ព្រឹត្តិការណ៍បុណ្យរំលឹកគុណអង្គរ លើទឹកដីក្រុងអង្គរខេត្តសៀមរាប បានចាប់ផ្តើមបើកនៅថ្ងៃទី១៤ធ្នូនេះ ដោយមានពិធីសាសនារាប់បាត្រព្រះសង្ឃ១៣០អង្គ នៅខេត្តសៀមរាប។ លោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្រ្តី និងជារដ្ឋមន្រ្តីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច បានអញ្ជើញជាអធិបតីក្នុងពិធីបើកព្រឹត្តិការណ៍បុណ្យរំលឹកគុណអង្គរនេះ។ ព្រឹត្តិការណ៍បុណ្យរំលឹកគុណអង្គរនេះ បានធ្វើពិធីបើកនៅចំទិវារំលឹកខួបលើកទី៣០ឆ្នាំ នៃការដាក់បញ្ចូលរមណីយដ្ឋានអង្គរក្នុងបញ្ជីបេតិកភណ្ឌពិភពលោករបស់អង្គការយូណេស្កូ។ លោកជំទាវកិត្តិសង្គហបណ្ឌិត ម៉ែន សំអន បានថ្លែងអបអរខួបលើកទី៣០នេះ និងបញ្ជាក់ថា ព្រឹត្តិការណ៍បុណ្យរំលឹកគុណអង្គរនេះ គឺក្នុងគោលបំណងរំលឹកគុណអង្គព្រះមហាក្សត្រគ្រប់ព្រះអង្គ និងបុព្វការីជន ដែលបានកសាងថែរក្សាប្រាសាទទាំងអស់ នៅក្នុងរមណីយដ្ឋានអង្គរ។ លោកជំទាវបានថ្លែងទៀតថា «ក្នុងនាមជាអ្នកជំនាន់ក្រោយ យើងត្រូវបង្កើនការខិតខំប្រឹងប្រែងទ្វេរឡើងថែមទៀត ដើម្បីអភិវឌ្ឍប្រទេសកម្ពុជា និងការពារឱ្យបានដាច់ខាតនូវសន្តិភាព ស្ថិរភាពសង្គម ដែលជាកត្តាសំខាន់សម្រាប់ជួយឱ្យជាតិកម្ពុជាទទួលបានកិត្តិនាមល្បីល្បាញលើឆាកអន្តរជាតិ។ ពិធីរំលឹកគុណអង្គររវាងពីថ្ងៃទី១៤ដល់ទី១៦ ខែធ្នូ នឹងរួមមានកម្មវិធីសាសនា, ពិធីស្ដង់ពិព័រណ៍ និងការសម្ដែងសិល្បៈបុរាណនៅពេលរាត្រី និងកម្មវិធីកម្សាន្តជាច្រើនទៀត។

រាជរដ្ឋាភិបាលកម្ពុជាបានអបអរខួបលើកទី៣០ឆ្នាំ នៃការដាក់បញ្ចូលរមណីយដ្ឋានអង្គរ ក្នុងបញ្ជីបេតិកភណ្ឌពិភពលោករបស់អង្គការយូណេស្កូ។ ប្រាសាទអង្គរត្រូវបានចុះបញ្ចូលក្នុងបញ្ជីសម្បត្តិបេតិកភ័ណ្ឌពិភពលោករបស់អង្គការយូណេស្កូ នៅថ្ងៃទី១៤ ខែធ្នូ ឆ្នាំ ១៩៩២ នាទីក្រុងសាន់តាហ្វេ ក្នុងសហរដ្ឋអាមេរិក ។ សម្តេចតេជោ ហ៊ុន សែន ដែលកំពុងបំពេញទស្សនកិច្ចក្នុងទ្វីបអឺរ៉ុប បានសរសេរថា «ថ្ងៃទី១៤ ខែធ្នូ ឆ្នាំ២០២២នេះ គឺជាខួបលើកទី៣០ឆ្នាំ នៃការដាក់បញ្ចូលរមណីយដ្ឋានអង្គរ ក្នុងបញ្ជីបេតិកភណ្ឌពិភពលោក របស់អង្គការយូណេស្កូ។ នេះគឺជាការរំឭកស្មារតីកូនខ្មែរគ្រប់រូប ឲ្យចេះស្រឡាញ់ និងចូលរួមថែរក្សាបេតិកភណ្ឌ ជាពិសេស គឺសម្តែងនូវការដឹងគុណដ៏ជ្រាលជ្រៅដល់បុព្វបុរសខ្មែរ ដែលបានពលិកម្ម ដើម្បីបុព្វហេតុអារ្យធម៌ដ៏រុងរឿងរបស់ខ្មែរ នាសម័យអតីតកាល និងការតស៊ូជាបន្តបន្ទាប់របស់ថ្នាក់ដឹកនាំប្រទេស ក្នុងការជម្នះរាល់ឧបសគ្គទាំងឡាយការពារ ឲ្យបាននូវសម្បត្តិបេតិកភណ្ឌដ៏មាន តម្លៃរបស់ជាតិ និងពិភពលោកទាំងមូល»។ សម្តេចតេជោ ហ៊ុន សែន ក្នុងសំណេរតាមបណ្តាញសង្គម «បានប្តេជ្ញាចិត្តយ៉ាងមុតមាំក្នុងការអភិរក្សបេតិកភណ្ឌមួយដ៏អស្ចារ្យនេះ» ។

