ការឆ្លងថ្មីកូវីដ១៩ក្នុងរយៈពេល៧២ម៉ោងចុងក្រោយនេះ បានកើនឡើងមកវិញចំនួន១ករណី បើប្រៀបធៀបនឹងតួលេខឆ្លង៧២ម៉ោងដូចគ្នា កាលពីសប្តាហ៍មុន ។ យោងតាមក្រសួងសុខាភិបាលតួលេខឆ្លងថ្មី នៃ៧២ម៉ោងចុងក្រោយ មានចំនួន ១៨ករណី ដោយកាលពីថ្ងៃសៅរ៍ការឆ្លងមានចំនួន ៥ករណី, ថ្ងៃអាទិត្យមាន ៦ករណី និងនៅថ្ងៃច័ន្ទនេះ មានចំនួន ៧ករណី ផងដែរ ។ តួលេខឆ្លងថ្មីទាំង ១៨ករណី នាវេលា ៧២ម៉ោងចុងក្រោយនេះ គឺកើតឡើងក្នុងរង្វង់សហគមន៍ទាំងអស់ ។ កម្ពុជាបច្ចុប្បន្នកំពុងរៀនរស់នៅជាមួយនឹងជម្ងឺកូវីដ១៩ ខណៈដែលការចាក់វ៉ាក់សាំងដូសមូល ដ្ឋានទូទាំងប្រទេសមានប្រមាណជាង ៩៥ភាគរយ រួចមកនេះ។

កម្ពុជាមានទន្តបណ្ឌិតចំនួន៣៨០នាក់ដែលបំរើការក្នុងក្រសួងសុខាភិបាលនៃប្រទេសដែលមានពលរដ្ឋ១៧លាននាក់។ យោងតាមចំនួននេះ គឺក្នុងរង្វង់ពលរដ្ឋខ្មែរជាង៤ម៉ឺន៤ពាន់នាក់ មានទន្តបណ្ឌិតម្នាក់ ដែលជួយបំរើលើវិស័យទណ្ឌសាស្ត្រនៅកម្ពុជា។ ដោយឡែកក្នុងវិស័យ ឯកជនក៏មានទន្តបណ្ឌិតជាច្រើនផងដែរ ដែលសរុបតួលេខមានជាង២ពាន់នាក់នៅទូទាំងប្រទេស។ តួលេខនេះ ត្រូវបានលើកឡើង ដោយរដ្ឋលេខាធិការក្រសួងសុខាភិបាលលោក អឿន បូរ៉ារ័ត្នន៍ ក្នុងឱកាសបើកសន្និសីទ និងការតាំងពិព័រណ៍ទន្តសាស្ត្រលើកទី២១ នៃសមាគមទន្តពេទ្យកម្ពុជាឆ្នាំ២០២៣ នៅថ្ងៃទី៩មករាឆ្នាំ២០២២នាសណ្ឋាគារសុខា។ វិស័យទន្តសាស្ត្រក្នុងប្រទេសកម្ពុជាត្រូវបានគេទទួលស្គាល់ថាជាវិស័យល្អដែលប្រហាក់ប្រហែលនឹងប្រទេសរីកចំរើនខ្លះលើសកលលោក។ សេចក្តីរាយការណ៍បានបង្ហាញថាក្រៅពី ទន្តបណ្ឌិតដែលមានសញ្ជាតិខ្មែរ ក៏មានទន្តបណ្ឌិតបរទេសជាច្រើនទៀត បាននិងកំពុងធ្វើកិច្ច ការលើវិស័យនេះក្នុងប្រទេសកម្ពុជាដែរ។ ក្នុងសន្និសីទ និងការតាំងពិព័រណ៍ទន្តសាស្ត្រលើក ទី២១នៃសមាគមទន្តពេទ្យកម្ពុជាឆ្នាំ២០២៣ មន្ត្រីក្រសួងសុខាភិបាលបានថ្លែងថា គេបានរៀបចំកិច្ចប្រជុំរៀងរាល់ឆ្នាំ ដើម្បីដុសខាត់វិស័យទន្តសាស្ត្រ ដោយបានអញ្ជើញអ្នកមានបទជំនាញខ្ពស់ផ្តល់ប្រឹក្សា ដើម្បីភាពរីកចំរើនលើវិស័យនេះផងទៀត។ យោងតាមអ្នករៀបចំទន្តបណ្ឌិតបរទេស ដែលគេបានអញ្ជើញចូលរួមមានមកពី៥ប្រទេស ដែលសុទ្ធសឹងជាទន្តបណ្ឌិតល្បីល្បាញ ដើម្បីផ្តល់នូវបទពិសោធន៍ល្អៗ សម្រាប់ការអនុវត្តក្នុងប្រទេសកម្ពុជា។

