ព្រះមហាក្សត្រខ្មែរសម្តេចព្រះបរមនាថ នរោត្តម សីហមុនី បានយាងវិលត្រឡប់មករាជធានីភ្នំពេញវិញហើយ ក្រោយព្រះរាជទស្សនកិច្ច ក្នុងប្រទេសជប៉ុន រយៈពេល៤ថ្ងៃ ដើម្បីចូលរួមក្នុងពិធីសាសនាមួយ ដែលចូលរួមជាច្រើនប្រទេស។ ព្រះរាជដំណើរយាងវិលត្រឡប់នារសៀលថ្ងៃទី៩មេសា បានអញ្ជើញទទួលដោយសម្តេចអគ្គមហាសេនាបតីតេជោ ហ៊ុន សែន ប្រធានក្រុមឧត្តមប្រឹក្សាផ្ទាល់ព្រះមហាក្សត្រ និងជាប្រធានព្រឹទ្ធសភា, សម្តេចអគ្គមហាពញាចក្រី ហេង សំរិន ប្រធានកិត្តិយសឧត្តមក្រុមប្រឹក្សាផ្ទាល់ព្រះមហាក្សត្រ, សម្តេចវិបុលសេនាភក្តី សាយ ឈុំ ឧត្តមក្រុមប្រឹក្សាផ្ទាល់ព្រះមហាក្សត្រ, សម្តេចមហារដ្ឋសភាធិការបតី ឃួន សុដារី ប្រធានរដ្ឋសភា, សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី, ព្រះរាជវង្សានុវង្ស, មន្ត្រីទូត និងមន្ត្រីជាន់ខ្ពស់នានាតាមបណ្តាស្ថាប័នរដ្ឋជាច្រើនថែមទៀត។ ព្រះអង្គបានយាងមាតុភូមិនិវត្តន៍មកវិញ នារសៀលថ្ងៃទី៩ មេសា ឆ្នាំ២០២៤។

ក្រសួងសុខាភិបាល បានរកឃើញអ្នកឆ្លងជម្ងឺអុតស្វាថ្មីចំនួន ៣នាក់បន្ថែមទៀត ដែលនាំឱ្យចំនួនអ្នកឆ្លងសរុបបានកើនដល់ ១៧នាក់ហើយ ក្នុងប្រទេសកម្ពុជា។ អ្នកឆ្លងអុតស្វាទាំង៣ ដែលគេមិនបញ្ចេញអត្តសញ្ញាណនេះ ត្រូវបានបញ្ជាក់ថា ជាពលរដ្ឋស្នាក់នៅក្នុងរាជធានីភ្នំពេញ និងកំពុងសម្រាកព្យាបាលនៅមន្ទីរពេទ្យ។ ជម្ងឺអុតស្វា ត្រូវគេរកឃើញកើតឡើងដំបូង ក្នុងប្រទេសកម្ពុជាកាលពីខែសីហា ឆ្នាំ២០២២ កើតលើជនជាតិនីហ្សេរីយ៉ា និងក្រោយមកទើបមានការកើតជាបន្តបន្ទាប់ នៅក្នុងរាជធានីភ្នំពេញ ក្នុងឆ្នាំ២០២៣។ ជម្ងឺអុតស្វាអាច ឆ្លងពីមនុស្សម្នាក់ទៅមនុស្សម្នាក់ទៀត តាមរយៈការរួមភេទគ្រប់ទម្រង់ ជាមួយអ្នកកើតជំងឺនោះ, និងការប៉ះពាល់ដោយផ្ទាល់នឹងកន្លែងមានដំបៅ, ទឹកសារពាង្គកាយ, ទឹកមាត់, តំណក់តូចៗ តាមផ្លូវដង្ហើម និងសម្ភារៈប្រើប្រាស់ដែលប្រឡាក់ប្រឡូក ជាមួយនឹងវីរុស រួមមានសម្លៀកបំពាក់ ពូក កន្លែង ឬសម្ភារៈ ស្លាបព្រា ចាន និងកែវទឹកជាដើម។ ក្រសួងសុខាភិបាលបានថ្លែងថា ការផ្ទុះឆ្លងនៃជម្ងឺអុតស្វាគិតត្រឹមថ្ងៃទី២៥ មករា ឆ្នាំ២០២៤ នៅទូទាំងសកលលោក មានមនុស្សឆ្លងចំនួន ៩ម៉ឺន ៣ពាន់ ៣០នាក់ ក្នុងប្រទេសចំនួន ១១៧ មានអ្នកស្លាប់ចំនួន ១៧៦នាក់។

