ការឆ្លងថ្មីកូវីដ១៩ក្នុងរយៈពេល២៤ម៉ោងចុងក្រោយនេះ មានចំនួន ៨ករណី ដែលថយចុះ មកវិញចំនួន ១ករណី បើប្រៀបធៀបនឹងតួលេខឆ្លងកាលពីម្សិលមិញ ។ យោងតាមក្រសួង សុខាភិបាល តួលេខឆ្លងថ្មីទាំង ៨ករណី នៅថ្ងៃនេះសុទ្ធតែកើតឡើងក្នុងរង្វង់សហគមន៍ទាំង អស់ ។ កម្ពុជាបានចាប់ផ្តើមចាក់ដូសជំរុញទី៦ ក្នុងសប្តាហ៍នេះ ដែលមានចំនួន ២ម៉ឺន ១៣៣នាក់ ហើយ ខណៈពិភពលោកកំពុងប្រុងប្រយ័ត្ននូវវីរុសបំបែ្លងថ្មីម្យ៉ាងឈ្មោះ XBB ។ វីរុសនេះ នៅមិនទាន់មានសេចក្តីរាយការណ៍អំពីការឆ្លងចូលមកដល់ប្រទេសកម្ពុជានៅឡើយទេ។ កម្ពុជាបច្ចុប្បន្នកំពុងរៀនរស់នៅជាមួយនឹងជម្ងឺកូវីដ១៩ ខណៈដែលការចាក់វ៉ាក់សាំងដូសមូល ដ្ឋានទូទាំងប្រទេសមានប្រមាណជាង ៩៥ភាគរយរួចមកនេះ។

ភ្លៀងកក់ខែធ្លាក់ជាប់ៗគ្នានាប៉ុន្មានថ្ងៃមកនេះ បានរងការជន់លិចផលដំណាំតាមកន្លែងមួយចំនួន នៅក្នុងខេត្តកំពង់ឆ្នាំង។ អភិបាលរងខេត្តលោក អម សុភា និងលោក យិន សាវ៉េន បានដឹកនាំក្រុមការងារ ចុះពិនិត្យទីតាំងដែលរងការលិចដែលស្ថិតនៅក្នុងភូមិអន្លង់ព្រីង ឃុំឈានឡើង នៃស្រុកសាមគ្គីមានជ័យ។ ខេត្តកំពង់ឆ្នាំងដែលជាប់នឹងទន្លេសាប គឺជាខេត្តដែលតែង មានសេចក្តីរាយការណ៍អំពីដំណាំខូចខាតដោយសារជំនន់ទឹកភ្លៀង។ ជំនន់ទឹកភ្លៀងកក់ខែ នេះថែមទាំងបានបណ្តាលឱ្យមានការលិចថ្នល់ធ្វើដំណើរឆ្លងកាត់ថែមទៀត។ លោកអភិបាលរងខេត្ត បានធ្វើការអំពាវនាវដល់ប្រជាពលរដ្ឋ ដែលធ្វើដំណើរតាមដងផ្លូវដែលលិចនេះ ត្រូវមានការប្រយ័ត្នខ្ពស់ ជាពិសេសពេលធ្វើដំណើរឆ្លងកាត់ផ្លូវដែលកំពុងមានទឹកជំនន់ហូរកាត់ខ្លាំង ដើម្បីចៀសវាងគ្រោះថ្នាក់ដល់អាយុជីវិត និងការបាត់បង់ទ្រពសម្បត្តិ ៕

ឆ្នាំ២០២៣ ដែលប្រទេសចិនបានបិទបញ្ចប់គោលនយោបាយសូន្យកូវីដ-១៩នេះ មានការរំពឹងថា នឹងមានលំហូរទេសចរចិនជាច្រើនទៅកាន់បណ្តាប្រទេសលើពិភពលោក។ ប្រទេសខ្លះ បានត្រៀមស្វាគមន៍ និងប្រទេសខ្លះបានបន្តឹងការធ្វើដំណើរទេសចរជាតិចិន និងក៏មានប្រទេសដែលរារាំងមិនឱ្យទេសចរចិនចូលក្នុងប្រទេសដែរ? ហេតុអ្វី? លោក ម៉ារ យ៉ារិទ្ធិ រាយការណ៍