សម្តេចតេជោ ហ៊ុន សែន បានថ្លែងថាកម្ពុជានឹងអាចធ្វើវិសោធនកម្មរដ្ឋធម្មនុញ្ញរបស់ខ្លួនជុំវិញ ការរារាំងអ្នកមានសញ្ជាតិបរទេសដែលមកធ្វើនយោបាយក្នុងប្រទេសកម្ពុជា។ កម្ពុជាក្នុងរយៈ ៤៤ឆ្នាំចាប់តាំងពីថ្ងៃរំដោះ៧មករាឆ្នាំ១៩៧៩មក បានធ្វើដំណើរឆ្លងកាត់ឧបសគ្គជាច្រើន និងមានមនុស្សបាត់បង់ជីវិតមិនតិចទេដើម្បីបុព្វហេតុធ្វើឱ្យកម្ពុជាមានសុខសន្តិភាព, ស្ថិរភាព នយោបាយនិងការអភិវឌ្ឍន៍។ ប៉ុន្តែឧបសគ្គមួយក្នុងចំណោមឧបសគ្គដែលកម្ពុជាកំពុងប្រឈមនាពេលនេះ គឺមនុស្សមានសញ្ជាតិ២ខ្លះ ដែលធ្វើនយោបាយក្នុងប្រទេសកម្ពុជា បង្កការអុកឡុក និងបំពានច្បាប់របស់កម្ពុជា។ ប៉ុន្តែគ្រាដែលអាជ្ញាធរបានចាប់ខ្លួនជនមានសញ្ជាតិ ២ ឬជនបរទេសនោះ មកដាក់ទោសតាមច្បាប់របស់កម្ពុជា, ស្ថានទូតអ្នកមានសញ្ជាតិបរទេស នោះ បានមកតវ៉ាចង់រកការដោះលែងពលរដ្ឋរបស់ខ្លួន។ សម្តេចតេជោ ហ៊ុន សែន បានថ្លែងថាកម្ពុជានឹងអាចធ្វើវិសោធនកម្មមាត្រារដ្ឋធម្មនុញ្ញរបស់ខ្លួន ជាបន្ថែមទៀតបើសិនជាចាំបាច់។ កម្ពុជាបច្ចុប្បន្ន អ្នកមានសញ្ជាតិ២ខ្លះ ត្រូវគេឃើញកំពុងបំរើកិច្ចការនយោបាយក្នុងជួររាជរដ្ឋាភិបាល និងតាមកន្លែងស្ថាប័នធ្វើនយោបាយមួយចំនួនថែមទៀត។ សម្តេចតេជោ ហ៊ុន សែន បានថ្លែងថាបើស្ថានភាពបន្តការដាក់សម្ពាធរឿងនេះជាដដែលមកលើរាជរដ្ឋាភិបាលកម្ពុជា នឹងអាចជំនះធ្វើកិច្ចការនេះបើទោះបីជាត្រូវលះបង់មនុស្សដល់មន្ត្រីនយោបាយខ្លះដែលមាន សញ្ជាតិ២នោះក៏ដោយ។

ក្រោយការឈប់បាញ់គ្នារយៈ៣៦ម៉ោង សង្គ្រាមក្នុងទឹកដីអ៊ុយក្រែបានបន្ត។ រុស្ស៊ីបានអះអាង ការបាញ់មីស៊ីលសម្លាប់ទាហានអ៊ុយក្រែនចំនួន៦០០នាក់នៅក្នុងក្រុង Kramatorsk នៃខេត្តដូណេតស៍ ប៉ុន្តែអ៊ុយក្រែនថ្លែងថាការវាយប្រហាររបស់រុស្ស៊ី គ្រាន់តែធ្វើឱ្យខូចខាតដល់កន្លែងធ្លាប់ស្នាក់នៅរបស់ទាហានអ៊ុយក្រែនតែប៉ុណ្ណោះ ដោយមិនមានមនុស្សបាត់បង់ជីវិតឡើយ។ លោក ម៉ារ យ៉ារិទ្ធិ រាយការណ៍