ពិធីបុណ្យបង្សុកូលរំលឹកឧទ្ទិសដល់បុព្វបុរសដែលមានគុណបំណាច់ ចំពោះសម្តេចតេជោ ហ៊ុន សែន ត្រូវបានប្រារព្ធធ្វើឡើងនៅក្នុងវត្តបុទុមវតី ដែលជាពិធីមួយមិនដែលខកខានឡើយ ជារៀងរាល់ឆ្នាំ នៅមុនបុណ្យចូលឆ្នាំខ្មែរប្រពៃណីជាតិ។ លោកយាយមហាឧបាសិកា ឌី ប៉ុក ដែលជាមាតាបង្កើតរបស់សម្តេចអគ្គមហាសេនាបតីតេជោ ហ៊ុន សែន បានទទួលអនិច្ចកម្មក្នុងខែមីនា ឆ្នាំ១៩៩៨ ក្នុងព្រះជន្ម៧៩វស្សា ចំណែកអ្នកឧកញ៉ាមហាភក្តីសប្បុរិសភោគាធិបតី ហ៊ុន នាង បានទទួលមរណភាពក្នុងព្រះជន្ម ៨៩វស្សា។ សម្តេចតេជោ ហ៊ុន សែន បើទោះបីបានធ្វើឱ្យកម្ពុជាទទួលបានសុខសន្តិភាព និងជួយមនុស្សរាប់លាននាក់ ផុតពីគ្រោះមហន្តរាយសង្គ្រាមស៊ីវិលនោះក៏ដោយ ប៉ុន្តែមាតារបស់សម្តេច មិនបានឃើញនូវពន្លឺសន្តិភាពពិតប្រាកដ នៃស្នាដៃកូនប្រុសប្រសូតក្រោមពន្លឺព្រះចន្ទពេញបូរមីឡើយ។ អប្សរាណិតរាយការណ៍ជុំវិញពិធីបុណ្យបង្សុកូល ឧទ្ទិសដល់មាតា និងបិតាសម្តេចតេជោដែលបានចែកស្ថានទៅ

ជនសង្ស័យប្រុសស្រីចំនួន ២នាក់ និងគ្រឿងញៀនជាង ១៧គីឡូក្រាម ត្រូវសមត្ថកិច្ចបង្រ្កាបបាននៅ ២ទីតាំងផ្សេងគ្នា ក្នុងរាជធានីភ្នំពេញ។ មន្ទីរប្រឆាំងបទល្មើសគ្រឿងញៀនបានឱ្យដឹងថា នៅថ្ងៃទី៨ ខែមេសា ឆ្នាំ២០២៤នេះ ការបង្ក្រាបគោលដៅទី១ នៅចំណុចមុខខារ៉ាអូខេ Two sister ក្នុងសង្កាត់ទួលសង្កែ ខណ្ឌឫស្សីកែវ និងគោលដៅទី២ នៅក្នុងភូមិបាក់ទូក សង្កាត់ទួលសង្កែ ខណ្ឌឬស្សីកែវ។ ប្រតិបត្តិការនេះបានធ្វើឡើងនៅវេលាម៉ោង៥ និង២០នាទី ថ្ងៃទី០៥ ខែមេសា ឆ្នាំ២០២៤ ដោយបានឃាត់ខ្លួនជនសង្ស័យចំនួន ២នាក់ ទី១៖ ឈ្មោះ គ្រុយ សុខផាត ភេទប្រុស អាយុ ៤៣ឆ្នាំ និងឈ្មោះ ក្រាយ ស្រីមុំ ភេទស្រី អាយុ ៤២ឆ្នាំ។ សមត្ថកិច្ចដកហូត សារធាតុញៀន ប្រភេទមេតំហ្វេតាមីន ទម្ងន់ ១៥គីឡូក្បៀស១៩៤ក្រាម, សារធាតុញៀនប្រភេទ អ៊ិចស្តាស៊ី (MDMA) ទម្ងន់ ១គីឡូក្បៀស៣៩៩.៩៦ក្រាម, សារធាតុញៀនប្រភេទ កេតាមីន (Ketamine) ទម្ងន់…

