នៅទូទាំងអាស៊ាន មានតែប្រទេសកម្ពុជាមួយប៉ុណ្ណោះ ក្នុងរយៈពេល ២៤ម៉ោងកន្លងមកនេះ ដែលមានការឆ្លងជំងឺកូវីដ១៩ ។ ការឆ្លងនៅកម្ពុជាថ្ងៃនេះ មានចំនួន ២ករណី។ តួលេខឆ្លងនៅថ្ងៃនេះ បានថយចុះច្រើនដល់ ២ពាន់ ៣៩២ករណី បើប្រៀបធៀបការឆ្លងកាលពីថ្ងៃម្សិលមិញ ក្នុងក្របខណ្ឌទូទាំងអាស៊ានទាំងមូល។ អាស៊ាននារយៈពេល ២៤ម៉ោងចុងក្រោយនេះ ពុំមានអ្នកស្លាប់ដោយសារជំងឺកូវីដ១៩ ឡើយ។ គិតសរុបរួមនៃប្រទេសទាំង១០ អាស៊ាននាពេលនេះ ការឆ្លងសរុបបានកើនដល់ចំនួន ៣៦លាន ៥៩ម៉ឺន ៧ពាន់ ៥៦៦ករណី, និងការស្លាប់សរុបមានចំនួន ៣៦ម៉ឺន ៩ពាន់ ១៣២នាក់ដដែល។ បើគិតសរុបនៅលើសាកលលោកនោះវិញ ការឆ្លងវីរុសកូវីដ១៩ សរុបមានចំនួនជាង ៦៩៩លានករណីហើយ, និងការស្លាប់មានជាង ៦លាន ៩៥ម៉ឺននាក់៕

អង្គការស៊ីម៉ាក់ បានទទួលជំនួយជិត ៥០ម៉ឺនដុល្លារ ពីអង្គការ JMAS ប្រចាំកម្ពុជា ដើម្បីបោសសម្អាតមីន និងគ្រាប់មិនទាន់ផ្ទុះ នៅក្នុងខេត្តជាប់ព្រំដែនចំនួនពីរ ក្នុងរយៈពេលមួយឆ្នាំ។ ពិធីចុះហត្ថលេខាលើកិច្ចព្រមព្រៀងនេះ បានធ្វើឡើងនៅទី២០ធ្នូឆ្នាំ២០២៣នេះ រវាងអង្គការ JMAS ប្រចាំកម្ពុជា និងមជ្ឈមណ្ឌលសកម្មភាពកម្ចាត់មីនកម្ពុជា ស៊ីម៉ាក់។ យោងតាមកិច្ចព្រមព្រៀង ជំនួយជិត ៥០ម៉ឺនដុល្លារនេះ នឹងត្រូវប្រើប្រាស់ក្នុងការបោសសំអាតមីន ក្នុងស្រុកម៉ាឡៃ ខេត្តបន្ទាយមានជ័យ និងការបោសសម្អាតតំបន់គ្រាប់បែកចង្កោម ក្នុងខេត្តស្ទឹងត្រែងរវាងពីថ្ងៃទី១៩ ខែធ្នូ ឆ្នាំ២០២៣ ដល់ថ្ងៃទី១៨ ខែធ្នូ ឆ្នាំ២០២៤»។ អគ្គនាយកស៊ីម៉ាក់ លោក ហេង រតនា បានថ្លែងគម្រោងត្រូវបោសសំអាត ក្នុងខេត្តទាំង២នោះ មានផ្ទៃដីសរុបចំនួន ៦៣០ហិកតា។ លោកបានថ្លែងបញ្ជាក់ថា គម្រោងចុងក្រោយនេះ គឺជាគម្រោងទី៣ ខណៈការបោសសំអាតឆ្នាំទី១ និងឆ្នាំទី២ គេបានរំដោះផ្ទៃដីចំនួន ១ពាន់ ១៨៥ហិកតា, រុករកឃើញ និងកម្ទេចចោលគ្រាប់មីន និងគ្រាប់មិនទាន់ផ្ទុះ បានចំនួន ១ពាន់ ៦៧១គ្រាប់ និងគម្រោងនេះ បានជួយប្រជាពលរដ្ឋទទួលផលដោយផ្ទាល់ ចំនួន…