ដំណើរការនៃការចាក់វ៉ាក់សាំងកូវីដ១៩ ដូសជំរុញទី៦ បានចាប់ផ្តើមហើយនាពេលនេះ។ ប្រធានគណៈកម្មការចំពោះកិច្ចចាក់វ៉ាក់សាំងបង្ការជំងឺកូវីដ១៩ ទូទាំងប្រទេសលោកស្រី រដ្ឋលេខាធិការ ឱ វណ្ណឌីន នៅព្រឹកថ្ងៃទី៩ ខែមករា ឆ្នាំ២០២៣នេះ បានដឹកនាំក្រុមការងារចុះ ពិនិត្យដំណើរការចាក់វ៉ាក់សាំងបង្ការជំងឺកូវីដ១៩ ដូសជំរុញទី៦ ខណៈដែលពិភពលោកកំពុង ប្រុងប្រយ័ត្ននូវវីរុសបំបែ្លងថ្មីឈ្មោះ XBB។ លោកស្រីរដ្ឋលេខាធិការ នៅបានបញ្ជាក់ដែរថា ថ្ងៃច័ន្ទទី៩មករានេះ គឺជាការចាប់ផ្ដើមការផ្ដល់ ដូសជំរុញទី៦ សម្រាប់អ្នកដែលបានចាក់ដូសទី៥ ក្នុងរយៈពេល៤ ទៅ៦ខែ ហើយក៏មានការផ្ដល់នូវការចាក់ដូសទី៤ ទី៥ ដល់កុមារា កុមារីផងដែរ។ លោកស្រីរដ្ឋលេខាធិការបានថ្លែង បន្ដ ថា ដំណើរការចាក់វ៉ាក់សាំងដូសទី៦ និងដូសជំរុញ ផ្សេងៗទៀតគឺធ្វើឡើងនៅក្របខ័ណ្ឌទូទាំងប្រទេស។ លោកស្រី ឱ វណ្ណឌីន បានបញ្ជាក់ថា រៀងរាល់ថ្ងៃ នៅតាមបណ្ដាមន្ទីរពេទ្យរដ្ឋ មណ្ឌលសុខភាព គឺមានចាក់វ៉ាក់សាំងបង្ការជំងឺកូវីដ១៩នេះដូចៗគ្នា…ដូច្នេះប្រជាពលរដ្ឋ អញ្ជើញចាក់ នៅពេលណាក៏បានដែរ ឲ្យតែខ្លួនដល់វេលាកំណត់។

សម្តេចតេជោ ហ៊ុន សែន បានអំពាវនាវពលរដ្ឋបន្តការចាក់ដូសជំរុញ ដើម្បីពង្រឹងបង្កើនភាព កាន់តែស៊ាំក្នុងសហគមន៍ ដែលប្រសាសន៍ជំរុញនេះ បានធ្វើឡើងទន្ទឹមនឹងសេចក្តីរាយការណ៍ ជុំវិញការឆ្លងរបស់ពិភពលោកនូវមេរោគបំប្លែងថ្មីឈ្មោះ XBB។ ក្រុមអ្នកវិទ្យាសាស្ត្រ បានថ្លែងថាមេរោគបំប្លែងថ្មីនេះ គឺជាមែកធាងមួយទៀតរបស់មេរោគកូវីដ-១៩ប្រភេទអូមីក្រុង។ មេរោគនេះ បានឆ្លងរាលដាលខ្លាំងដូចជាប្រភេទមេរោគអាល់ហ្វា, បេតា, ហ្កាម៉ា និងដែលតា ផងទៀត ចាប់តាំងពីវាបានលេចឡើងនៅចុងឆ្នាំ ២០២១។ ក្រុមអ្នកវិទ្យាសាស្ត្របាននិយាយថាមេរោគ XBB បំប្លែង បានចាប់ផ្ដើមឆ្លងរាលដាល នៅចក្រភពអង់គ្លេសនៅចុងខែកញ្ញា ឆ្នាំ២០២២ ។ អង្គការសុខភាពពិភពលោកបានឲ្យដឹងថា មេរោគបំប្លែងថ្មី XBB នេះ មានសមត្ថភាពលូតលាស់លឿនជាងប្រភេទផ្សេងទៀត របស់ជំងឺកូវីដ-១៩ នោះ ប៉ុន្តែអង្គការសុខភាពពិភពលោកបានឲ្យដឹងថា នៅពុំទាន់មានសញ្ញាណាមួយដែល អាចបញ្ជាក់ថា មេរោគនេះអាចបង្កភាពធ្ងន់ធ្ងរ ឬគ្រោះថ្នាក់ជាងប្រភេទមុនៗរបស់អូមីក្រុងឬយ៉ាងណានោះទេ ។