សម្តេចតេជោ ហ៊ុន សែន បានអញ្ជើញចូលរួមកិច្ចប្រជុំកំពូលអាស៊ានអឺរ៉ុបលើកទី៤៥ ដែលសម្តេច និងប្រធានក្រុមប្រឹក្សាអឺរ៉ុបលោក Charles Michel បានធ្វើជាសហប្រធាន។ខួបអនុស្សាវរីយ៍លើកទី៤៥ នៃកិច្ចប្រជុំកំពូលអាស៊ានអឺរ៉ុបនេះ បានធ្វើឡើងនៅថ្ងៃទី១៤ ខែធ្នូ ឆ្នាំ២០២២ នៅទីក្រុងប្រុចសែល នៃប្រទេសបែលហ្ស៊ីក ដែលមានការចូលរួមពីបណ្តាមេដឹកនាំអាស៊ាន និងមេដឹកនាំក្នុងសហភាពអឺរ៉ុប។ អឺរ៉ុបគឺជាដៃគូពាណិជ្ជកម្មធំទី៣ជាមួយនឹងអាស៊ានបន្ទាប់ពីសហរដ្ឋអាមេរិកនិងប្រទេសចិន។ ទំហំពាណិជ្ជកម្មរវាងអឺរ៉ុបនិងអាស៊ាន មាន២២៩ពាន់លាននិង៩សែនដុល្លារអាមេរិក។ អាស៊ាននិងអឺរ៉ុប បានក្លាយជាដៃគូសន្ទនានឹងគ្នាចាប់តាំងពីឆ្នាំ១៩៧៧។ សហភាពអឺរ៉ុបដែលរួមមាន២៧ប្រទេសជាមួយនឹងប្រជាជន៤៤៧លាននាក់ គឺជាមជ្ឈមណ្ឌលសេដ្ឋកិច្ចនិងនយោបាយដ៏ទូលំទូលាយមួយរបស់ពិភពលោក។ ចំណែកអាស៊ានដែលមានប្រទេសចំនួន១០ ជាមួយនឹងពលរដ្ឋជាង៦៨៤លាននាក់ ក៏ជាមជ្ឈមណ្ឌលនៃភាពរីកចំរើនដំណើរការសេដ្ឋកិច្ច និងក៏ជាតំបន់ដែលរួមចំណែកដល់កត្តាស្ថិរភាព និងនយោបាយ ក្នុងតំបន់ក៏ដូចជាពិភពលោកផងដែរ។

សម្តេចតេជោ ហ៊ុន សែន បានចូលរួមក្នុងសន្និសីទអន្តរជាតិគាំទ្រភាពធន់ នៃប្រជាជនអ៊ុយក្រែន ដែលបានរៀបចំធ្វើឡើងនៅក្នុងទីក្រុងប៉ារីស នៃប្រទេសបារាំង។ ប្រធានាធិបតីបារាំង លោក អេម៉ានូអែល ម៉ាក្រុង បានសរសេរក្នុងបណ្តាញសង្គមថាសង្គ្រាមរុស្ស៊ីក្នុងប្រទេសអ៊ុយក្រែនបានបណ្តាលឱ្យការឈឺចាប់ជាខ្លាំង។ លោកម៉ាក្រុងបានសរសេរបន្តថាបារាំងរួមជាមួយនឹងកម្ពុជា សូមអំពាវនាវដល់រុស្ស៊ីបញ្ឈប់ការវាយប្រហារដាក់លើពលរដ្ឋស៊ីវិល និងលើហេដ្ឋារចនាសម្ព័ន្ធអ៊ុយក្រែនជាបន្ទាន់។ លោកម៉ាក្រុងបានអំពាវនាវប្រទេសជាដៃគូអន្តរជាតិចូលរួមគ្នាក្នុងការអំពាវនាវនេះ។ អប្សរាណិតរាយការណ៍