កម្ពុជាបាននាំចេញផ្លែមៀនស្រស់ចូលទៅកាន់ទីផ្សារបរទេស ជាមួយការទទួលបានទឹកប្រាក់ ១៨លាន ៥៤ម៉ឺនដុល្លារ។ យោងតាមរបាយការណ៍របស់ក្រសួងពាណិជ្ជកម្ម ការនាំចេញផ្លែមៀន រយៈ១១ខែដើមឆ្នាំនេះ បានកើនឡើងជិត១ពាន់ភាគរយ។ ឧកញ៉ា ឈិន កេន ដែលពាក់ព័ន្ធនឹងកិច្ចវិនិយោគផ្លែមៀននេះ បាននិយាយថា ទីផ្សារធំ នៃការនាំចេញផ្លែមៀនស្រស់របស់កម្ពុជា រួមមាន ប្រទេសថៃ និងប្រទេសចិន។ លោកបញ្ជាក់ថា ការនាំចេញផ្លែមៀនស្រស់ មានបរិមាណប្រមាណ ១ម៉ឺន ៥ពាន់ ទៅ ២ម៉ឺនតោនក្នុង១ឆ្នាំ និងលោកសង្ឃឹមថាកំណើននេះនឹងបន្ដកើនឡើងនៅឆ្នាំបន្តបន្ទាប់ទៀត។ កម្ពុជាក្នុងរយៈពេល១០ខែឆ្នាំ២០២៣ បាននាំចេញផ្លែមៀនស្រស់ទៅប្រទេសចិន មានចំនួន ១ម៉ឺន ១ពាន់ ៤០៣ ក្បៀស២៣តោន។ ក្រៅពីការនាំចេញទៅកាន់ទីផ្សារប្រទេសចិន សហគ្រាសនៅកម្ពុជា នៅបានកែច្នៃផ្លែមៀន ទៅជាដំណាប់មៀន ផ្លែមៀនកំប៉ុង ទឹកមៀនកៀប និងស្រាមៀន ដាក់លក់នៅតាមផ្សារទំនើបនានានៅក្នុងប្រទេសផងដែរ៕

ប្រាក់ចំណូលពីការប្រមូលពន្ធដារក្នុងរយៈពេល១១ខែឆ្នាំ២០២៣ មានចំនួន ៣ពាន់ ៣៤៧លាន ១៨ម៉ឺនដុល្លារ ដែលស្មើនឹង ៩៣.៧១% នៃផែនការសរុបរបស់ច្បាប់ស្តីពីហិរញ្ញវត្ថុសម្រាប់ឆ្នាំ២០២៣។ ទំហំនៃប្រាក់ចំណូលនេះ ត្រូវបានប្រកាសក្នុងកិច្ចប្រជុំបូកសរុបលទ្ធផលការប្រមូលចំណូលពន្ធដារ ដោយអគ្គនាយកពន្ធដារ លោក គង់ វិបុល នាព្រឹកថ្ងៃទី២០ធ្នូ។ ដោយឡែកប្រាក់ចំណូលពន្ធសម្រាប់ខែវិច្ឆិកាតែមួយ ត្រូវបានគេប្រកាសថា មានចំនួន ២៨០លាន ១៤ម៉ឺនដុល្លារ។ យោងតាមការកំណត់ក្នុងច្បាប់ហិរញ្ញវត្ថុសម្រាប់ការគ្រប់គ្រងឆ្នាំ២០២៣, ការប្រមូលប្រាក់ចំណូលពន្ធក្នុងមួយឆ្នាំ បានកំណត់ការប្រមូលឱ្យបាន ៣ពាន់ ៥៧១លាន និង ៥៤ម៉ឺនដុល្លារ។ យោងតាមច្បាប់ដែលបានកំណត់នេះ ក្នុងរយៈពេល១ខែធ្នូនេះ, អគ្គនាយកដ្ឋានពន្ធដារ ត្រូវប្រមូលប្រាក់ពន្ធដារឱ្យបានជាង ២២៤លានដុល្លារបន្ថែមទៀត ដើម្បីបង្គ្រប់នូវផែនការ ដាក់ចេញដោយរាជរដ្ឋាភិបាលសម្រាប់ឆ្នាំ២០២៣នេះ។