ក្រុមហ៊ុន Sunwah Group ដែលមានទីតាំងក្នុងក្រុងហុងកុង បានបង្ហាញនូវបំណងចង់វិនិយោគលើវិស័យមួយចំនួន ក្នុងប្រទេសកម្ពុជា។ ក្រុមហ៊ុន Sunwah Group បានថ្លែងថា គេចង់បណ្តាក់ទុន លើការអភិវឌ្ឍន៍តំបន់សេដ្ឋកិច្ចពិសេសបៃតង ការវិនិយោគលើការកសាងអគារពាណិជ្ជកម្ម និងលំនៅស្ថានខុនដូ ការវិនិយោគលើវិស័យទេសចរណ៍ ការវិនិយោគលើការដំឡើងស្ថានីយសាកថាមពលយានយន្តអគ្គិសនី និងការវិនិយោគលើការកសាងស្ថានីយបណ្តាញទូរគមនាគមន៍ 5G។ អប្សរាណិតរាយការណ៍

ក្រុម Think Tank ដែលមានមូលដ្ឋានក្នុងតំបន់អាស៊ីប៉ាស៊ីហ្វិក បានស្នើកម្ពុជាលើការរៀបចំកិច្ចប្រជុំកំពូលសាកលស្តីពី បច្ចេកវិទ្យា និងសេដ្ឋកិច្ចចិន និងកិច្ចប្រជុំកំពូលស្តីពី សហគ្រិនភាព និងសេដ្ឋកិច្ចអាស៊ីឆ្នាំ២០២៤។ សំណើរបស់វិទ្យាសាស្ត្រ KSI ត្រូវបានលើកឡើងដោយប្រធានរបស់ខ្លួនលោក តាន់ ស្រ៊ី ម៉ៃខុល យ៉ាវ ក្នុងការអញ្ជើញជួបសម្តេចធិបតីនាយករដ្ឋមន្ត្រី នាថ្ងៃទី៨ មេសា ឆ្នាំ២០២៤។ កញ្ញា គង់ សុផុល រាយការណ៍

អយ្យការតុលាការ បានឃុំខ្លួនឈ្មោះ កើត សារ៉ាយ និងបក្ខពួកចំនួន៤នាក់ ក្រោយការចោទប្រកាន់ «អំពើញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម»។ លោក កើត សារ៉ាយ អាយុ៣២ឆ្នាំ នៃប្រធានសមាគមសម្ព័ន្ធនិស្សិតបញ្ញវន្តខ្មែរ ត្រូវបានសមត្ថកិច្ចឃាត់ខ្លួនសាកសួរនៅថ្ងៃទី៥មេសា ជាមួយបក្ខពួក និង២ថ្ងៃក្រោយមក ត្រូវបានតុលាការ បានចោទប្រកាន់ ពាក់ព័ន្ធនឹងការផ្សាយបំភ្លៃព័ត៌មានមិនពិត ក្នុងចេតនាបញ្ឆេះកំហឹងប្រជាពលរដ្ឋ ឱ្យមានការថ្នាំងថ្នាក់ជាមួយរាជរដ្ឋាភិបាល»។ អប្សរាណិតរាយការណ៍

សម្តេចតេជោ ហ៊ុន សែន បានទទួលជួបឯកអគ្គរដ្ឋទូតសាធារណរដ្ឋសហភាពមីយ៉ាន់ម៉ា និងបញ្ជាក់ពីបំណងចង់ជួបសន្ទនាតាមវីដេអូ Conference ជាមួយប្រធានក្រុមប្រឹក្សារដ្ឋបាល លោក មីន អោងឡាំង។ សម្តេចតេជោស្នើរកកិច្ចជួបសន្ទនាដែលអាចធ្វើនៅមុនសង្ក្រាន្ត ឬនៅក្រោយសង្ក្រាន្តឆ្នាំថ្មីក៏បាន។ អប្សរាណិតរាយការណ៍

