តម្លៃប្រេងសាំង គឺឋិតនៅថេរ ខណៈប្រេងម៉ាស៊ូត បានបន្ដធ្លាក់ចុះ សម្រាប់ក្នុងការលក់រយៈពេល១០ ថ្ងៃខាងមុខនេះ។ យោងតាមក្រសួងពាណិជ្ជកម្ម តម្លៃប្រេងឥន្ធនៈ សម្រាប់ការលក់ រវាងពីថ្ងៃទី២១ រហូតដល់ថ្ងៃទី៣១ ខែធ្នូ ឆ្នាំ២០២៣ គឺប្រេងសាំងធម្មតា មានតម្លៃចំនួន ៤ពាន់ ១៥០រៀល ក្នុង១លីត្រ ដែលតម្លៃនេះ គឺឋិតនៅថេរ បើប្រៀបធៀបទៅនឹងការលក់រយៈពេល ១០ថ្ងៃមុន..ចំណែក ប្រេងម៉ាស៊ូត មានតម្លៃចំនួន ៤ពាន់ ១០០រៀលក្នុង១លីត្រ ដែលតម្លៃនេះ គឺបន្ដថយចុះមកវិញចំនួន៥០រៀល បើប្រៀបធៀបទៅនឹងការលក់រយៈពេល ១០ថ្ងៃមុន។ ដោយឡែកតម្លៃប្រេងស៊ុបពែ័រវិញ គឺមិនបានកំណត់ក្នុងតារាងក្រសួងពាណិជ្ជកម្មនោះទេ ប៉ុន្តែតម្លៃលក់តែងតែខ្ពស់ជាងតម្លៃប្រេងសាំងធម្មតា។ នៅថ្ងៃនេះប្រេងសាំងស៊ុបពែ័រតាមស្ថានីយ៍ ខ្លះគឺមានតម្លៃចំនួន ៤ពាន់ ៨០០រៀល ក្នុងមួយលីត្រ។ សូមជម្រាបថា រាជរដ្ឋាភិបាលតែងតែចំណាយប្រាក់ ជួយខាតយ៉ាងហោច៦ចុច៥សេន ក្នុងមួយលីត្រ ដើម្បីជាការទប់ស្កាត់តម្លៃប្រេង ក្នុងការជួយសម្រាលបន្ទុកដល់ពលរដ្ឋ។

ក្រសួងធនធានទឹក បានអំពាវនាវដល់ប្រជាពលរដ្ឋ ត្រូវប្រុងប្រយ័ត្ន ក្នុងការថែរក្សាសុខភាព ខណៈមានធាតុអាកាសចុះត្រជាក់ខុសធម្មតា។ យោងតាមការព្យាករណ៍របស់ក្រសួងធនធានទឹក និងឧតុនិយម ការចុះត្រជាក់នេះ គឺដោយសារប្រព័ន្ធ នៃសម្ពាធខ្ពស់នៅលើប្រទេសចិន ដែលបានបង្កើនឥទ្ធិពលគ្របដណ្តប់លើប្រទេសកម្ពុជា ជាមួយនឹងខ្យល់មូសុងឦសានបក់ពីបង្គួរទៅខ្លាំង។ សីតុណ្ហភាពត្រជាក់អប្បបរមានឹងមានរវាងពី ១៦ ទៅ២២អង្សាសេ និងសីតុណ្ហ ភាពអតិបរមា នឹងមានរវាងពី២៨ ទៅ៣០ អង្សាសេរវាងពីថ្ងៃទី២១ដល់២៤ធ្នូ។ នៅខេត្តប៉ៃលិន បន្ទាយមានជ័យ បាត់ដំបង និងខេត្តសៀមរាប សីតុណ្ហភាពត្រជាក់អប្បបរមា នឹងមានរវាងពី១៦ ទៅ១៨ អង្សាសេ។ ចំណែកនៅតំបន់ខ្ពង់រាប សីតុណ្ហភាពត្រជាក់អប្បបរមា មានរវាងពី ១៥ ទៅ២១ អង្សាសេ និងសីតុណ្ហភាពអតិបរមាពី២៨ទៅ៣០ អង្សាសេ។ តាមការព្យាករណ៍នៅ ខេត្តឧត្តរមានជ័យ មណ្ឌលគិរី ព្រះវិហារ និងខេត្តរតនគិរី នឹងមានសីតុណ្ហភាពត្រជាក់អប្បបរមា រវាងពី ១៥ទៅ ១៧ អង្សាសេ។ ដោយឡែកនៅតំបន់មាត់សមុទ្ទនោះវិញ សីតុណ្ហភាពត្រជាក់អប្បបរមា មានរវាងពី ២១ទៅ ២៣អង្សាសេ និងសីតុណ្ហភាពអតិបរមាមានរវាងពី៣០ទៅ៣២ អង្សាសេ។ ក្រសួងធនធានទឹក និងឧតុនិយម…

សម្តេចធិបតី ហ៊ុន ម៉ាណែត បានបញ្ជាដល់រដ្ឋមន្ត្រីក្រសួងធម្មការ និងសាសនា ត្រូវចាត់វិធានការលើសកម្មភាពមិនប្រក្រតីមួយចំនួន ដែលកើតឡើងក្នុងទម្រង់សាសនា ដែលបង្កឱ្យភាពច្របូកច្របល់ និងមានការរិះគន់ជាច្រើនពីសាធារណមតិ។ ប្រសាសន៍ដាក់បទបញ្ជានេះ បានធ្វើឡើងក្រោយមានការរិះគន់ជាច្រើននៅតាមបណ្តាញសង្គម និងពីសំណាក់ប្រជាពលរដ្ឋជាច្រើនផងដែរ ដែលឃើញមានបុគ្គលខ្លះ កំពុងប្រើប្រាស់វិស័យសាសនា ដើម្បីការបំរើផលប្រយោជន៍។ ថ្លែងនៅក្នុងពិធីបិទសន្និបាតបូកសរុបលទ្ធផលការងារក្នុងក្រសួងបរិស្ថាន សម្តេចធិបតីបានថ្លែងកត់សម្គាល់យ៉ាងដូច្នេះ

សិស្សដែលប្រឡងជាប់បាក់ឌុបនិទ្ទេស A និងសិស្សប្រឡងសញ្ញាបត្របច្ចេកទេស និងវិជ្ជាជីវៈកម្រិត៣ សម្រាប់ឆ្នាំ២០២៣ នឹងត្រូវបានជួបសំណេះសំណាលជាមួយនឹងសម្តេចធិបតី ហ៊ុន ម៉ាណែត ក្នុងដើមសប្តាហ៍ទី២ខែមករា ឆ្នាំ២០២៤។ យោងតាមលទ្ធផលប្រឡងសញ្ញាបត្រមធ្យមសិក្សាទុតិយភូមិ, សិស្សានុសិស្ស ដែលប្រឡងជាប់បាក់ឌុបកាលពីខែវិច្ឆិកា មានសរុបចំនួន ៩ម៉ឺន ៨ពាន់ ៤៦០នាក់ ស្មើនឹង៧២.៨៩%។ សិស្សប្រឡងជាប់និទ្ទេស A មានចំនួន១ពាន់៦៧៣នាក់, និទ្ទេសB ចំនួន ៦ពាន់ ៩៦៤នាក់, និទ្ទេស C ចំនួន ១ម៉ឺន ៨ពាន់ ៣០៨នាក់, និទ្ទេស D ចំនួន ៣ម៉ឺន ៤ពាន់ ២៤៦នាក់ និងនិទ្ទេស E ចំនួន ៣ម៉ឺន ៧ពាន់ ២៦៩នាក់។ ជំនួបជាមួយសិស្សប្រឡងជាប់និទ្ទេស A និងសិស្សប្រឡងសញ្ញាបត្របច្ចេកទេស និងវិជ្ជាជីវៈកម្រិត៣ សម្រាប់ឆ្នាំ២០២៣ គ្រោងនឹងធ្វើនៅថ្ងៃទី៩មករាឆ្នាំ២០២៤ នៅមជ្ឈមណ្ឌលសន្និបាតនិងពិព័រណ៍អន្តរជាតិជ្រោយចង្វារ រាជធានីភ្នំពេញ។