សម្តេចធិបតី ហ៊ុន ម៉ាណែត បានថ្លែងថា សុខសន្តិភាព គឺជាកត្តាចំបងធំជាងគេបង្អស់ ក្នុងការជួយជំរុញប្រទេសជាតិឱ្យអភិវឌ្ឍន៍។ ប្រសាសន៍បញ្ជាក់នេះ បានធ្វើឡើងនៅថ្ងៃទី២០ធ្នូ ក្នុងឱកាសដែលសម្តេច និងលោកជំទាវបណ្ឌិត ពេជ ចន្ទមុន្នី បានអញ្ជើញចូលរួមសម្ពោធដាក់ឱ្យប្រើប្រាស់ជាផ្លូវការ នូវអគារធនាគារ Wing Tower។ សម្តេចធិបតីបានគូសបញ្ជាក់ថា បើគ្មានសន្តិភាពទេ ប្រទេសកម្ពុជាក៏មិនអាចមានភាពរីកចំរើន លើកិច្ចការវិនិយោគនានា រួមទាំងធនាគារ និងការសាងសង់សំណង់ដ៏ខ្ពស់ របស់អគារធនាគារ Wing Tower នាពេលនេះផងដែរ។ សម្តេចធិបតីបានថ្លែងកោតសរសើរលើភាពរីកចំរើន នៃវិស័យសេវាកម្មឌីជីថល ផ្នែកធនាគារ ដែលបានជួយសម្រាលដល់ពលរដ្ឋជាច្រើន លើកិច្ចការចំណាយនានា ដូចជាថ្លៃទឹក និងថ្លៃភ្លើង និងកិច្ចការផ្សេងៗនានា តាមរយៈសេវាធនាគារ ដែលមានភាពលឿន និងទាន់ចិត្តបំផុត។ សម្តេចធិបតីនៅបានមានប្រសាសន៍លើកទឹកចិត្តដល់បណ្តាធនាគារ ត្រូវជួយផ្តល់ការធានាសេវាកម្មរបស់ខ្លួន ឱ្យកាន់តែទូលំទូលាយ ដើម្បីការលើកកម្ពស់បរិយាប័ន្នហិរញ្ញវត្ថុនៅកម្ពុជា សំដៅរួមចំណែកដល់ការកាត់បន្ថយភាពក្រីក្រ។ សម្តេចធិបតីបានថ្លែងលើកទឹកចិត្តដល់ធនាគារ សហគ្រាសធុនតូច និងមធ្យមក្នុងប្រទេស ត្រូវរៀបចំកម្មវិធីផ្តល់កម្ចីដោយផ្ទាល់ ដល់ប្រតិបត្តិករទេសចរណ៍ ក្នុងខេត្តសៀមរាប ជាមួយនឹងអត្រាការប្រាក់សមរម្យ និងលក្ខខណ្ឌអនុគ្រោះផ្សេងទៀត ដើម្បីអនុញ្ញាតឱ្យប្រជាពលរដ្ឋ ដែលជាប្រតិបត្តិករទេសចរណ៍ អាចទទួលបាននូវហិរញ្ញប្បទាន ក្នុងចំនួនទឹកប្រាក់សមរម្យសមស្របតាមប្រភេទអាជីវកម្ម។…

មន្ត្រីរាជរដ្ឋាភិបាលបានហៅការធ្វើបាតុកម្មរបស់ក្រុមបំរើនយោបាយឱ្យទណ្ឌិត សម រង្ស៊ី នៅក្នុងប្រទេសជប៉ុនថា ជាអំពើបរាជ័យមួយគួរឱ្យអាម៉ាស។ រដ្ឋមន្ត្រីប្រតិភូអមនាយករដ្ឋមន្ត្រីលោក សូ ណារ៉ូ ក្នុងសន្និសីទកាសែតថ្ងៃទី១៩ធ្នូ បានថ្លែងបង្ហាញនូវចំណុចបរាជ័យមួយចំនួន នៃការធ្វើបាតុកម្មប្រឆាំងនឹងដំណើរទស្សនកិច្ច របស់សម្តេចធិបតី ហ៊ុន ម៉ាណែត ដោយមនុស្សមួយក្រុមនៅលើទឹកដីនៃប្រទេសជប៉ុន។ លោកបានលើកឡើងជុំវិញចំនួនមនុស្សចូលរួមមានតិចតួច ខណៈការផ្សាយវិទ្យុអាស៊ីសេរី បានផ្សាយបំប៉ោងនូវតួលេខចំនួនមនុស្សចូលរួម និងចំណែកគោលដៅធ្វើបាតុកម្មនោះទៀត ក៏មិនបានត្រឹមត្រូវ និងគួរឱ្យអស់សំណើចថែមទៀត។ លោក សូ ណារ៉ូ បានថ្លែងចំអកឱ្យក្រុមធ្វើនយោបាយប្រឆាំងទាំងនោះទៀតថា គោលដៅធ្វើបាតុកម្ម ដែលមិនចង់ឱ្យជប៉ុនទទួលស្គាល់ សម្តេចធិបតី ហ៊ុន ម៉ាណែត ជានាយករដ្ឋមន្ត្រីនោះ គឺជាភាពកាន់តែហួសហេតុថែមទៀត។ ភាពហួសហេតុផ្សេងទៀត ពាក់ព័ន្ធនឹងអំពើឃុបឃិតខុសក្រមសីលធម៌អ្នកកាសែតទៀតនោះ វិទ្យុអាស៊ីសេរីបានផ្សាយនូវព័ត៌មានកុហក ដែលនិយាយថា ពលរដ្ឋខ្មែរដែលបានធ្វើដំណើរស្កាត់ពីគ្រប់ទិសទី ដើម្បីមកគាំទ្រដំណើរទស្សនកិច្ចរបស់សម្តេចធិបតី ហ៊ុន ម៉ាណែត ក្នុងក្រុងតូក្យូ គឺដោយសារតែការទិញទឹកចិត្ត ដោយចោទថា ម្នាក់ៗបានទទួលលុយយ៉ាងហោច ពី ៣ម៉ឺន ដល់ ៤ម៉ឺនយ៉េន។ ពលរដ្ឋដែលបានធ្វើដំណើរមកចូលរួមគាំទ្រដំណើរទស្សនកិច្ចសម្តេចធិបតី បាននិយាយថា ពួកគេមិនមានអ្នកណាបានទិញទឹកចិត្តទេ និងថាដំណើររបស់ពួកគេ ស្កាត់មកជួបនាយករដ្ឋមន្ត្រីកម្ពុជា គឺដោយសារតែការនឹករលឹក និងគាំទ្រសម្តេចធិបតី…