សហគមន៍នេសាទគោកស្តៅក្នុងស្រុករលាប្អៀរ ដែលត្អូញត្អែរជុំវិញត្រីងាប់នៅក្នុងបឹងអភិរក្ស ដោយសារតែអាកាសធាតុក្តៅហួតហែងនោះ នាពេលនេះ ត្រូវបានអភិបាលខេត្តកំពង់ឆ្នាំង បានផ្តល់ថវិកាមួយលានរៀល ដើម្បីជួយបង្ហូរយកទឹកជួយត្រីដែលប្រឈមនឹងការងាប់។ បឹងអភិរក្សមេពូជត្រី ”រនាបសែន” បានរងនឹងការរីងទឹក ដែលបារម្ភថាត្រីពូជដូចជាត្រីឆ្ពិន ត្រីសណ្តាយ ត្រីក្អីឬត្រីក្រាយ ត្រីច្រកែង ត្រីកេះ ត្រីឆ្តោរ ជាដើមនឹងត្រូវងាប់ បើសិនជាមិនមានការជួយអន្តរាគមន៍ទាន់ពេលនោះទេ ខណៈមេឃនៅតែបន្តរាំងស្ងួតមិនទាន់ធ្លាក់ភ្លៀងឡើយ។ ប្រធានសហគមន៍នេសាទគោកស្តៅ លោក មាស សុវណ្ណ បានថ្លែងអំណរគុណ ថ្នាក់ដឹកនាំខេត្តកំពង់ឆ្នាំង ជាពិសេសលោក ស៊ុន សុវណ្ណារិទ្ធិ និងមន្ទីរពាក់ព័ន្ធ ដែលតែងតែយកចិត្តទុកដាក់ ក្នុងកិច្ចការងារអភិរក្សការពារធនធានធម្មជាតិ ដើម្បីជួយសត្វត្រីទាំងនោះ មិនឱ្យងាប់ដាច់ពូជ។ នៅជាមួយគ្នាផងដែរមន្ទីរធនធានទឹក និងឩតុនិយម, មន្ទីរកសិកម្មរុក្ខាប្រមាញ់ និងនេសាទខេត្តកំពង់ឆ្នាំង ក៏បានឩបត្ថម្ភប្រេងម៉ាស៊ូត សម្រាប់បូមទឹកសង្រ្គោះចំនួន ១០០លីត្រ និងផ្ទាំងSolar បំភ្លឺ១ផងដែរ។

ខេត្តចំនួន១៤ ដែលខ្វះទឹក ក្នុងការជួយស្រោចស្រពស្រូវ ត្រូវបានក្រសួងធនធានទឹកជួយសង្គ្រោះ។ រដ្ឋមន្ត្រីក្រសួងធនធានទឹក និងឧតុនិយម លោក ថោ ជេដ្ឋា បានបញ្ជាក់ការជួយធ្វើអន្តរាគមន៍ របស់ក្រសួង ចំពោះខេត្តទាំង១៤ ក្នុងឆ្នាំ២០២៤នេះ ក្នុងកិច្ចប្រជុំបូកសរុបលទ្ធផលការងារអន្តរាគមន៍សង្គ្រោះស្រូវប្រាំង ជូនប្រជាកសិករ ឆ្នាំ២០២៤ របស់ក្រសួងធនធានទឹក និងឧតុនិយម នាថ្ងៃទី៤ មេសា ឆ្នាំ២០២៤។ លោករដ្ឋមន្ត្រីបានថ្លែងថា ចាប់តាំងពីខែធ្នូ ឆ្នាំ២០២៣ រហូតដល់ថ្ងៃទី៣១ ខែមីនា ឆ្នាំ២០២៤នេះ, ក្រសួងបានធ្វើអន្តរាគមន៍ជួយបូមទឹកដាក់លើផ្ទៃដីសរុបប្រមាណ ៦ម៉ឺន ១១៩ហិកតា នៅក្នុងខេត្តទាំង១៤។ ខេត្តទាំង១៤ ដែលក្រសួងបានជួយសង្គ្រោះ គឺខេត្តបន្ទាយមានជ័យ ខេត្តតាកែវ ខេត្តកំពត ខេត្តត្បូងឃ្មុំ ខេត្តកំពង់ឆ្នាំង ខេត្តកំពង់ធំ ខេត្តក្រចេះ ខេត្តកំពង់ចាម ខេត្តកណ្តាល ខេត្តស្វាយរៀង ខេត្តកំពង់ស្ពឺ ខេត្តពោធិ៍សាត់ ខេត្តព្រៃវែង និងខេត្តប៉ៃលិន៕