ឥទ្ធិពលប្រព័ន្ធសម្ពាធទាបដែលវិវត្តន៍ជាព្យុះទីបួនឈ្មោះព្រះពិរុណ និងឈ្មោះហ្គេមី នឹងបន្តឱ្យកម្ពុជាទទួលបានទឹកភ្លៀងធ្លាក់ជាច្រើនទៀតក្នុងសប្តាហ៍នេះ។ គួរបញ្ជាក់ថា ជំនន់ទឹកភ្លៀងកាលពីសប្តាហ៍មុន ជាពិសេសនៅក្នុងតំបន់ភាគឥសាន និងតាមដងជួរភ្នំក្រវាញ បានបង្កជាឧបសគ្គធ្វើឱ្យលិចលង់តាមកន្លែងមានទំនាបជាច្រើន ដែលមិនទាន់បានរីងអស់នៅឡើយទេ។ អប្សរាណិតរាយការណ៍

អាជ្ញាធរជាតិប្រយុទ្ធប្រឆាំងគ្រឿងញៀន បានបញ្ជាក់ការប្តេជ្ញាចិត្ត ជុំវិញការមិនបន្ធូរបន្ថយដៃ ក្នុងការបង្ក្រាបគ្រឿងញៀនឡើយ ខណៈសេចក្តីរាយការណ៍ខ្លះបានបង្ហាញថា អំពើជួញដូរគ្រឿងញៀនេះ ក៏មានជាប់ពាក់ព័ន្ធនឹងកម្លាំងសមត្ថកិច្ចផងដែរ។ គួរបញ្ជាក់ថា រដ្ឋមន្ត្រីក្រសួងមហាផ្ទៃលោក ស សុខា នៅក្នុងខែកក្កដានេះ ធ្លាប់បានមានប្រសាសន៍ថា មានមន្ត្រីថ្នាក់ដឹកនាំដែលជាប់ពាក់ព័ន្ធនឹងករណីជួញដូរគ្រឿងញៀនជាង ២០គីឡូក្រាម ពីវៀតណាមចូលមកកម្ពុជា។ អប្សរាណិតរាយការណ៍

មន្ត្រីជាន់ខ្ពស់អង្គការសហប្រជាជាតិលោក អាទល់ ខារ៉េ ដែលបំពេញទស្សនកិច្ចនៅកម្ពុជា បានអញ្ជើញជួបសម្តេចតេជោប្រធានព្រឹទ្ធសភា និងអញ្ជើញជួបសម្តេចធិបតីនាយករដ្ឋមន្ត្រី។ លោក អាទល់ ខារ៉េ ដែលធ្លាប់បានធ្វើទស្សនកិច្ចកម្ពុជាលើកដំបូង កាលពី ៣២ឆ្នាំមុន គ្រាកម្ពុជាកំពុងមានសង្គ្រាមស៊ីវិលក្នុងពេលនោះ បានថ្លែងភ្ញាក់ផ្អើលក្រោយបានឃើញភាពវិវឌ្ឍន៍ដ៏ឆាប់រហ័សរបស់កម្ពុជា ដែលមកត្រឹមតែជាប្រទេសមានការរីកចំរើនប៉ុណ្ណោះទេ ប៉ុន្តែបានក្លាយជាប្រទេសដែលកំពុងជួយពិភពលោក ក្រោមឆ័ត្រអង្គការសហប្រជាជាតិថែមទៀត។ អប្សរាណិតរាយការណ៍

ការរុករកឧទ្ធម្ភាគចក្រ Z9 ផ្ទុកមនុស្ស ២នាក់ ដែលបានបាត់នៅតំបន់ជួរភ្នំក្រវាញ បានឈានចូលដល់ថ្ងៃទី១០ហើយ។ ក្រសួងការពារជាតិបានថ្លែងថា នៅថ្ងៃទី២២កក្កដានេះ គឹបានដាក់កម្លាំងមនុស្សសម្រូតចុះតាមខ្សែពួរពីឧទ្ធម្ភាគចក្រចុះស្វែងរក ក្នុងកន្លែងព្រៃក្រាស់មួយ ក្នុងតំបន់អូរសោម ដែលគេសង្ស័យថា ឧទ្ធម្ភាចក្រអាចត្រូវបានរកឃើញតម្រុយដែលបាត់នៅទីនោះ។ អប្សរាណិតរាយការណ៍