ប្រទេសអ៊ុយក្រែនបានបញ្ជូនមន្ត្រីចំនួន១៥រូប ដើម្បីសិក្សាជំនាញបោសសំអាតគ្រាប់មីន និងយុទ្ធភណ្ឌមិនទាន់ផ្ទុះពីកម្ពុជា។ យោងតាមសេចក្តីប្រកាសព័ត៌មានរបស់មជ្ឈមណ្ឌល សកម្មភាពកម្ចាត់មីនកម្ពុជា CMAC ទទួលបាននៅថ្ងៃសុក្រនេះ បានបញ្ជាក់ថាមន្ត្រីអ៊ុយក្រែនទាំង១៥នាក់ នឹងត្រូវហ្វឹកហ្វឺនជំនាញដោះមីន រយៈពេលពេញមួយសប្តាហ៍ នាពាក់កណ្តាលខែមករាឆ្នាំ២០២៣ នៅវិទ្យាស្ថានបច្ចេកទេសសកម្មភាពកម្ចាត់មីនរបស់ CMAC ក្នុងខេត្តកំពង់ឆ្នាំង និងគ្រោងធ្វើទស្សនកិច្ចតាមការដ្ឋានដោះមីននៅខេត្តបាត់ដំបង និងសៀមរាបជាដើម។ អង្គភាព CMAC គឺជាអង្គភាពបោសសម្អាតមីនគ្រាំទ្រសកម្មភាពមនុស្សធម៌ ដែលមានវ័យចំណាស់ និងធំជាងគេបង្អស់នៅលើពិភពលោក។ សម្រាប់ការហ្វឹកហ្វឺនជំនាញដោះមីនដល់សិក្ខាកាមអន្តរជាតិនេះ មិនមែនជាលើកទី១ សម្រាប់មន្ត្រីអ៊ុយក្រែននោះទេ។ កន្លងមកដោយមានការគាំទ្រដោយរដ្ឋាភិបាល និងប្រជាជនជប៉ុន អង្គភាព CMAC ធ្លាប់បានហ្វឹកហ្វឺនការដោះមីន ដល់ប្រទេសជាច្រើនដូចជា កូឡុំប៊ី, អ៊ីរ៉ាក់, អង់ហ្គោឡា និងប្រទេសឡាវជាដើម៕

គណៈកម្មាធិការជាតិរៀបចំការបោះឆ្នោតហៅកាត់ថា គ.ជ.ប នៅថ្ងៃទី១៣ ខែមករា ឆ្នាំ២០២៣ បានបិទផ្សាយបញ្ជីបោះឆ្នោតដំបូង ដោយបញ្ជាក់ថាគេបានលុបឈ្មោះចោល ចំនួនជាង២៧ម៉ឺននាក់។ គជប បានថ្លែងថាពលរដ្ឋដែលមានឈ្មោះនៅក្នុងបញ្ជីបោះឆ្នោត ដំបូងមានចំនួន៩លាន៧១ម៉ឺន៦៤៥នាក់ ក្នុងនោះស្ត្រីមានចំនួន៥លាន១៦ម៉ឺន១ពាន់៩០៦ នាក់។ ចំណែកឈ្មោះដែលបានលុបចោល២៧ម៉ឺន១ពាន់១៤២នាក់ គឺជាពលរដ្ឋដែលផ្លាស់ ចេញ, ខ្លះបានស្លាប់, ខ្លះឈ្មោះស្ទួន និងខ្លះត្រូវបានដកសិទ្ធិបោះឆ្នោត។ គជប បានអំពាវនាវពលរដ្ឋត្រូវអញ្ជើញទៅពិនិត្យផ្ទៀងផ្ទាត់ឈ្មោះ និងទិន្នន័យសាឡើងវិញក្នុងការ ចង់កែ តម្រូវតាមរយៈសិទ្ធិប្តឹងតវ៉ា និងប្តឹងជំទាស់។ យោងតាមបទបញ្ញត្តិ និងនីតិវិធី ជនដែលចង់ប្តឹងជំទាស់ឬកែតម្រូវនឹងអាចធ្វើបានក្នុងរយៈពេល ១០ថ្ងៃយ៉ាងយូរ បន្ទាប់ពីថ្ងៃបិទផ្សាយ ។ យោងតាមគជប ចំនួនការិយាល័យបោះឆ្នោតនៅទូទាំងប្រទេស មានចំនួន២ម៉ឺន៣ពាន់៧៨៩កន្លែង។ កម្ពុជាត្រៀមនឹងធ្វើការបោះឆ្នោតសកល ទូទាំងប្រទេសនៅថ្ងៃទី២៣ កក្កដា ឆ្នាំ២០២៣។

វិវាទពាក់ព័ន្ធនឹងលោក គង់ គាំ ដែលលួចធ្វើវិញ្ញាបន ដើម្បីគ្រប់គ្រងទ្រព្យសម្បត្តិរដ្ឋត្រូវបាន ដោះស្រាយដល់ទីបញ្ចប់។ លោក គង់ គាំ បានសារភាពកំហុស និងយល់ព្រមប្រគល់ដី និងផ្ទះ ឱ្យរដ្ឋវិញ ខណៈសម្តេចតេជោ ហ៊ុន សែន ក៏បានយលព្រមទម្លាក់ចោលនូវបណ្តឹងវិញដែរ។ ដីទំហំកន្លះហិកតាដែលស្ថិតក្នុងខណ្ឌចំការមន នឹងត្រូវគេប្រគល់ទៅឱ្យគណៈកម្មាធិការជាតិ រៀបចំការបោះឆ្នោតគ្រប់គ្រងធ្វើជាកម្មសិទ្ធិវិញ។ អប្សរាណិតរាយការណ៍

សេចក្តីព្រាងច្បាប់ថ្មីមួយ និងសេចក្តីព្រាងគោលនយោបាយមួយ ត្រូវបានគណៈរដ្ឋមន្រ្តី ក្រោមអធិបតីដ៏ខ្ពង់ខ្ពស់របស់សម្តេចតេជោ ហ៊ុន សែន បានអនុម័តនៅថ្ងៃទី១៣ មករា ឆ្នាំ២០២៣ ។ មន្ត្រីនាំពាក្យរាជរដ្ឋាភិបាលលោក ផៃ ស៊ីផាន បានថ្លែងតាមបណ្តាញសង្គមថា សេចក្តីព្រាងច្បាប់ថ្មីស្តីពី «ប្រព័ន្ធហិរញ្ញវត្ថុសាធារណៈ» ត្រូវបានរៀបចំក្នុងគោលបំណង កសាងក្របខណ្ឌគតិយុត្តគោល និងចាំបាច់សម្រាប់ការអនុវត្តប្រព័ន្ធថវិកាព័ត៌មានសមិទ្ធកម្ម ឬហៅកាត់ថា “ថវិកាសមិទ្ធកម្ម” ដែលជាម៉ូដែលសមស្របសម្រាប់កម្ពុជា ស្របតាមយុទ្ធសាស្រ្ត នៃការកែទម្រង់ប្រព័ន្ធថវិកាឆ្នាំ២០១៨-២០២៥ ដែលជាស្នូលនៃការកែទម្រង់ការ គ្រប់គ្រងហិរញ្ញវត្ថុសាធារណៈ។ ដោយឡែកក្នុងកិច្ចប្រជុំគណៈរដ្ឋមន្ត្រីក្នុងថ្ងៃសុក្រដដែល នៅបានអនុម័តសេចក្តីព្រាង «គោលនយោបាយគ្រប់គ្រង និងប្រើប្រាស់ដីធ្លី ដើម្បីអភិវឌ្ឍ ខេត្តព្រះសីហនុ ទៅជាតំបន់សេដ្ឋកិច្ចពិសេសគំរូពហុបំណងឆ្នាំ២០២២-២០៣៨» ។ មន្ត្រីនាំពាក្យរាជរដ្ឋាភិបាលបានថ្លែងថា សេចក្តីព្រាងគោលនយោបាយនេះ មានគោលសំដៅតម្រង់ទិស និងកំណត់ការគ្រប់គ្រងដីធ្លី និងប្រើប្រាស់ដីធ្លីខេត្តព្រះសីហនុ តាមគន្លងគំរូអភិវឌ្ឍសេដ្ឋកិច្ចសង្គម ស្របតាមគោលនយោបាយច្បាប់ និងលិខិតបទដ្ឋាន គតិយុត្តជាធរមាន។ កម្ពុជាមានចក្ខុវិស័យរហូតដល់ឆ្នាំ២០៣៨ នឹងធ្វើការអភិវឌ្ឍខេត្តព្រះសីហនុ ក្លាយទៅជាតំបន់សេដ្ឋកិច្ចពិសេសគំរូពហុបំណង, ជាទីក្រុងបៃតងអាស៊ាននៃប៉ូលអភិវឌ្ឍជាតិទំនើប ប្រកបដោយចីរភាព ជវភាព សុខភាព និងសុភមង្គល។