សម្តេចតេជោ ហ៊ុន សែន បានថ្លែងថានៅថ្ងៃទី១៤ មករា ឆ្នាំ២០២៣ជិតមកដល់នេះ គឺនឹងក្លាយជាខួប៣៨ឆ្នាំ នៃការកាន់អំណាចជានាយករដ្ឋមន្ត្រីរបស់កម្ពុជា។ គួរបញ្ជាក់ថាសម្តេចតេជោ ហ៊ុន សែន ត្រូវបានរដ្ឋសភាក្នុងឆ្នាំ១៩៨៥នាជំនាន់នោះ បោះឆ្នោតក្លាយជាប្រធានក្រុមប្រឹក្សារដ្ឋមន្ត្រី ដែលមានឋានៈស្មើនឹងនាយករដ្ឋមន្ត្រី។ នៅថ្ងៃទី១៤មករាខាងមុខនេះ សម្តេចនឹងយកថ្ងៃខួបរំលឹកទិវា៣៨ឆ្នាំនោះ ដើម្បីជួបជាមួយអ្នកកាសែតទូទាំងប្រទេសក្នុងរាត្រីសមោសររបស់ក្រុមអ្នកសារព័ត៌មាន។ រាត្រីសមោសរជួបជុំជាមួយក្រុមអ្នកសារព័ត៌មាន បានផ្អាករយៈពេលប្រមាណ៣ឆ្នាំរួចមក ហើយដោយសារតែវិបត្តិឆ្លងជម្ងឺកូវីដ១៩។ ថ្ងៃទី១៤មករាឆ្នាំ២០២៣ចុងសប្តាហ៍នេះ គឹជាលើក ដំបូងហើយដែលរាត្រីសមោសរជាមួយក្រុមអ្នកសារព័ត៌មានទូទាំងប្រទេសត្រូវបានរៀបលើក ដំបូងសាឡើងវិញក្រោយស្ថានការណ៍ឆ្លងកូវីដ១៩ត្រូវបានគ្រប់គ្រងល្អដោយរាជរដ្ឋាភិបាលកម្ពុជា។

កំណាត់ផ្លូវជាតិលេខ៧ ពីស្គន់ទៅក្រុងកំពង់ចាម ត្រូវបានបើកការដ្ឋានសាងសង់នាព្រឹកថ្ងៃទី៩ មករា ឆ្នាំ២០២៣នេះហើយ ក្រោមអធិបតីភាពសម្តេចតេជោ ហ៊ុន សែន។ ឯកអគ្គរដ្ឋទូត ចិន លោកវ៉ាង វិនធៀន ក៏មានវត្តមានក្នុងឱកាសនោះផងដែរ។ គម្រោងពង្រីកនិងលើកកម្រិតគុណភាពកំណាត់ផ្លូវជាតិលេខ៧ដែលមានប្រវែងសរុបជាង ៤៥គីឡូម៉ែត្រ ចាប់ពីរង្វង់មូលស្គន់ ទីរួមស្រុកជើងព្រៃ ទៅដល់រង្វង់មូលគល់ស្ពានគីហ្សូណា ក្រុងកំពង់ចាម គឺជាឥណទានសម្បទានពីរដ្ឋាភិបាលចិន រួមជាមួយនឹងថវិកាបដិភាគរបស់រាជ រដ្ឋាភិបាលកម្ពុជាសារុបចំនួនជាង១១៧លានដុល្លារ។ សម្តេចតេជោ ហ៊ុន សែន បានថ្លែងថាបើ គ្មានផ្លូវនិងគ្មានស្ពាន កម្ពុជាមិនអាចអភិវឌ្ឍន៍បានទេ។ គម្រោងពង្រីក និងលើកកម្រិតគុណភាពកំណាត់ផ្លូវជាតិលេខ៧នេះ នឹងត្រូវប្រើប្រាស់រយៈ ពេលសាងសង់ចំនួន ៤០ខែ ដែលនឹងបញ្ចប់នៅក្នុងឆ្នាំ២០២៦។ សម្តេចតេជោសែន បានថ្លែងសង្កត់ធ្ងន់ថាការអភិវឌ្ឍជាតិនេះហើយ គឺជាកត្តាចាំបាច់ណាស់ដែលជួយជំរុញប្រទេសឱ្យមានសន្តិភាពយូរអង្វែង។