នាវាទេសចរណ៍ Westerdam ដែលមានអនុស្សាវរីយ៍ល្អមិនអាចបំភ្លេចបានជាមួយនឹងកម្ពុជា បានចូលចតនៅកំពង់ផែក្រុងព្រះសីហនុជាថ្មីម្ដងទៀត ក្នុងក្រុងព្រះសីហនុ។ ការចូលចតនាព្រឹកថ្ងៃទី២៥មករា ជាមួយនឹងភ្ញៀវទេសចរ ចំនួន ១ពាន់ ៨៧៣នាក់ មានរយៈតែប៉ុន្មានម៉ោងប៉ុណ្ណោះ មុននឹងបន្តដំណើរទៅកាន់ប្រទេសថៃថែមទៀត។ ភ្ញៀវទេសចរបរទេសដែលស្ថិតនៅលើកប៉ាល់មានចំនួន ៤៣សញ្ជាតិ។ ក្នុងដំណើរចូលចតលើកនេះ កប៉ាល់ Westerdam បានដាក់ភ្ញៀវធ្វើដំណើរទៅកាន់ខេត្តសៀមរាប មានចំនួន ៥៩នាក់ ក្នុងនោះស្រី ២៨នាក់ មកពីចំនួន ៤ប្រទេស។ ភ្ញៀវបរទេសដទៃទៀត ត្រូវគេឃើញបានធ្វើដំណើរទស្សនកិច្ច នៅតាមទីប្រជុំជននានា ក្នុងក្រុងព្រះសីហនុ ដូចជានៅក្នុងទីប្រជុំជនផ្សារលើ, តំបន់រមណីយដ្ឋានវប្បធម៌ ក្នុងខេត្ត ដូចជា៖ វត្តឥន្ទញ្ញាណ, វត្តជោតញ្ញាណ, តំបន់នេសាទទំនប់រលក និងតាមតំបន់ឆ្នេរ សមុទ្រជាដើម។ គួររំលឹកថាកាលពីថ្ងៃទី១៣ កុម្ភៈ ឆ្នាំ២០២០, នាវាទេសចរណ៍ Westerdam ដែលផ្ទុកមនុស្សចម្រុះជាតិសាសន៍ចំនួន ២ពាន់ ២៥៧នាក់ ត្រូវបានកម្ពុជាអនុញ្ញាតឱ្យចូលមកសំចត ក្នុងកំពង់ផែខេត្តព្រះសីហនុ បន្ទាប់ពីកប៉ាល់សញ្ជាតិហូឡង់នេះ ត្រូវបានប្រទេសនានា ក្នុងតំបន់ បានរារាំងមិនឱ្យចូលចតក្នុងកំពង់ផែផ្សេងៗ របស់គេឡើយ ដោយសារតែការខ្លាចឆ្លងនឹងជម្ងឺរាតត្បាត កូវីដ១៩។ នាវា…

រដ្ឋមន្ត្រីការបរទេសកម្ពុជាបានថ្លែងថា មានយុទ្ធជនមួកខៀវរបស់កម្ពុជាម្នាក់ បានបាត់ជីវិត នៅក្នុងប្រទេសម៉ាលី និងម្នាក់ទៀតបានរងរបួស នៅប្រទេសលីបង់ ក្នុងពេលកំពុងបំពេញបេសកកម្ម ក្រោមឆ័ត្រអង្គការសហប្រជាជាតិ។ អប្សរាណិតធ្វើសេចក្តីរាយការណ៍

