយការចំណាយនានា ព្រមទាំងជម្រុញការធ្វើបរិវត្តកម្មឌីជីថលសេវាសាធារណៈ»។ អនុក្រឹត្យបានសរសេរថាការប្រើប្រាស់របៀបផ្ទៀងផ្ទាត់នោះក៏នឹងដាក់បញ្ចូល QR Code ស្តង់ដាផងដែរ។ យោងតាមអនុក្រឹត្យ ក្រសួង ស្ថាប័ន រដ្ឋបាលថ្នាក់ក្រោមជាតិ និងនីតិបុគ្គលសាធារណៈ នឹងត្រូវរៀបចំធ្វើគម្រោង នៃរបៀបរៀបចំបែបឌីជីថលនេះ ដើម្បីសម្រាប់ប្រើប្រាស់ដោយខ្លូនឯងថែមទៀត។

តួលេខឆ្លងថ្មីកូវីដ១៩ ក្នុងប្រទេសអាស៊ានរយៈពេល ២៤ម៉ោងចុងក្រោយនេះបានបន្តកើនឡើងវិញចំនួន ៥៥ករណីថែមទៀត បើប្រៀបធៀបនឹងតួលេខឆ្លងកាលពីម្សិលមិញ។ តួលេខឆ្លងថ្មីកូវីដ១៩ នៅអាស៊ានថ្ងៃនេះមានចំនួន ៦១០ករណី ។ ការឆ្លងក្នុងរយៈពេល ២៤ម៉ោងកន្លងមកនេះ បានកើតលើប្រទេសចំនួន៥ នៅអាស៊ាន រួមមានប្រទេសឥណ្ឌូនេស៊ី, ម៉ាឡេស៊ី, វៀតណាម, ឡាវ, កម្ពុជា, មីយ៉ាន់ម៉ា និងប្រទេសហ្វីលីពីន។ ប្រទេសឥណ្ឌូនេស៊ី គឺជាប្រទេស ដែលមានតួលេខឆ្លងច្រើនជាងគេ ដែលមានចំនួន ៥៥ករណី ។ តួលេខឆ្លងតិចជាងគេ គឺប្រទេសកម្ពុជា និងប្រទេសឡាវ ដែលមានចំនួនអ្នកឆ្លងចំនួន ២ករណី ។ ប្រទេសប្រុយណេ, ថៃ និងប្រទេសសឹង្ហបុរី គឺជាប្រទេសដែលគ្មានសេចក្តីរាយការណ៍ជុំវិញ តួលេខឆ្លង និងស្លាប់ឡើយ ក្នុងរយៈពេល២៤ ម៉ោងចុងក្រោយនេះ ។ តួលេខស្លាប់ដោយសារកូវីដ១៩ ក្នុងប្រទេសអាស៊ានរយៈពេល ២៤ម៉ោងចុងក្រោយនេះ មានចំនួន ១១នាក់ ដែលជាពលរដ្ឋនៃប្រទេសឥណ្ឌូនេស៊ី, ម៉ាឡេស៊ី និងប្រទេសហ្វីលីពីន ។ គិតសរុបរួមនៃប្រទេសទាំង១០ អាស៊ាននាពេលនេះ ការឆ្លងសរុបមានចំនួន ៣៥លាន ៦០ម៉ឺន…

កម្ពុជាក្នុងរយៈពេល ២៤ម៉ោងចុងក្រោយនេះ មានតួលេខឆ្លងកូវីដ១៩ ចំនួន២ករណីឡើងវិញ បន្ទាប់ពីមិនមានអ្នកឆ្លងសោះកាលពីម្សិលមិញ។ យោងតាមក្រសួងសុខាភិបាលការឆ្លងថ្មី២ករណីនៅថ្ងៃនេះ គឺជាការឆ្លងដែលកើតឡើងក្នុងរង្វង់សហគមន៍ទាំងអស់។ កម្ពុជារយៈពេលប្រមាណ ១ខែកន្លងមកនេះ ការឆ្លងបានថយចុះ ដោយមានតួលេខឆ្លងប្រចាំថ្ងៃមាន តិចតួចប៉ុណ្ណោះ និងថ្ងៃខ្លះមិនមានការឆ្លងសោះក៏មាន។ កម្ពុជាបានចាប់ផ្តើមចាក់ដូសជំរុញទី៦ ចាប់តាំងពីដើមខែមករា ដែលរហូតមកទល់ពេលនេះ មានពលរដ្ឋទៅចាក់បានចំនួន ២៧ម៉ឺន ៩ពាន់ ៦៣៧នាក់ហើយ ។ កម្ពុជាបច្ចុប្បន្នកំពុងរៀន រស់នៅជាមួយនឹងជម្ងឺកូវីដ១៩ ខណៈដែលការចាក់វ៉ាក់សាំងដូសមូលដ្ឋានទូទាំងប្រទេសមាន ប្រមាណជាង ៩៥ភាគរយរួចមកនេះ ។

ខេត្តកំពង់ឆ្នាំង គឺជាខេត្តទី៩ ដែលត្រូវបានប្រកាសជាខេត្តដែលអស់មីន។ ពិធីប្រកាសខេត្តកំពង់ឆ្នាំង ជាខេត្តអស់មីននេះ បានធ្វើនៅព្រឹកថ្ងៃទី២ ខែមីនា ឆ្នាំ២០២៣ ក្រោមអធិបតីភាព អនុប្រធានអាជ្ញាធរជាតិបោសសំអាតគ្រាប់មីន ទេសរដ្ឋមន្ត្រី លី ធុជ ។ ទេសរដ្ឋមន្ត្រី លី ធុជ បានអោយដឹងថា ក្នុងខេត្តកំពង់ឆ្នាំង ទំហំផ្ទៃដីដែលបានបោសសំអាត គ្រាប់មីន និងគ្រាប់មិនទាន់ផ្ទុះ មានទំហំជាង៧គីឡូម៉ែត្រក្រឡា ដែលស្មើនឹង៦០ចម្ការមីន ។ ក្នុងប្រតិបត្តិការសម្អាតគ្រាប់មីននេះ អង្គភាពស៊ីម៉ាក់ បានរកឃើញ និងកំទេចចោលគ្រាប់មីនប្រឆាំងមនុស្សចំនួន២ពាន់៨៥២គ្រាប់, មីនប្រឆាំងរថក្រោះ ៥០គ្រាប់ និងយុទ្ធភ័ណ្ឌ មិនទាន់ផ្ទុះដទៃទៀត ៣ម៉ឺន៥ពាន់៤២៨គ្រាប់ ។ កម្ពុជាបានរំដោះផ្ទៃដីពីការគំរាមដោយសារមីន និងសំណល់ជាតិផ្ទុះពីសង្រ្គាមបានចំនួន ២ពាន់៥៥៤ គីឡូម៉ែត្រក្រឡា ដោយរកឃើញនិងកំទេចចោលមីន និងសំណល់ជាតិផ្ទុះពី សង្គ្រាមជាច្រើនលានគ្រាប់។ កម្ពុជាបានដាក់ទិសដៅបោសសំអាតគ្រាប់មីនឱ្យអស់ក្នុងឆ្នាំ២០២៥។

ភាពជឿនលឿនពេកនៃកត្តាបច្ចេកវិទ្យា បាននាំឱ្យមានក្តីបារម្ភការបាត់បង់លើមរតកវប្បធម៌ខ្មែរ។ សម្តេចតេជោ ហ៊ុន សែន បានអំពាវនាវការលើកស្ទួយទ្រទ្រង់វប្បធម៌របស់ជាតិ ជាពិសេសការកសាងរូបសំណាក ឬរូបបដិមា ដែលការកសាងគឺត្រូវធ្វើឱ្យចំនឹងភាពត្រឹមត្រូវ នៃរចនាបទដែលដូនតាខ្មែរ បានគូសវាសទុកតាំងពីសម័យបុរាណកាល ដោយមិនឱ្យមានការ កែច្នៃដែលខុសនឹងកេរដំណែលរបស់ខ្មែរឡើយ។ ថ្លែងក្នុង «ទិវាវប្បធម៌ជាតិ» នៅថ្ងៃព្រហស្ប តិ៍នេះ សម្តេចតេជោ ហ៊ុន សែន បានមានប្រសាសន៍បញ្ជាក់យ៉ាងនេះ។