ជប៉ុនបានផ្តល់ហិរញ្ញប្បទានឥតសំណងដល់កម្ពុជាចំនួន ៣១លាន ៣សែនដុល្លារ ក្នុងដំណើរបំពេញទស្សនកិច្ចជាផ្លូវការ របស់សម្តេចធិបតី ហ៊ុន ម៉ាណែត រយៈពេល៤ថ្ងៃ តបតាមការអញ្ជើញរបស់លោកនាយករដ្ឋមន្ត្រី គីស៊្ហីដា ហ្វឺមីអូ។ ហិរញ្ញប្បទានឥតសំណងដល់កម្ពុជានោះ ត្រូវបានចុះហត្ថលេខាលើឯកសារមួយចំនួន ដែលនាយករដ្ឋមន្ត្រីកម្ពុជា និងជប៉ុនបានធ្វើជាសាក្សី។ អប្សរាណិតរាយការណ៍

រដ្ឋបាលជលផល នៃក្រសួងកសិកម្ម បានប្រកាសរដូវត្រីចុះដំបូង និងអំពាវនាវពលរដ្ឋត្រូវរូតរះនាំគ្នាធ្វើប្រហុក ផ្អក និងត្រីឆ្អើរ។ យោងតាមសេចក្តីប្រកាស, ត្រូវនឹងចាប់ផ្តើមចុះចាប់ពីថ្ងៃទី១៩ធ្នូ រហូតដល់២៥ធ្នូ ប្រសិនបើមេឃស្រឡះល្អ គ្មានភ្លៀងកក់ខែ ឬទទួលរងឥទ្ធិពលព្យុះ។ រដ្ឋបាលជលផលនៅបានអំពាវនាវ ដល់អាជ្ញាធរមូលដ្ឋាន ឬសមត្ថកិច្ចពាក់ព័ន្ធ មេត្តាជួយបង្កលក្ខណៈងាយស្រួលជូនដល់ប្រជាពលរដ្ឋ ក្នុងការធ្វើដំណើរ ស្នាក់នៅ និងដឹកជញ្ជូន ផលិតផលត្រីបានដោយរលូន តាមការគួរ៕