ព្រះមហាក្សត្រខ្មែរ សម្តេចព្រះបរមនាថ នរោត្តម សីហមុនី បានយាងចុះសាកសួរសុខទុក្ខប្រជាពលរដ្ឋ ក្នុងតំបន់ដាច់ស្រយាលមួយ ស្ថិតនៅភូមិត្រពាំងក្រើញ ឃុំប្រាំបីមុម ស្រុកថ្ពង ខេត្តកំពង់ស្ពឺ។ តំបន់ស្រុកថ្ពង ខេត្តកំពង់ស្ពឺ គឺជាអតីតតំបន់អសន្តិសុខមួយ ក្នុងអតីតកាលសង្គ្រាមស៊ីវិល និងជាតំបន់មួយដែលមិនសូវមានមនុស្សបានធ្វើដំណើរចេញចូលនោះទេ ប៉ុន្តែក្រោយមកតំបន់ក្នុងស្រុកថ្ពង ក៏ជាបណ្តាស្រុកនានា នៅក្នុងខេត្តទាំងមូល បានក្លាយជាតំបន់មានសុវត្ថិភាពទាំងស្រុង ក្រោយសង្គ្រាមស៊ីវិល ត្រូវបានបញ្ចប់ ក្រោមការដាក់ចេញនូវនយោបាយឈ្នះឈ្នះ របស់សម្តេចតេជោ ហ៊ុន សែន។ ព្រះករុណាព្រះមហាក្សត្រខ្មែរ ក្នុងព្រះរាជដំណើរចុះសាកសួរសុខទុក្ខប្រជាពលរដ្ឋ ក្នុងភូមិត្រពាំងក្រើញ ឃុំប្រាំបីមុម ស្រុកថ្ពង ខេត្តកំពង់ស្ពឺ ថ្ងៃទី២៤មករា បានមានព្រះរាជបន្ទូលកោតសរសើរ លើការដឹកនាំរបស់សម្តេចតេជោ ហ៊ុន សែន ដែលធ្វើឱ្យប្រទេសអស់សង្គ្រាម និងកោតសរសើរដល់រាជរដ្ឋាភិបាលអាណ្ណត្តិទី៧ បន្តវេន ក្រោមការដឹកនាំរបស់សម្តេចធិបតី ហ៊ុន ម៉ាណែត។

នៅទូទាំងអាស៊ាន រយៈពេល ២៤ម៉ោងកន្លងមកនេះ មានការឆ្លងកូវីដ១៩ចំនួន ៧០ករណី ដែលបន្តថយចុះថែមទៀតចំនួន ៩៧៦ករណី បើប្រៀបធៀបនឹងការឆ្លងកាលពីថ្ងៃម្សិលមិញ។ ការឆ្លងនៅថ្ងៃនេះបានកើតលើប្រទេសចំនួន ២នៅអាស៊ាន រួមមានប្រទេសមីយ៉ាន់ម៉ា ដែលមានការឆ្លងចំនួន ៦៤ករណី និងប្រទេសកម្ពុជា មានការឆ្លង ៦ករណី។ អាស៊ាននារយៈពេល ២៤ម៉ោងចុងក្រោយនេះ មិនមានអ្នកស្លាប់ដោយសារជំងឺកូវីដ១៩ ឡើយ។ គិតសរុបរួម នៃប្រទេសទាំង១០ អាស៊ាននាពេលនេះ ការឆ្លងសរុបបានកើនដល់ចំនួន ៣៦លាន ៩៣ម៉ឺន ៥ពាន់ ៥២៩ករណីហើយ, និងការស្លាប់សរុបមានចំនួន ៣៦ម៉ឺន ៩ពាន់ ៣៦១នាក់។ បើគិតសរុបនៅលើសាកលលោកនោះវិញ ការឆ្លងវីរុសកូវីដ១៩ សរុបមានចំនួនជាង ៧០២លានករណី, និងការស្លាប់មានជាង ៦លាន ៩៧ម៉ឺននាក់ហើយ៕

ការដាច់ភ្លើងចុងសប្តាហ៍ បានមកដល់ទៀតហើយ ក្នុងរយៈពេល៤ថ្ងៃ គឺមាននៅថ្ងៃព្រហស្បតិ៍ សុក្រ សៅរ៍ និងថ្ងៃអាទិត្យ។ ការដាច់ភ្លើងនេះនឹងកើតឡើងនៅក្នុងរាជធានីភ្នំពេញ និងខេត្ដកណ្ដាល ដែលមានរយៈពេលពី ៦ម៉ោង ទៅ៩ម៉ោង។ តើការដាច់ភ្លើងប្រចាំសប្តាហ៍នេះ មាននៅទីណាខ្លះ? អប្សរាណិតរាយការណ៍