ព្រឹត្តិការណ៍កីឡាស៊ីហ្គេមលើកទី៣២ ដែលកម្ពុជានឹងត្រូវធ្វើជាម្ចាស់ផ្ទះជាលើកដំបូងនោះ គឺសល់រយៈពេល៦៤ថ្ងៃទៅមុខទៀតប៉ុណ្ណោះ។ ការរាប់ថយក្រោយរយៈពេល១០០ថ្ងៃ បានកន្លងផុត៣៦ថ្ងៃមកហើយ។ គេហទំព័ររបស់សម្តេចតេជោ ហ៊ុន សែន បានសរសេរថា «ថ្ងៃទី២ ខែមីនា ឆ្នាំ២០២៣នេះ គឺនៅសល់តែ៦៤ថ្ងៃទៀតប៉ុណ្ណោះ នឹងឈានដល់ព្រឹត្តិការណ៍ស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២ ដែលកម្ពុជានឹងធ្វើជាម្ចាស់ផ្ទះក្នុងឆ្នាំ២០២៣នេះ»។ សម្តេចតេជោ ហ៊ុន សែន បានមានប្រសាសន៍បញ្ជាក់បន្ថែមនូវព្រឹត្តិការណ៍ ដែលរាប់ថយក្រោយនេះ។ កម្ពុជាខកខានមិនបានធ្វើជាម្ចាស់ផ្ទះនៃកីឡាស៊ីហ្គេមនេះក្នុងអម្លុងពេល៦៤ឆ្នាំ ដោយសារតែស្ថានការណ៍វិវត្តន៍មិនទៀងទាត់កើតឡើងក្នុងប្រទេសកម្ពុជា។ នៅក្នុងខែឧសភាឆ្នាំ២០២៣ ជិតមកដល់នេះ កម្ពុជាបានបញ្ជាក់ការប្តេជ្ញាត្រៀមរៀបចំខ្លួនរួចរាល់ជាស្រេចក្នុងការធ្វើជាម្ចាស់ផ្ទះ នៃព្រឹត្តិការណ៍ស៊ីហ្គេមជាលើកដំបូង។ យោងតាមមន្ត្រីរៀបចំកីឡា ចាប់ពីថ្ងៃទី២៥មេសាឆ្នាំ២០២៣, កម្ពុជានឹងទទួលបានភ្ញៀវជា គណៈប្រតិភូក្នុងក្រុមកីឡាករដែលនឹងមកដល់ជាបណ្តើរៗ។ នៅថ្ងៃទី២៩មេសានឹងត្រូវចាប់ផ្តើមការប្រកួតបាល់ទាត់ និងរហូតដល់ថ្ងៃទី៥ឧសភាឆ្នាំ២០២៣ ពិធីប្រកាសដ៏ធំនៃការបើកព្រឹត្តិការណ៍កីឡាស៊ីហ្គេម និងអាស៊ានប៉ារ៉ាហ្គេមនឹងចាប់ផ្តើម។ មុខកីឡាដែលនឹងត្រូវដាក់ ចេញប្រកួតទាំងអស់ ក្នុងកីឡាស៊ីហ្គេមដែលកម្ពុជានឹងត្រូវធ្វើជាម្ចាស់ផ្ទះ មានទាំងអស់ចំនួន ៣៧ប្រភេទកីឡា។

ការសរសេរអក្សរខ្មែរជាមួយកំហុសអក្ខរាវិរុទ្ធដោយគ្មានការយកចិត្តទុកដាក់ បានជម្រុញឱ្យសម្តេចតេជោ ហ៊ុន សែន បានស្នើឱ្យមានការយកចិត្តទុកដាក់លើវិស័យអក្សរសាស្ត្រខ្មែរ។ ការសរសេរជាមួយនឹងកំហុសអក្ខរាវិរុទ្ធ ត្រូវគេកត់សម្គាល់ថាបានកើតឡើងជាច្រើនតាមរយៈ ការសរសេរលើបណ្តាញសង្គម, ការសរសេរលើលិខិតសំខាន់នានា