ប្រទេសបារាំងបានសន្យាចំពោះកម្ពុជាថានឹងបន្តពង្រឹង និងពង្រីកកិច្ចសហប្រតិបត្តិការទ្វេភាគី លើវិស័យសុខាភិបាល, ឌីជីថល, សេដ្ឋកិច្ច, ហេដ្ឋារចនាសម្ព័ន្ធ និងការគាំទ្រគ្នាទៅវិញទៅមកលើឆាកអន្តរជាតិ។ ការសន្យានេះបានធ្វើឡើងដោយឯកអគ្គរដ្ឋទូតបារាំង លោក ហ្សាក់ ប៉ែលឡេ ក្នុងឱកាសអញ្ជើញជួបសម្តែងការគួរសមចំពោះសម្តេចធិបតី ហ៊ុន ម៉ាណែត នារសៀលថ្ងៃទី២០ធ្នូ នៅវិមានសន្តិភាព។ ឯកអគ្គរដ្ឋទូត បានជម្រាបជូនសម្តេចធិបតីនាយករដ្ឋមន្ត្រីទៀតថា បារាំងនឹងគាំទ្របេក្ខភាពរបស់កម្ពុជា ដើម្បីធ្វើជាម្ចាស់ផ្ទះ នៃកិច្ចប្រជុំកំពូលហ្វ្រង់កូហ្វូនីឆ្នាំ២០២៦ ដែលនឹងមានរដ្ឋ និងរដ្ឋាភិបាលជាង៩០ នៅទូទាំងសាកលលោកនឹងអញ្ជើញចូលរួម។ លោកបានថ្លែងថាប្រទេសបារាំង ក៏កំពុងត្រៀមលក្ខណៈ ក្នុងការរង់ចាំទទួលស្វាគន៍យ៉ាងកក់ក្តៅ ចំពោះដំណើរទស្សនកិច្ចផ្លូវការរបស់សម្តេចធិបតី នៅក្នុងក្រុងប៉ារីសនាពេលឆាប់ៗខាងមុខនេះផងដែរ។ សម្តេចធិបតីក្នុងប្រសាសន៍ឆ្លើយតប បានវាយតម្លៃខ្ពស់ ចំពោះលទ្ធផល នៃទំនាក់ទំនងទ្វេភាគី រវាងប្រទេសទាំងពីរ ក្នុងរយៈកាលកន្លងមក និងស្វាគមន៍ចំពោះការពង្រីកកិច្ចសហប្រតិបត្តិការបន្ថែមទៀត ជាមួយនឹងការបញ្ជាក់ថា រាជរដ្ឋាភិបាលកម្ពុជា នីតិកាលទី៧ នៃរដ្ឋសភា មានគោលនយោបាយការបរទេសមិនប្រែប្រួលឡើយ ពោលគឺបន្តនូវនិរន្តរភាព និងសង្គតិភាព នៃទំនាក់ទំនង ជាពិសេសនៅក្នុងទំនាក់ទំនងទ្វេភាគីរវាងកម្ពុជា-បារាំង។ បារាំងគឺជាប្រទេសដែលធ្លាប់ធ្វើអាណានិគមត្រួតត្រាកម្ពុជាក្នុងសម័យអតីតកាល។ កម្ពុជា និងបារាំងក្រោយមកមានទំនាក់ទំនងការទូតនៅឆ្នាំ១៩៥២។ បារំាង បានដើរតួនាទីយ៉ាងសកម្មនៅក្នុងការស្វែងរកសន្តិភាពឲ្យកម្ពុជា រហូតបង្កើតបានកិច្ចព្រមព្រៀងសន្តិភាពទីក្រុង ប៉ារីសឆ្នាំ១៩៩១។