មន្ត្រីកសិកម្មបានថ្លែងថា ការនាំចេញផ្លែមៀនប៉ៃលិនចូលក្នុងទីផ្សារប្រទេសចិន ក្នុងមួយថ្ងៃៗ មានចំនួនយ៉ាងហោចជាង ១០០តោន។ អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ លោក ឃឹម ហ្វីណង់ បានបញ្ជាក់ថា ការនាំចេញនេះ ធ្វើឡើងតាមរយៈក្រុមហ៊ុនឆាយណា ជិនខ្វាវយ័ន CHINA JINKWOAYUAN IMPORT EXPORT ដែលបានប្រើប្រាស់ប្រព័ន្ធបច្ចេកវិទ្យាទំនើប និងអាចវេចខ្ចប់ តាមរយៈម៉ាស៊ីនស្វ័យប្រវត្តិ។ ក្រុមហ៊ុន ឆាយណា ជិនខ្វាវយ័ន IMPORT EXPORT បានចុះកិច្ចសន្យាប្រមូលទិញពីកសិករ ក្នុងតម្លៃថេរចំនួន ៣ពាន់ ៦០០រៀល ក្នុង១គីឡូក្រាម។ យោងតាមក្រសួងកសិកម្មបាន, ការនាំចេញផ្លែមៀនស្រស់ក្នុងឆ្នាំ២០២៣ មានបរិមាណ ១ម៉ឺន ៧ពាន់ ៤៩៧តោន ទទួលបានទឹកប្រាក់សរុបចំនួនជិត ២៥លានដុល្លារ ក្នុងនោះរួមមានការនាំចេញទៅប្រទេសចិន និងទៅប្រទេសវៀតណាមផងដែរ។

ផ្លូវជាតិលេខ៣១ ចាប់ពីបែកគុស ទៅដល់ទីរួមស្រុកកំពង់ត្រាច ខេត្តកំពត នឹងគ្រោងបញ្ចប់ការជួសជុលនៅក្នុងខែកក្កដាខាងមុខនេះហើយ បន្ទាប់ពីការស្តារ និងសាងសង់អស់រយៈពេលជាងមួយឆ្នាំកន្លងមកនេះ។ អ្នកនាំពាក្យក្រសួងសាធារណការ និងដឹកជញ្ជូន លោក ហ៊ាង សុទ្ធាយុត្តិ បានថ្លែងនៅថ្ងៃទី២៤ មករាថា «ផ្លូវជាតិលេខ៣១ គិតមកដល់ពេលនេះសម្រេចការសាសងសង់បានប្រមាណ ៤០% ហើយ ក្នុងនោះការចាក់អ៊ុតបេតុងកៅស៊ូ (AC) នឹងរួចរាល់នាខែកក្កដា ឆ្នាំ២០២៤ខាងមុខនេះ ខណៈដែលការបំពាក់គ្រឿងបរិក្ខាផ្លូវថ្នល់ និងកិច្ចការផ្សេងៗជាច្រើនទៀត នឹងរួចរាល់ទាំងស្រុងនៅចុងឆ្នាំ២០២៤»។ ផ្លូវជាតិលេខ៣១ ប្រវែងសរុបជិត ៥៤គីឡូម៉ែត្រ តម្លៃជាង ៦០លានដុល្លារ ត្រូវបានស្តារ និងលើកកម្រិតគុណភាពដោយ ក្រុមហ៊ុនសាជីវកម្មស្ពាននិងថ្នល់ចិន CRBC បន្ទាប់ពីបើកការដ្ឋានកាលពីខែធ្នូ ឆ្នាំ២០២២។ គម្រោងនេះ គឺជាឥណទានសម្បទានពីរដ្ឋាភិបាល នៃសាធារណរដ្ឋប្រជាមានិតចិន រួមជាមួយនឹងថវិកាបដិភាគ របស់រាជរដ្ឋាភិបាលកម្ពុជា សម្រាប់ការដោះស្រាយផលប៉ះពាល់ និងពន្ធអាករផ្សេងៗ៕