និងសូម្បីតែការសរសេរ លើស្លាកសញ្ញាផ្សាយពាណិជ្ជកម្ម។ សម្តេចតេជោ ហ៊ុន សែន បានថ្លែងក្នុង «ទិវាវប្បធម៌ជាតិ» បានអំពាវនាវឱ្យពលរដ្ឋសូមចូលរួមក្នុងការយកចិត្តទុកដាក់លើការសរសេររបស់ខ្លួន ដើម្បីចូលរួមក្នុងការរក្សាវប្បធម៌អក្សរសាស្ត្រ។ វិស័យអក្សរសាស្ត្រខ្មែរ ស្ទើរតែបាត់បង់អស់ទាំងស្រុងក្នុងអតីតកាលគ្រប់គ្រង នៃរបបកាប់សម្លាប់ខ្មែរក្រហមរវាងពីឆ្នាំ១៩៧៥ដល់ដើមឆ្នាំ១៩៧៨។ ក្រុមខ្មែរក្រហម បានបង្ខំឱ្យពលរដ្ឋ ត្រូវកាន់ចប, កាន់បង្គី និងបង្ខំពលរដ្ឋឱ្យធ្វើពលកម្ម ដែលគេបានចាត់ទុកថាជាការរៀនសូត្រ ក្នុងសម័យបដិវត្តន៍នាពេលនោះ។ បើគ្មានថ្ងៃរំដោះ៧មករាឆ្នាំ១៩៧៩នោះទេ វិស័យអក្សរសាស្ត្រខ្មែរ នឹងត្រូវប្រឈមការវិនាសបាត់បង់ទាំងស្រុងដោយសារតែរបបកម្ពុជាប្រជាធិបតេយ្យពីអតិតកាលនោះ។

អនាគតនាយករដ្ឋមន្ត្រីបន្តវេន បណ្ឌិត ហ៊ុន ម៉ាណែត បានអនុញ្ញាតឲ្យគណៈប្រតិភូក្រុមប្រឹក្សាធុរកិច្ចអាមេរិកអាស៊ាន ដឹកនាំដោយលោក ម៉ៃខុល ម៉ាឡាក់កា Michael Malacka ចូលជួបពិភាក្សាលើការងារធុរកិច្ច និងវិនិយោគក្នុងប្រទេសកម្ពុជា។ លោកម៉ៃខុល ម៉ាឡាក់កា បានជំរាបបណ្ឌិត ហ៊ុន ម៉ាណែត ជុំវិញប្រវត្តិនៃក្រុមប្រឹក្សាធុរកិច្ចអាមេរិក-អាស៊ាន ដែលមានអាយុកាលជាង៣៧ឆ្នាំ និងមានសមាជិកជាង ១៨០ ក្រុមហ៊ុន ដែលកំពុងធ្វើធុរកិច្ច និងការបណ្តាក់ទុននៅអាស៊ាន។ លោកបានថ្លែងថាបច្ចុប្បន្នក្នុងប្រទេសកម្ពុជាមានក្រុមហ៊ុនជាងដប់ បានពង្រីកការធ្វើធុរកិច្ច និងវិនិយោគនៅកម្ពុជា ជាពិសេសជួយដល់ផែនការងើបឡើងវិញ នៃសេដ្ឋកិច្ចកម្ពុជា, បច្ចេកវិទ្យានិងនវានុវត្តន៍, លទ្ធភាពទទួលហិរញ្ញប្បទានរបស់សហគ្រាស SME, ថាមពលនិងហេដ្ឋារចនាសម្ព័ន្ធ, ផលិតផលដែលមានតម្លៃបន្ថែមខ្ពស់, និងការបណ្តុះបណ្តាលធនធានមនុស្ស, យុវជននិង SME ជាដើម។ បណ្ឌិត ហ៊ុន ម៉ាណែត បានសម្ដែងនូវការស្វាគមន៍យ៉ាងកក់ក្តៅដល់គណៈប្រតិភូក្រុមប្រឹក្សាធុរកិច្ចអាមេរិកអាស៊ាន