តួលេខឆ្លងថ្មីកូវីដ១៩ ក្នុងប្រទេសអាស៊ាននៃរយៈពេល ២៤ម៉ោងចុងក្រោយនេះ បានថយចុះចំនួន១៧៤ករណី បើប្រៀបធៀបនឹងតួលេខឆ្លងកាលពីម្សិលមិញ ។ តួលេខឆ្លងថ្មីកូវីដ ១៩ នៅអាស៊ានរយៈពេល ២៤ម៉ោងចុងក្រោយនេះ មានចំនួនតែ ១ពាន់ ៩១០ករណី ។ ការឆ្លងថ្ងៃនេះ បានកើតលើប្រទេសចំនួន៨ នៅអាស៊ាន រួមមានប្រទេស ឥណ្ឌូនេស៊ី, ម៉ាឡេស៊ី, វៀតណាម, មីយ៉ាន់ម៉ា, សឹង្ហបុរី, ហ្វីលីពីន, ឡាវ និងប្រទេសកម្ពុជា ។ ប្រទេសសឹង្ហបុរី គឺជាប្រទេសដែលមានតួលេខឆ្លងច្រើនជាង ដែលមានចំនួន ៥៩៨ករណី ។ តួលេខឆ្លងតិចជាងគេ គឺប្រទេសមីយ៉ាន់ម៉ា ដែលមានចំនួនតែ ៤ករណីប៉ុណ្ណោះ ។ ប្រទេសប្រុយណេ និងប្រទេសថៃ គឺជាប្រទេសដែលគ្មានសេចក្តីរាយការណ៍ជុំវិញតួលេខឆ្លង និងស្លាប់ឡើយក្នុងរយៈពេល ២៤ម៉ោងចុងក្រោយនេះ ។ តួលេខស្លាប់ដោយសារកូវីដ១៩ ក្នុងប្រទេសអាស៊ានរយៈពេល ២៤ម៉ោងចុងក្រោយនេះ មាន ចំនួន ៣១នាក់ ក្នុងនោះប្រទេសហ្វីលីពីន មានមនុស្សស្លាប់ចំនួន ១១នាក់ ដែលជាតួលេខ ស្លាប់ច្រើនជាងគេ ។…

ការឆ្លងថ្មីកូវីដ១៩ក្នុងរយៈពេល២៤ម៉ោងចុងក្រោយនេះ បានបន្តកើនឡើងចំនួន ៥ករណី បន្ថែមទៀតបើប្រៀបធៀបនឹងតួលេខឆ្លងកាលពីម្សិលមិញ ។ យោងតាមក្រសួងសុខាភិបាល តួលេខឆ្លងថ្មី២៤ម៉ោងចុងក្រោយ មានចំនួន៩ករណី។ តួលេខឆ្លងថ្មីទាំង ៩ករណីនៅថ្ងៃនេះ សុទ្ធតែកើតឡើងក្នុងរង្វង់សហគមន៍ទាំងអស់ ។ កម្ពុជាបានចាប់ផ្តើមចាក់ដូសជំរុញទី៦ ក្នុងសប្តាហ៍នេះ ដែលមានចំនួន ១ម៉ឺន ៦ពាន់ ២៦២ នាក់ហើយ ខណៈពិភពលោកកំពុងប្រុងប្រយ័ត្ននូវវីរុសបំបែ្លងថ្មីម្យ៉ាងឈ្មោះ XBB។ វីរុសនេះ នៅមិនទាន់មានសេចក្តីរាយការណ៍អំពីការឆ្លង ចូលមកដល់ប្រទេសកម្ពុជានៅឡើយទេ។ កម្ពុជាបច្ចុប្បន្នកំពុងរៀនរស់នៅជាមួយនឹងជម្ងឺកូវីដ១៩ ខណៈដែលការចាក់វ៉ាក់សាំងដូសមូល ដ្ឋានទូទាំងប្រទេសមានប្រមាណជាង ៩៥ភាគរយ រួចមកនេះ។