ក្រសួងពាណិជ្ជកម្មកម្ពុជា បានព្រមានចាត់វិធានការតាមផ្លូវច្បាប់ ចំពោះក្រុមហ៊ុនដែលក្លែងបន្លំប្រើប្រាស់ស្លាកសញ្ញាជាតិ, រូបទង់ជាតិ និងនិមិត្តរូបជាតិរបស់ប្រទេសកម្ពុជា។ ក្រុមហ៊ុន SENG CHEANG MONG FOOD CORP នៅរដ្ឋកាលីហ្វ័រនីញ៉ានិងរដ្ឋ Florida ក្នុងសហរដ្ឋអាមេរិក ត្រូវគេរកឃើញបានក្លែងបន្លំស្លាកសញ្ញាជាតិខ្មែរ ដោយដាក់រូបប្រាសាទបាយ័ន លើសំបកវេចខ្ចប់ សរសៃបាញ់កាញ់ក្រៀម ដាក់លក់នៅលើទៅទីផ្សារផ្ទាល់ផង និងតាមប្រព័ន្ធអនឡាញផង ដោយគ្មានការអនុញ្ញាត ពីក្រសួងមានសមត្ថកិច្ចរបស់កម្ពុជាឡើយ។ ក្រសួងពាណិជ្ជកម្មកម្ពុជា កំពុងសហការជាមួយក្រសួងការបរទេស និងស្ថាប័នមានសមត្ថកិច្ច ដើម្បីការចាត់វិធានការតាមផ្លូវច្បាប់ ចំពោះក្រុមហ៊ុននៅក្រៅប្រទេសនោះ។

កម្ពុជានៅមិនទាន់ធ្វើប្រតិកម្មជាផ្លូវការនៅឡើយទេ ជុំវិញសេចក្តីរាយការណ៍ពីប្រទេសថៃ ដែលនិយាយថា គណបក្សកាវក្លៃ បានផ្ដល់ទីកន្លែង និងជួយបណ្ដុះបណ្ដាលក្រុមជ្រុលនិយមបរទេស ដើម្បីឲ្យប្រឆាំងជាមួយរាជរដ្ឋាភិបាលកម្ពុជា។ មិនមានសេចក្តីរាយការណ៍ថា តើក្រុមជ្រុលនិយមបរទេសនោះ ជាក្រុមរបស់អ្នកណាឡើយ។ សេចក្តីរាយការណ៍ពីប្រទេសថៃបាននិយាយថា ក្រុមអ្នកប្រជាធិបតេយ្យថៃ ដឹកនាំដោយបណ្ឌិត ថែនខុន ចីតអីសារ៉ាក់ បានថ្កោលទោស គណបក្សកាវក្លៃ និងចាត់ទុកថាការជួយរបស់គណបក្សកាវក្លៃដល់ក្រុមជ្រុលនិយមបរទេសនោះ គឺជាអំពើខុសច្បាប់ និងជ្រៀតជ្រែកចូលកិច្ចការផ្ទៃក្នុងរបស់កម្ពុជា។ ក្រុមអ្នកប្រជាធិបតេយ្យថៃទាំងនោះ បានដាក់ពាក្យប្តឹងអំពើជ្រៀតជ្រែករបស់គណបក្សកាវក្លៃ របស់ថៃនោះ ទៅរាជរដ្ឋាភិបាលថៃ ដើម្បីមានវិធានការតាមផ្លូវច្បាប់។ តាមរយៈការសរសេរលើបណ្ដាញសង្គម ក៏មានការអ្នកបញ្ចេញមតិយោបល់យ៉ាងច្រើន ស្ដីបន្ទោសទៅលើគណបក្សកាវក្លៃថា បានលូកលាន់ចូលកិច្ចការផ្ទៃក្នុងកម្ពុជា និងបានប្រៀបប្រដូចអំពើនោះ ដូចជាការយកភ្លើងចូលក្នុងផ្ទះយ៉ាងដូច្នេះដែរ។ ក្រុមអ្នកប្រើប្រាស់បណ្ដាញសង្គម ក៏បានទាមទារឲ្យរដ្ឋាភិបាល ពិសេសក្រុមប្រឹក្សាសន្ដិសុខជាតិថៃ ត្រូវចាត់វិធានការជាបន្ទាន់ ចំពោះសកម្មភាពរបស់គណបក្សកាវក្លៃ ហើយបានអំពាវនាវសូមកុំឲ្យជនបរទេសយកទឹកដីថៃ ធ្វើនយោបាយប្រឆាំងប្រទេសជិតខាង ឬប្រទេសដទៃផ្សេងទៀត។ រាជរដ្ឋាភិបាលកម្ពុជា នៅមិនទាន់មានប្រតិកម្ម ចំពោះព័ត៌មាននេះនៅឡើយទេ។