ដែលបានដឹកនាំក្រុមការងារមកទស្សនកិច្ចជារៀងរាល់ឆ្នាំនៅកម្ពុជា ដើម្បីផ្តល់ដំណោះស្រាយធុរកិច្ច និងបង្កើនឱកាសវិនិយោគពីអាមេរិកមកកម្ពុជា។ បណ្ឌិត ក៏បានលើកទឹកចិត្តបន្ថែមទៀតដល់ក្រុមហ៊ុនអាមេរិកទាំងអស់ឱ្យបន្តវិនិយោគ និងធ្វើធុរកិច្ច នៅកម្ពុជាដែលជាប្រទេសកំពុងអភិវឌ្ឍន៍ក្នុងល្បឿនយ៉ាងលឿនស្ទើរគ្រប់វិស័យ។ ក្នុងកិច្ចពិភាក្សាក្នុងឱកាសនោះផងដែរ, ការជជែកបានផ្តោតលើជោគជ័យរបស់កម្ពុជា ក្នុងការធ្វើជាម្ចាស់ផ្ទះរៀបចំកិច្ចប្រជុំកំពូលអាស៊ាន និងកិច្ចប្រជុំកំពូលពាក់ព័ន្ធ, ទំនាក់ទំនងរវាងកម្ពុជា និងសហរដ្ឋអាមេរិក…

អតីតសកម្មជនគណបក្សប្រឆាំងលោក មាជ សុវណ្ណារ៉ា និងបុរសជាតិអាមេរិកម្នាក់ឈ្មោះម៉ាក ហ្គីបែល Mark Gibbel កំពុងស្ថិតក្នុងការតាមដានរបស់សាធារណជនក្រោយមានការផ្សាយ តាមបណ្តាញសង្គមថា អ្នកទាំង២គឺជាភ្នាក់ងារសម្ងាត់ CIA ។ គណនីហ្វេសប៊ុក «ខ្ញុំជាសម រង្ស៊ី» បានបង្ហោះព័ត៌មានមួយ ដែលនិយាយថាលោក មាជ សុវណ្ណារ៉ា និងបុរសជាតិ អាមេរិក ឈ្មោះ ម៉ាក ហ្គីបែល នឹងមកដឹកនាំកម្លាំងប្រឆាំងសាលក្រមរបស់តុលាការភ្នំពេញ ដែលប្រកាសកាត់ទោសលោក កឹម សុខា នៅថ្ងៃទី៣មីនាឆ្នាំ២០២៣។ ហ្វេសប៊ុក «ខ្ញុំជាសម រង្ស៊ី» បានសរសេរទៀតថា លោក មាជ សុវណ្ណារ៉ា និងបុរសជាតិអាមេរិកដែលជ្រកក្រោមស្លាកវិទ្យាស្ថានស្រាវជ្រាវនយោបាយពីទីក្រុងឡងប៊ិច និងដែលអ្នកទាំង២ធ្លាប់ធ្វើកិច្ចការសម្ងាត់ជាមួយគ្នាតាំងពីឆ្នាំ២០១៣ ដើម្បីជួយគណបក្សសង្គ្រោះជាតិ ក្នុងការផ្តួលរំលំរាជរដ្ឋាភិបាល, ពេលនេះបាននឹងកំពុងមានវត្តមានក្នុងក្រុងភ្នំពេញ និងគ្រោងរៀបចំផែនការបង្កចលាចលនៅពេលប្រកាសសាលក្រមលោក កឹម សុខា នៅថ្ងៃទី៣ មីនា ឆ្នាំ២០២៣។ ការបង្ហោះព័ត៌មាននេះ បានប្រញាប់ឱ្យលោក មាជ សុវណ្ណារ៉ា បដិសេធវិញភ្លាម ដោយលោកបញ្ជាក់ថាវត្តមានរបស់លោក ក្នុងប្រទេសកម្ពុជានាពេលនេះ គឺដើម្បីសួរសុខទុក្ខម្តាយដែលមានវ័យចំណាស់នោះទេ។…