មជ្ឈមណ្ឌលសំចត និងស្តារនីតិសម្បទា តម្លៃជាង ២លានដុល្លារត្រូវសម្ពោធដាក់ឱ្យប្រើប្រាស់ ជាផ្លូវការខេត្តបន្ទាយមានជ័យ។ ពិធីសម្ពោធមជ្ឈមណ្ឌលសំចត និងស្តារនីតិសម្បទាប៉ោយប៉ែត ស្ថិតនៅសង្កាត់អូរឫស្សី ក្រុងប៉ោយប៉ែត បានធ្វើនៅថ្ងៃទី១៨ធ្នូនេះ ក្រោមអធិបតីភាពរដ្ឋមន្ត្រីក្រសួងមហាផ្ទៃ លោក ស សុខា។ មជ្ឈមណ្ឌលសំចត និងស្តារនីតិសម្បទាសម្រាប់ជនរងគ្រោះនេះ គឺជាជំនួយឥតសំណងរបស់រាជរដ្ឋាភិបាលថៃ ដែលបានសាងសង់អស់រយៈពេល ១ឆ្នាំ ដោយចាប់ផ្ដើមនៅថ្ងៃទី១៥ ខែសីហា ឆ្នាំ២០២២ ហើយបញ្ចប់នៅថ្ងៃទី១៧ ខែសីហា ឆ្នាំ២០២៣។ រដ្ឋមន្ត្រីក្រសួងសង្គមកិច្ច លោក ជា សុមេធី បានថ្លែងថា ការបង្កើតមជ្ឈមណ្ឌលសំចត និងស្តារនីតិសម្បទាជនរងគ្រោះប៉ោយប៉ែតនេះ គឺជាការបង្ហាញពីការយកចិត្តទុកដាក់របស់រាជរដ្ឋាភិបាលកម្ពុជា ក្នុងការអនុវត្តគោលនយោបាយផែនការយុទ្ធសាស្ត្រ និងកម្មវិធីសំដៅផ្តល់កិច្ចគាំពារ និងគាំទ្រនូវសេចក្តីត្រូវការចាំបាច់របស់ជនរងគ្រោះ ដោយអំពើជួញដូរមនុស្ស តាមរយៈការផ្ដល់សេវាសមស្រប, ទប់ស្កាត់រាល់អំពើជួញដូរមនុស្ស ក្នុងប្រទេស និងឆ្លងកាត់ព្រំដែន, ជាពិសេសការជួយជនរងគ្រោះ តាមរយៈការស្តារនីតិសម្បទា សមាហរណកម្ម និងការពារសិទ្ធិជនរងគ្រោះ ស្របតាមស្ថានភាពវិវឌ្ឍន៍ជាក់ស្តែង របស់កម្ពុជា និងតម្រូវការចំពោះមុខ។

សមាសភាពថ្មីរបស់គណៈកម្មាធិការជាតិរៀបចំការបោះឆ្នោត បានបញ្ជាក់ការប្តេជ្ញាចិត្ត ការកសាងលទ្ធិប្រជាធិបតេយ្យ តាមរយៈការបោះឆ្នោត នៅព្រះរាជាណាចក្រកម្ពុជា។ សមាសភាពថ្មីរបស់គណៈកម្មាធិការជាតិរៀបចំការបោះឆ្នោតដែលមានប្រធាន អនុប្រធាន និងសមាជិកចំនួន ៩នាក់ បានបញ្ជាក់ការប្តេជ្ញាចិត្តនេះ កាលពីសប្តាហ៍មុន បន្ទាប់ត្រូវបានតែងតាំងតាមព្រះរាជក្រឹត្យរបស់ព្រះមហាក្សត្រ។ ការប្តេជ្ញាចិត្តនេះ បានធ្វើឡើងនៅមុនការត្រៀមរៀបចំចាត់ចែងការបោះឆ្នោតអសកល ចំនួនពីរនៅក្នុងឆ្នាំ២០២៤ គឺការបោះឆ្នោតជ្រើសតាំងសមាជិកព្រឹទ្ធសភានីតិកាលទី៥ និងការបោះឆ្នោតជ្រើសរើសក្រុមប្រឹក្សារាជធានី ក្រុមប្រឹក្សាខេត្ត ក្រុមប្រឹក្សាក្រុង ក្រុមប្រឹក្សាស្រុក ក្រុមប្រឹក្សាខណ្ឌ អាណត្តិទី៤។ សមាសភាពថ្មីរបស់គជបទាំង ៩ បានប្តេជ្ញាថា គេ «នឹងបន្តសកម្មភាពរបស់ខ្លួនឱ្យបានល្អ, រៀបចំការបោះឆ្នោតទៅតាមអាណ្ណត្តិឱ្យប្រព្រឹត្តទៅដោយសេរី ត្រឹមត្រូវ និងយុត្តិធម៌ និងទទួលយកបានពីម្ចាស់ឆ្នោត និងភាគីពាក់ព័ន្ធ ស្របតាមរដ្ឋធម្មនុញ្ញ នៃព្រះរាជាណាចក្រកម្ពុជា…ដែលជាការប្តេជ្ញាចិត្ត និងជំហរឥតងាករេ ដើម្បីរួមចំណែកកសាងលទ្ធិប្រជាធិបតេយ្យ តាមរយៈការបោះឆ្នោត នៅព្រះរាជាណាចក្រកម្ពុជា»។