ប៉េកាំង៖ ទីភ្នាក់ងារព័ត៌មានចិនស៊ិនហួបានដកស្រង់ទិន្នន័យ ដែលចេញផ្សាយដោយសមាគមមាសចិន (CGA) ថា ប្រទេសចិនចម្រាញ់មាសបានចំនួន ៨៥,៩៥៩តោន ក្នុងត្រីមាសទីមួយ ឆ្នាំ២០២៤ កើនឡើងចំនួន ១,១៦ភាគរយ បើធៀបនឹងរយៈពេលដូចគ្នាកាលពីឆ្នាំមុន។ ទិន្នន័យរបស់សមាគមមាសចិន CGA បានឱ្យដឹងថា ក្នុងរយៈពេល៣ខែដំបូងឆ្នាំនេះ ការប្រើប្រាស់មាសនៅក្នុងប្រទេសចិនមានចំនួន ៣០៨,៩០៥តោន កើនឡើង ៥,៩៤ភាគរយ បើធៀបនឹងរយៈពេលដូចគ្នាកាលពីឆ្នាំមុន។ ការប្រើប្រាស់មាសសម្រាប់ឧស្សាហកម្ម និងការប្រើប្រាស់ផ្សេងទៀត មានចំនួនជាង ១៨តោន កើនឡើងចំនួន ៣,០៩ភាគរយ នៅត្រីមាសទី១ ឆ្នាំ២០២៤ បើធៀបនឹងរយៈពេលដូចគ្នាកាលពីឆ្នាំមុន។ ទន្ទឹមគ្នា ការប្រើប្រាស់គ្រឿងអលង្ការមាសនៅក្នុងទីផ្សារប្រទេសចិន បានធ្លាក់ចុះចំនួន ៣ភាគរយ បើធៀបនឹងរយៈពេលដូចគ្នាកាលពីឆ្នាំមុន មកនៅត្រឹមចំនួន ១៨៣,៩២២តោន។ រីឯមាសដុំ និងកាក់មាសបានកើនឡើងចំនួន ២៦,៧៧ភាគរយ បើធៀបនឹងរយៈពេលដូចគ្នាកាលពីឆ្នាំមុន ដល់ ១០៦,៣២៣តោន៕ ប្រភព៖ ស៉ីនហួរ ប្រែសម្រួលដោយ៖ ឈឹម ទីណា

ប៉េកាំង៖ រដ្ឋាភិបាលទីក្រុងប៉ារីស បានប្រកាសក្នុងថ្ងៃចន្ទនេះថា ប្រធានាធិបតីចិន លោក ស៊ី ជីនពីង នឹងធ្វើទស្សនកិច្ចផ្លូវរដ្ឋនៅប្រទេសបារាំង រយៈពេលពីរថ្ងៃ ពោលគឺនៅថ្ងៃទី៦ និងទី៧ ខែឧសភា ខណៈសង្រ្គាមអ៊ុយក្រែន និងមជ្ឈិមបូព៌ា ត្រូវបានរំពឹងថា ជារបៀបវារៈកំពូលរវាងមេដឹកនាំទាំងពីរ។ ការបំពេញទស្សនកិច្ចនៅបារាំង ជាដំណើរទស្សនកិច្ចនៅអឺរ៉ុបលើកដំបូងរបស់មេដឹកនាំចិន លោក ស៊ី ជីនពីង ចាប់តាំងពីផ្ទុះជំងឺរាតត្បាតកូវីដ១៩។ ការិយាល័យប្រធានាធិបតីបារាំងបានបញ្ជាក់នៅក្នុងសេចក្តីថ្លែងការណ៍មួយថា ដំណើរទស្សនកិច្ចផ្លូវរដ្ឋរបស់លោក ស៊ី គ្រោងធ្វើឡើងក្នុងឱកាសខួបលើកទី៦០ នៃទំនាក់ទំនងការទូតរវាងប្រទេសទាំងពីរ។ ការិយាល័យ Elysee របស់ប្រធានាធិបតីបារាំងបន្ថែមថា កិច្ចពិភាក្សារវាងមេដឹកនាំបារាំង និងចិននឹងផ្តោតលើវិបត្តិអន្តរជាតិសំខាន់ៗមួយចំនួន មានដូចជាសង្រ្គាមរុស្ស៊ី-អ៊ុយក្រែន, ជម្លោះនៅមជ្ឈិមបូព៌ា, បញ្ហាពាណិជ្ជកម្ម, កិច្ចសហប្រតិបត្តិការវិទ្យាសាស្រ្ត, វប្បធម៌ និងកីឡា។ បើតាមសេចក្តីថ្លែងការណ៍ លោក ស៊ី និងលោក ម៉ាក្រុង ក៏នឹងពិភាក្សាអំពីការធ្វើសកម្មភាពរួមគ្នា ដើម្បីដោះស្រាយបញ្ហាប្រឈមជាសកល ជាពិសេសភាពអាសន្នផ្នែកអាកាសធាតុ, ការការពារជីវចម្រុះ និងស្ថានភាពហិរញ្ញវត្ថុនៃប្រទេសដែលងាយរងគ្រោះបំផុត។ ក្រៅពីបារាំង លោក ស៊ី ក៏គ្រោងនឹងបំពេញទស្សនកិច្ចនៅប្រទេសហុងគ្រីផងដែរ ចាប់ពីថ្ងៃទី៨ ដល់ទី១០ ខែឧសភាខាងមុខ…