គ្រឿងញៀនជាង ១ពាន់ ៥០០គីឡូក្រាម និងជនសង្ស័យចំនួន ៥នាក់ ត្រូវសមត្ថកិច្ច នៃមន្ទីរប្រឆាំងគ្រឿងញៀនក្រសួងមហាផ្ទៃ បង្រ្កាបបាននៅ ៣ទីតាំងផ្សេងគ្នា ក្នុងនោះនៅខេត្តព្រះសីហនុមាន២កន្លែង និងមួយកន្លែងទៀតនៅរាជធានីភ្នំពេញ។ យោងតាមក្រសួងមហាផ្ទៃ, ប្រតិបត្តិការបង្ក្រាបទី១ បានធ្វើនៅចំណុចកំពង់ផែកំពេញ ស្ទឹងហាវ ដោយឃាត់ខ្លួនមុខសញ្ញាដឹកជញ្ជូនគ្រឿងញៀនឆ្លងដែន ពីប្រទេសឡាវ ឆ្លងកាត់កម្ពុជា ក្នុងគម្រោងចេញតាមសមុទ្រសំដៅទៅដែនកោះតៃវ៉ាន់។ ការបង្ក្រាបទី២ ធ្វើឡើងនៅក្នុង ភូមិ៣ សង្កាត់លេខ១ ក្រុងព្រះសីហនុ…ចំណែកប្រតិបត្តិការទី៣ ធ្វើឡើងនៅខណ្ឌកំបូល រាជធានីភ្នំពេញ។ ក្នុងប្រតិបត្តិការទាំងបីកន្លែងនេះ, សមត្ថកិច្ចបានឃាត់ខ្លួនជនសង្ស័យ ជាតិចិន ចំនួន ៤នាក់ និងសិង្ហបូរី១នាក់។ សមត្ថកិច្ចបានរឹបអូសថ្នាំញៀនប្រភេទកេតាមីន១ពាន់ដុំ ស្មើទម្ងន់ ៩៨០គីឡូ និង៨០០ក្រាម, គ្រឿងញៀនមេតំហ្វេតាមីន(ICE) ៥៣៤ដុំ ទម្ងន់ ៥៣២គីឡូ និង៦០៩.៦០ក្រាម។ ជនសង្ស័យទាំង៥ និងវត្ថុតាង ត្រូវបញ្ជូនទៅតុលាការ ដើម្បីចាត់ការតាមច្បាប់ និងបន្តស្វែងរកមេក្លោង និងអ្នកដែលពាក់ព័ន្ធ ដើម្បីយកមកផន្តន្ទាទោស។ នៅក្នុងសប្តាហ៍នេះ ការបង្រ្កាបបានបទល្មើសគ្រឿងញៀន ក្នុងលក្ខណៈទ្រង់ទ្រាយធំបែបនេះ មានចំនួន ២ករណីហើយ។ ការបង្ក្រាបទ្រង់ទ្រាយធំមួយកាលពីយប់ថ្ងៃទី២០មករា នៅក្នុងខេត្តព្រះវិហារ,…

រដ្ឋមន្ត្រីក្រសួងយុត្តិធម៌ បានថ្លែងប្រាប់មន្ត្រីក្រោមបង្គាប់ ត្រូវអនុវត្តដោយម៉ឺងម៉ាត់បំផុត ចំពោះមេខ្លោងជួញដូរគ្រឿងញៀន ដើម្បីបញ្ចៀសគ្រោះថ្នាក់ដល់សង្គម និងប្រទេសជាតិ។ លោករដ្ឋមន្ត្រី កើត រិទ្ធ បានថ្លែងថា «យើងមិនត្រូវអង្គុយបក់ផ្សែងទៀតទេ ប៉ុន្តែត្រូវនាំគ្នាពន្លត់ភ្លើងតែម្តង»។ សម្តីដាស់តឿននេះ បានធ្វើឡើងនៅព្រឹកថ្ងៃទី២៤ ខែមករា ឆ្នាំ២០២៤ ក្នុងពិធីបើកសិក្ខាសាលាស្តីពី «ប្រសិទ្ធភាព នៃកិច្ចការនាំពាក្យព័ត៌មាន និងសាធារណមតិ សម្រាប់អ្នកនាំពាក្យ និងមន្ត្រីទទួលបន្ទុកព័ត៌មាន នៃក្រសួងយុត្តិធម៌ និងសាលាជម្រះក្តី» នៅបណ្ឌិត្យសភាភូមិន្ទយុត្តិធម៌កម្ពុជា។ បញ្ហាបង្ក្រាបគ្រឿងញៀន គឺជាវិធានការណ៍គន្លឹះទី៤ ដាក់ចេញដោយរាជរដ្ឋាភិបាល អាណ្ណត្តិទី៧ នៃរដ្ឋសភា។ លោករដ្ឋមន្ត្រី កើត រិទ្ធ បានព្រមានដល់មន្ត្រីរបស់លោកថា រឿងគ្រឿងញៀននេះ បើមានការពាក់ព័ន្ធនឹងផលប្រយោជន៍ ជាមួយមេគ្រឿងញៀនណាហើយ គឺលោកនឹងចាត់ការលើមន្ត្រីនោះ ដោយកណ្តាប់ដៃផ្ទាល់របស់លោកតែម្តង។ លោកបញ្ជាក់ថា នេះមិនមែនជាបញ្ហារបស់អ្នកណាមួយនោះទេ ប៉ុន្តែជាបញ្ហារបស់ប្រទេសជាតិទាំងមូល និងជាបទបញ្ជារបស់សម្តេចប្រមុខរាជរដ្ឋាភិបាល។