តួលេខឆ្លងថ្មីកូវីដ១៩ ក្នុងប្រទេសអាស៊ាននៃរយៈពេល ២៤ម៉ោងចុងក្រោយនេះ បានបន្តថយចុះចំនួន ៤ពាន់ ២៣៦ករណី ថែមទៀតបើប្រៀបធៀបនឹងតួលេខឆ្លងកាលពីម្សិលមិញ ។ តួលេខឆ្លងថ្មីកូវីដ១៩ នៅថ្ងៃនេះ មានចំនួន ៤ពាន់ ៣៧៩ករណី ដែលឆ្លងលើប្រទេសចំនួន ៨ នៅអាស៊ាន រួមមានប្រទេស ឥណ្ឌូនេស៊ី, ម៉ាឡេស៊ី, វៀតណាម, មីយ៉ាន់ម៉ា, សឹង្ហបុរី, ហ្វីលីពីន, ឡាវ និងប្រទេសកម្ពុជា ។ ប្រទេសឥណ្ឌូនេស៊ី នៅតែជាប្រទេសដែលមានតួលេខឆ្លង ច្រើនជាងគេដដែល ដែលមាន ចំនួន ១ពាន់ ២២៥ករណី ។ តួលេខឆ្លងតិចជាងគេ គឺប្រទេស មីយ៉ាន់ម៉ា ដែលមានចំនួនតែ ៥ករណី ។ ប្រទេសប្រុយណេ និងប្រទេសថៃ ជាប្រទេសដែល គ្មានសេចក្តីរាយការណ៍ជុំវិញតួលេខឆ្លង និងស្លាប់ឡើយ ក្នុងរយៈពេល ២៤ម៉ោងចុងក្រោយនេះ ។ តួលេខស្លាប់ដោយសារកូវីដ១៩ ក្នុងប្រទេសអាស៊ានរយៈពេល ៧២ម៉ោងចុងក្រោយនេះ មានចំនួន ៥៩នាក់ ក្នុងនោះប្រទេសឥណ្ឌូនេស៊ី មានមនុស្សស្លាប់ចំនួន…

តួលេខឆ្លងថ្មីកូវីដ១៩នៅកម្ពុជា បានបន្តកើនឡើង១ករណីបន្ថែមទៀតហើយ ក្នុងរយៈពេល ២៤ម៉ោងចុងក្រោយនេះ។ ការឆ្លងថ្ងៃនេះមានចំនួន២៦ករណីក្នុងរដូវដែលមានអាកាសធាតុ ចុះត្រជាក់ជាងធម្មតា។ តួលេខឆ្លងថ្ងៃនេះ គឺជាតួលេខកើនខ្ពស់គួរឲ្យកត់សម្គាល់ ក្នុងរយៈ ពេលជាង ២ខែកន្លងមកនេះក្នុងដំណាក់កាលដែលកម្ពុជាកំពុងរៀនរស់នៅជាមួយនឹងជម្ងឹកូវីដ១៩។ កម្ពុជានៅតែបន្តការចាក់វ៉ាក់សាំងកូវីដ១៩ ជាដដែល ដើម្បីជម្រុញភាពស៊ាំក្នុងសហគមន៍ ។ តួលេខអ្នកចាក់វ៉ាក់សាំងដូសមូលដ្ឋានទូទាំងប្រទេស គិតត្រឹមថ្ងៃទី១៣ ធ្នូនេះ បានកើនដល់ចំនួន ១៥លាន ២៣ម៉ឺន ២ពាន់ ៨០៤នាក់ ដែលស្មើនឹង ៩៥,២១ ភាគរយ ៕

បណ្តាខេត្តក្នុងប្រទេសកម្ពុជាអាចមានទទួលនូវភាពចុះត្រជាក់កម្រិតអប្បបរមាក្នុងរង្វង់ពី ១៦ទៅ២០ អង្សាសេ ក្នុងសប្ដាហ៍កំពុងឈានមកដល់នេះ ខណៈកម្ពុជាបានទទួលរងនូវឥទ្ធិពល ពីទ្រនុងសម្ពាធខ្ពស់ចិន និងខ្យល់មូសុងឦសាន្តក្នុងកម្រិតពីបង្គួរទៅខ្លាំង ។ យោងតាមការព្យាករណ៍របស់ក្រសួងធនធានទឹក និងឧតុនិយមរវាងពីថ្ងៃទី១៤ រហូតដល់ថ្ងៃទី២០ ខែធ្នូ, នៅតំបន់ទំនាបកណ្តាល នឹងមានសីតុណ្ហភាពអប្បបរមារវាងពី ១៨ទៅ២២ អង្សាសេ , សីតុណ្ហភាពអតិបរមា មានរវាងពី ២៩ទៅ៣១ អង្សាសេ។ តាមការព្យាករណ៍ បណ្តាខេត្តដែលនឹងអាចចុះត្រជាក់ក្នុងសីតុណ្ណភាពអប្បបរមា រង្វង់ពី ១៦ទៅ១៩ អង្សាសេ នោះ គឺដូចជា នៅខេត្តបន្ទាយមានជ័យ, ខេត្ដប៉ៃលិន, ខេត្ដសៀមរាប និងខេត្តបាត់ដំបង ។ ចំណែកនៅតំបន់ខ្ពង់រាប សីតុណ្ហភាពអប្បបរមាអាចមានរវាងពី១៦ទៅ១៩ អង្សាសេ និង សីតុណ្ហភាពអតិបរមា នឹងមានរវាងពី ២៨ទៅ៣០ អង្សាសេ ។ រីឯខេត្ដដែលអាចចុះត្រជាក់ ក្នុងសីតុណ្ហភាពអប្បបរមា រង្វង់ពី ១៦ទៅ១៨ អង្សាសេ នោះរួមមាន ខេត្តមណ្ឌលគិរី, ខេត្ដរតនគិរី, ខេត្ដព្រះវិហារ និងខេត្តឧត្តរមានជ័យ ។ ចំណែកនៅតំបន់មាត់សមុទ្ទនោះវិញ សីតុណ្ហភាពអប្បបរមា…