រដ្ឋមន្ត្រីការបរទេសកម្ពុជាលោក សុខ ចិន្ដាសោភា គ្រោងនឹងអញ្ជើញចូលរួមកិច្ចប្រជុំរដ្ឋមន្ត្រីការបរទេសអាស៊ានលើកទី៥៧ ក្នុងសប្តាហ៍នេះ នៅប្រទេសឡាវ ដែលជាប្រធានអាស៊ានប្តូរវេនឆ្នាំ២០២៤។ យោងតាមសេចក្តីប្រកាសព័ត៌មាន, កិច្ចប្រជុំរដ្ឋមន្ត្រីការបរទេសអាស៊ានរវាងពីថ្ងៃទី២៤ ដល់ ២៧កក្កដា នឹងស្ថិតក្រោមមូលបទ “អាស៊ាន៖ ការពង្រឹងការតភ្ជាប់ និងភាពធន់” និងជាឱកាស «ដើម្បីពិភាក្សាការងារកសាងសហគមន៍អាស៊ាន រួមទាំងវិធីសាស្ត្រប្រកបដោយនវានុវត្តន៍ ក្នុងការលើកកម្ពស់កិច្ចសហប្រតិបត្តិការអាស៊ានបន្ថែមទៀត ដើម្បីសម្រេចបាននូវតំបន់មួយ ដែលកាន់តែមានភាពតភ្ជាប់ និងភាពធន់ជាងមុន សម្រាប់វិបុលភាពរួម»។

ធនាគារជាតិនៃកម្ពុជា បានប្រញាប់ដោះស្រាយបញ្ហាលំបាក លើការចាយវាយក្រដាសប្រាក់ដុល្លារអាមេរិក ដែលមានសភាពចាស់ ឬប្រឡាក់ពាក់ព័ន្ធបញ្ហាត្អូញត្អែរកើតឡើងនៅក្នុងខេត្តសៀមរាប។ សម្តេចធិបតីនាយករដ្ឋមន្ត្រី បានថ្លែងកោតសរសើរចំណាត់ការរបស់ធនាគារជាតិ នៃកម្ពុជា ដែលដោះស្រាយលើបញ្ហានោះវិញបានភ្លាម បន្ទាប់ពីបទបញ្ជារបស់នាយករដ្ឋមន្ត្រី ប្រមាណ២៤ម៉ោងនោះរួចមក។ អប្សរាណិតរាយការណ៍

ឯកអគ្គរដ្ឋទូតថ្មីរបស់សាធារណរដ្ឋប្រជាមានិតចិនប្រចាំកម្ពុជា លោក វ៉ាង វិនពីន បានអញ្ជើញជួបបង្ហាញមុខចំពោះសម្តេចធិបតីនាយករដ្ឋមន្ត្រីនៅថ្ងៃទី២២ កក្កដា ឆ្នាំ២០២៤ នាវិមានសន្តិភាព។ លោក វ៉ាង វិនពីន ដែលគេដាក់ឈ្មោះ «អ្នកចម្បាំងចចក» គឺជាអ្នកការទូតដ៏ឆ្នើមមួយរួបរបស់ប្រទេសចិន។ អប្សរាណិតរាយការណ៍