ក្រសួងសុខាភិបាល បានប្រកាសរកឃើញករណីជំងឺអុតស្វាចំនួន ១ករណីបន្ថែមទៀត ដែលនាំឲ្យការរកឃើញអ្នកឆ្លងជំងឺអុតស្វានៅកម្ពុជា បានកើនឡើងចំនួន ៥ករណីហើយ។ យោងតាមសេចក្តីប្រកាសមួយនាថ្ងៃទី២៣មករា ការរកឃើញករណីឆ្លងថ្មីនេះ បានកើតឡើងលើបុរសម្នាក់ ដែលកំពុងដាក់ឱ្យស្ថិតនៅដោយឡែក ក្នុងមន្ទីរពេទ្យយ៉ាងត្រឹមត្រូវ។ ជម្ងឺអុតស្វា ត្រូវគេរកឃើញកើតឡើងដំបូង ក្នុងប្រទេសកម្ពុជា កាលពីខែសីហា ឆ្នាំ២០២២ កើតលើជនជាតិនីហ្សេរីយ៉ា និងក្រោយមកទើបមានការកើតជាបន្តបន្ទាប់ នៅក្នុងរាជធានីភ្នំពេញ ក្នុងឆ្នាំ២០២៣។ ជម្ងឺអុតស្វាអាចឆ្លងពីមនុស្សម្នាក់ទៅមនុស្សម្នាក់ទៀត តាមរយៈការរួមភេទគ្រប់ទម្រង់ ជាមួយអ្នកកើតជំងឺនោះ, និងការប៉ះពាល់ដោយផ្ទាល់នឹងកន្លែងមានដំបៅ, ទឹកសារពាង្គកាយ, ទឹកមាត់, តំណក់តូចៗតាមផ្លូវដង្ហើម និងសម្ភារៈប្រើប្រាស់ដែលប្រឡាក់ប្រឡូក ជាមួយនឹងវីរុស រួមមានសម្លៀកបំពាក់ ពូក កន្លែង ឬសម្ភារៈ ស្លាបព្រា ចាន និងកែវទឹកជាដើម។ វិរុសអុតស្វា ក៏អាចឆ្លងពីម្តាយទៅកូនតាមរយៈ ទងសុក ក្នុងអំឡុងពេល ឬក្រោយពេល សម្រាលតាមរយៈការប៉ះពាល់បើស្ត្រីមានផ្ទៃពោះ ឬឪពុកម្តាយមានជំងឺអុតស្វា។ ក្រសួងសុខាភិបាល បានក្រើនរំលឹកដល់ប្រជាពលរដ្ឋទាំងអស់ ឲ្យមានការប្រុងប្រយ័ត្នផ្ទាល់ខ្លួន ប្រកបដោយស្មារតីទទួលខុសត្រូវខ្ពស់ ក្នុងការបង្ការឆ្លង នៃជំងឺអុតស្វានេះ។