ធនាគារអភិវឌ្ឍន៍អាស៊ី ADB បានអនុម័តកញ្ចប់ថវិកាចំនួន៦២លាន៩សែនដុល្លារ ដើម្បីជួយកម្ពុជាក្នុងការស្តារឡើងវិញសន្តិសុខស្បៀង និងបសុពេទ្យ។ សេចក្ដីប្រកាសព័ត៌មាន របស់ធនាគារអភិវឌ្ឍន៍អាស៊ី ដែលបណ្ដាញព័ត៌មានទទួលបាននៅថ្ងៃទី១៣ ខែធ្នូ ឆ្នាំ២០២២ បានដកស្រង់សម្តីអ្នកជំនាញជាន់ខ្ពស់ផ្នែកបំរែបំរួលអាកាសធាតុរបស់ ADB ប្រចាំតំបន់អាស៊ីអាគ្នេយ៍ លោក ស្រ៊ីនីវ៉ាសាន់ អានឆា Srinivasan Ancha ដែលបញ្ជាក់លើភាពចាំបាច់ នៃសារៈសំខាន់លើអនុវិស័យបសុសត្វពាក់ព័ន្ធនឹងជីវភាពរស់នៅតាមតំបន់ជនបទ ប្រកបដោយនិរន្តរភាព និងកត្តាសន្តិសុខស្បៀងនៅក្នុងប្រទេសកម្ពុជា ដែលនឹងផ្តល់ឱកាសជាច្រើន សម្រាប់កសិករលក្ខណៈគ្រួសារ រួមទាំងស្ត្រី និងកសិអាជីវកម្មខ្នាតតូច និងមធ្យម។ លោកបានថ្លែងថាសត្វពាហនៈ និងក្របី ស្ទើរតែទាំងអស់គឺជាកម្មសិទ្ធិរបស់កសិករលក្ខណៈគ្រួសារ ទោះបីជាផលិតកម្មជ្រូក និងបសុបក្សីកំពុងមានលក្ខណៈជាពាណិជ្ជកម្ម កាន់តែខ្លាំងឡើងក៏ដោយ។ មន្ត្រីអេឌីប៊ីបន្តថាជំនួយនេះនឹងអនុញ្ញាតឱ្យអនុវិស័យនេះអាចទាញយកសក្តានុពល នៃកំណើនខ្ពស់ នាំមកដោយការកើនឡើង នៃការប្រើប្រាស់សាច់ក្នុងស្រុក ដែលកើតឡើងដោយសារកំណើនសេដ្ឋកិច្ច នគរូបនីយកម្ម ចំនួនប្រជាជនកើនឡើង ឱកាសពាណិជ្ជកម្ម និងការធ្វើឱ្យប្រសើរជាលំដាប់ក្នុងការគ្រប់គ្រងជំងឺ និងអាហារូបត្ថម្ភសម្រាប់សត្វ»។

ប្រជាពលរដ្ឋខ្សត់ខ្សោយចំនួន ៦៤គ្រួសារ នៅឃុំសំរោង ស្រុកស្វាយអន្ទរ ខេត្តព្រៃវែង បានទទួលអំណោយអង្ករ គ្រឿងឧបភោគ បរិភោគ គិតជាថវិកាសរុបចំនួនជាង ២៥លានរៀល ពីក្រុមការងារចុះជួយមូលដ្ឋានស្រុកស្វាយអន្ទរ ដឹកនាំដោយឯកឧត្តម ស៊ាង ប៊ុនលាង ទីប្រឹក្សាផ្ទាល់របស់សម្តេចតេជោ ហ៊ុន សែន និងលោកជំទាវអគ្គមហាឧបាសិកាពុទ្ធសាសនូបត្ថម្ភក៍ ហ៊ុន ប៊ុនធឿន។ អប្សរាណិតធ្វើសេចក្តីរាយការណ៍