ផ្ទះប្រជាពលរដ្ឋ២០ខ្នង និងស្រូវពង្រោះជិត៥០ហិកតា ត្រូវបានទឹកភ្លៀងជន់លិចនៅ ស្រុកគងពិសី ក្នុងខេត្តកំពង់ស្ពឺ។ លោកអភិបាលខេត្ត ជាម ចន្ទ័សោភ័ណ បានដឹកនាំមន្ត្រីជំនាញចុះពិនិត្យស្ថានភាពផ្ទាល់ និងបានណែនាំឱ្យមន្ទីរជំនាញឱ្យពន្លឿនការបើកមុខទឹកឱ្យបានធំដើម្បីសម្រួលលំហូចរន្តទឹក។ លោក ជាម ចន្ទ័សោភ័ណ បានថ្លែងថានៅភូមិព្រៃនូក ឃុំស្នំក្រពើ ជំនន់ទឹកភ្លៀងបានលិចស្រែ និងស្រូវ, លិចលំនៅដ្ឋាន និងកំពុងគម្រាមកំហែងផ្លូវលំមួយចំនួនទៅក្នុងភូមិមួយចំនួន។ លោកអភិបាលខេត្តបានក្រើនរំលឹក ដល់ពលរដ្ឋបង្កើនការប្រុងប្រយ័ត្នខ្ពស់ចំពោះទឹកជំនន់នេះ។

អាជ្ញាធរខេត្តបាត់ដំបង បានអំពាវនាដល់រដ្ឋទាំងអស់ ពិសេសពលរដ្ឋរស់នៅតាមដងស្ទឹងសង្កែ និងស្ទឹងពាក់ព័ន្ធ ត្រូវបង្កើនប្រុងប្រយ័ត្នខ្ពស់ ដើម្បីជៀសវាងនូវគ្រោះថ្នាក់ផ្សេងៗ ដែលបង្កដោយជំនន់ទឹកភ្លៀង។ សេចក្តីអំពាវនាវរបស់មន្ទីរធនធានទឹក និងឧតុនិយមខេត្ត ថ្ងៃទី១៩ កក្កដា បានជូនដំណឹងថា ភ្លៀងធ្លាក់រវាងនៅថ្ងៃទី១៦-១៨ ខែកក្កដា ដែលមានបរិមាណទឹកភ្លៀងសរុបចំនួន ៣៦០មម បានឱ្យទឹកបានពេញអាងពហុបំណងបាត់ដំបង អាងសេកសក។ សេចក្ដីជូនដំណឹងបានដាស់តឿន ពិសេសប្រជាពលរដ្ឋ រស់នៅតាមដងស្ទឹងសង្កែ និងស្ទឹងពាក់ព័ន្ធ សូមបង្កើនការយកចិត្តទុកដាក់ប្រុងប្រយ័ត្នខ្ពស់ ដើម្បីជៀសវាងនូវគ្រោះថ្នាក់ផ្សេងៗ ដែលអាចកើតមានឡើងដោយយថាហេតុ។

អគ្គស្នងការនគរបាលជាតិ បានព្រមានដកតំណែងមន្ត្រីនគរបាលរូបណា ដែលប្រមូលផ្ដុំគ្នាជាបក្ខពួកបង្ខូចកេរ្ដិ៍ឈ្មោះនគរបាលដទៃ ព្រោះតែចង់បានតំណែងគេ។ សម្តីព្រមានរបស់នាយឧត្តមសេនីយ៍ ស ថេត បានធ្វើឡើងក្នុងឱកាសអញ្ជើញប្រកាសចូលកាន់តំណែងស្នងការថ្មី នៃស្នងការដ្ឋាននគរបាលខេត្តបាត់ដំបង នៅព្រឹកថ្ងៃទី១៩ ខែកក្កដា ឆ្នាំ២០២៤នេះ។ នាយឧត្តមសេនីយ៍ ស ថេត បានថ្លែងថា ករណីមានការប្រមូលផ្ដុំគ្នាជាបក្ខពួកបង្ខូចកេរ្ដិ៍ឈ្មោះនគរបាលដទៃនោះ ធ្លាប់បានកើតឡើងពិតប្រាកដមែន។ លោកបានថ្លែងថា ការធ្វើរបៀបនេះ ជារឿងមិនត្រឹមត្រូវទាល់តែសោះ ហើយក៏ជារឿងដែលមិនគួរឲ្យកើតមាននោះដែរ។