មន្ត្រីនគរបាលម្នាក់ក្នុងជួរអង្គភាពប្រឆាំងគ្រឿងញៀន ត្រូវបានបកសក្តិ, ដកហូតមុខតំណែង និងបណ្តេញចេញពីក្របខណ្ឌនគរបាលថែមទៀត ក្រោយការរកឃើញជាប់ពាក់ព័ន្ធនឹងបទល្មើសគ្រឿងញៀន។ វរសេនីយ៍ត្រី សួន តុសិតពិទូរ្យ អត្តលេខ ៧៨២១៧ ដែលជានាយរងការិយាល័យរដ្ឋបាល-សរុបនៃមន្ទីរប្រឆាំងបទល្មើសគ្រឿងញៀន ចំណុះអគ្គស្នងការដ្ឋាននគរបាលជាតិ ត្រូវបានក្រសួងមហាផ្ទៃ ចេញសេចក្តីប្រកាសថ្ងៃទី១៨ធ្នូ បណ្តេញចេញពីក្របខណ្ឌមន្ត្រីនគរបាលជាតិ ក្រោមមូលហេតុ ល្មើសវិន័យរបស់កងកម្លាំងនគរបាលជាតិ។ ឈ្មោះ សួន តុសិតពិទូរ្យ ធ្លាប់ត្រូវបានគេចាប់ខ្លួននៅក្នុងខេត្តកំពត កាលពីខែកញ្ញា ឆ្នាំ២០១៩ ពាក់ព័ន្ធនឹងអំពើជួញដូរគ្រឿងញៀន។ បុគ្គលរូបនោះទៀត មានរឿងអាស្រូវក្នុងការចោទប្រកាន់ប្រើប្រាស់អំពើហិង្សាថែមទៀត។ មន្ត្រីនាំពាក្យរងក្រសួងមហាផ្ទៃ លោក ទូច សុខៈ បានប្រាប់អប្សរាណិតថា មន្ត្រីនគរបាលរូបនោះ ត្រូវបានរកឃើញជាប់ពាក់ព័ន្ធការប្រើប្រាស់ហិង្សា, ការរក្សាទុក និងប្រើប្រាស់គ្រឿងញៀនខុសច្បាប់ ប្រព្រឹត្តកាលពីខែកញ្ញា ឆ្នាំ២០១៩។ មន្ត្រីនាំពាក្យដដែលបានលើកឡើងដោយដកស្រង់ប្រសាសន៍របស់រដ្ឋមន្ត្រីក្រសួងមហាផ្ទៃ លោក ស សុខា ដែលបបញ្ជាក់ច្បាស់លាស់ថា «មន្ត្រីនគរបាលជាតិរូបណាក៏ដោយ នឹងត្រូវបណ្ដេញចេញពីក្របខ័ណ្ឌ ដោយគ្មានការលើកលែង ប្រសិនបើរកឃើញថា ជាប់ព័ន្ធនឹងគ្រឿងញៀន ទាំងការរក្សាទុក, ការប្រើប្រាស់ និងការជួញដូរគ្រឿងញៀន។» លោកបានបញ្ជាក់ បន្ថែមថា «នៅមានមន្ត្រីនគរបាលមួយចំនួនទៀត ដែលគេកំពុងរៀបចំឯកសារបណ្តេញចេញ ដោយការរកឃើញជាប់ពាក់ព័ន្ធនឹងបញ្ហាគ្រឿងញៀន»។…

សម្តេចមហាបវរធិបតី ហ៊ុន ម៉ាណែត បានចេញបទបញ្ជាដាច់ណាត់ ក្នុងការដាក់ខ្នោះ ចំពោះបុគ្គលណាដែលបង្កគ្រោះថ្នាក់ចរាចរណ៍បុកមនុស្សស្លាប់ ដោយមិនចាំបាច់ស្នើសុំ រកការធ្វើអន្តរាគមន៍ពីថ្នាក់ដឹកនាំខាងលើឡើយ។ ការដាក់បទបញ្ជានេះ បានធ្វើឡើងទន្ទឹមនឹងមានសេចក្តីរាយការណ៍ជាបន្តបន្ទាប់ អំពីបុគ្គលដែលបានបើករថយន្តបុកមនុស្សស្លាប់ ប៉ុន្តែមិនត្រូវបានសមត្ថកិច្ចចាប់ខ្លួន ក្នុងហេតុការណ៍នោះឡើយ ដោយសារតែមានអន្តរាគមន៍ពីនេះ ឬពីនោះ។ ថ្លែងក្នុងពិធីបិទសន្និបាតក្រសួងបរិស្ថាននៅថ្ងៃទី២១ធ្នូឆ្នាំ២០២៣ សម្តេចធិបតី ហ៊ុន ម៉ាណែត បានដាក់ចេញនូវបទបញ្ជាដាច់ណាត់យ៉ាងនេះ។ គ្រោះថ្នាក់ចរាចរណ៍ គឺជាគ្រោះថ្នាក់កើតឡើងជាប្រចាំរៀងរាល់ថ្ងៃ និងគ្មានថ្ងៃណាមួយ ដែលកម្ពុជាមិនមានគ្រោះថ្នាក់តាមដងផ្លូវនោះទេ។ យោងតាមអគ្គស្នងការដ្ឋាននគរបាលជាតិ ក្នុងរយៈពេល៦ខែដើមឆ្នាំ២០២៣នេះ គ្រោះថ្នាក់តាមដងផ្លូវបានសម្លាប់មនុស្ស៧៥៦នាក់ និងមានអ្នករបួស២ពាន់៧២។ មន្ត្រីរាជរដ្ឋាភិបាលបានថ្លែងថា ក្នុងមួយឆ្នាំៗ គ្រោះថ្នាក់ដោយសារចរាចរណ៍ បានបង្ខាតថវិកាជាតិប្រមាណ ៤៥០លានដុល្លារ ជាមួយនឹងការស្លាប់ និងរបួសដល់ពេលរដ្ឋច្រើនពាន់នាក់ថែមទៀត។

ព្រះមហាក្សត្រខ្មែរ បានយាងមាតុភូមិនិវត្តន៍មកវិញហើយ ក្រោយបញ្ចប់ព្រះរាជទស្សនកិច្ច នៅខេត្តហ្វូជៀន នៃប្រទេសចិន រយៈពេល៣ថ្ងៃ។ ក្នុងព្រះរាជទស្សនកិច្ចនៅខេត្តហ្វូជៀន រយៈពេល៣ថ្ងៃចាប់ពីថ្ងៃទី១៩ ដល់ថ្ងៃទី២១ ខែធ្នូ ឆ្នាំ២០២៣, ព្រះអង្គបានយាងចូលរួមពិធីតាំងពិព័រណ៍សមិទ្ធផលគម្រប់ខួប៣០ឆ្នាំ នៃគម្រោងយុទ្ធសាស្ត្រ «៣៨២០»។ គម្រោងនេះ ត្រូវបានផ្សព្វផ្សាយដោយលោកប្រធានាធិបតីចិន ស៊ី ជីនពីង នៅពេលដែលរូបលោកធ្វើការនៅទីក្រុងហ្វូចូវ។ ព្រះករុណាបានយាងធ្វើព្រះរាជទស្សនកិច្ចនៅវត្ត «South Putuo Temple» និងបន្ទាប់មកព្រះអង្គ ស្តេចយាងទៅកាន់សាកលវិទ្យាល័យ Xiamen។ ក្នុងព្រះរាជទស្សនកិច្ចនៅសាកលវិទ្យាល័យដដែលនោះ ព្រះអង្គបានយាងសួរសុខទុក្ខនិស្សិតខ្មែរ ដែលកំពុងសិក្សារៀនសូត្រនៅទីនោះផងទៀត។ ក្នុងព្រះរាជទស្សនកិច្ច៣ថ្ងៃនេះផងទៀត ព្រះមហាក្សត្រខ្មែរ បានយាងធ្វើព្រះទស្សនកិច្ចនៅទន្លេ Yun Dang Lake ផងដែរ។ ព្រះអង្គបានយាងវិលត្រឡប់មកដល់រាជធានីភ្នំពេញវិញនារសៀលថ្ងៃទី២១ ខែធ្នូ ឆ្នាំ២០២៣។