បាងកក៖ ប្រទេសប្រ៊ុយណេ និងថៃ កាលពីថ្ងៃចន្ទ បានចុះហត្ថលេខាលើអនុស្សរណៈនៃការយោគយល់គ្នាចំនួនពីរ ស្តីពីកិច្ចសហប្រតិបត្តិការពាណិជ្ជកម្ម និងទេសចរណ៍ នេះបើតាមកាសែត បាងកកប៉ុស្តិ៍។ កិច្ចព្រមព្រៀងទាំងពីរនេះត្រូវបានចុះហត្ថលេខា ក្រោមវត្តមាននាយករដ្ឋមន្ត្រីថៃ និង ព្រះមហាក្សត្រប្រ៊ុយណេ ក្រោយពេលជួបពិភាក្សា ទ្វេភាគី។ ព្រះចៅ ស៊ុលតង់ ហាជី ហាសិនណល់ ប៊ូលហ្កះ ព្រះមហាក្សត្រ នៃប្រទេសប្រ៊ុយណេ ដារូសាឡឹម អមដំណើរដោយព្រះរាជបុត្រា ម៉ាទីន បានយាងទៅបំពេញទស្សនកិច្ច នៅប្រទេសថៃ រយៈពេល២ថ្ងៃ។ បើតាមកាសែត បាងកកប៉ុស្តិ៍ ភាគីទាំងពីរបានឯកភាពបន្តធ្វើការយ៉ាងជិតស្និទ្ធ ដើម្បីជំរុញកិច្ចសហប្រតិបត្តិការសេដ្ឋកិច្ច ដោយបង្កើតយន្តការកម្រិតគោលនយោបាយ កំណត់ផែនការសកម្មភាពជាក់ស្តែង សម្រាប់ការលើកកម្ពស់កិច្ចសហប្រតិបត្តិការសេដ្ឋកិច្ចទ្វេភាគី។ ភាគីទាំងពីរបានឯកភាពពង្រឹងកិច្ចសហប្រតិបត្តិការទេសចរណ៍ រួមទាំង តាមរយៈគម្រោង «ប្រទេសទាំងប្រាំមួយ គោលដៅតែមួយ» ដែលស្នើឡើងដោយថៃ ដើម្បីលើកកម្ពស់កិច្ចសហប្រតិបត្តិការទេសចរណ៍ ក្នុងតំបន់ ព្រមទាំង បានឯកភាពសហការលើសុខុមាលភាពទេសចរណ៍ធម្មជាតិ ព្រមទាំង ទេសចរណ៍មូស្លីម។ លើសពីនេះ ភាគីទាំងពីរក៏នឹងជំរុញការហោះហើរត្រង់ រវាងថៃ និង ប្រ៊ុយណេ ទៀតផង។ យោងតាមប្រភពបានឲ្យដឹងទៀតថា ភាគីទាំងពីរក៏បានផ្លាស់ប្តូរទស្សនៈ…

លីម៉ា៖ មនុស្ស យ៉ាងហោចណាស់ ២៥នាក់បានស្លាប់ និងរាប់សិបនាក់ទៀត រងរងរបួស បន្ទាប់ពីរថយន្តក្រុងមួយគ្រឿង បានធ្លាក់ចូលទៅក្នុងជ្រោះ ជម្រៅប្រហែល ២០០ម៉ែត្រ នាភាគខាងជើង ប្រទេសប៉េរូ។ អាជ្ញាធរក្នុងតំបន់បាននិយាយ កាលពីថ្ងៃចន្ទ ថា រថយន្តក្រុងបានដឹកអ្នកដំណើរ ជាង៥០នាក់ មុនពេលជួបឧប្បត្តិហេតុ។ អ្នករងរបួស ដែលរួចផុតពីការស្លាប់ ត្រូវបានអាជ្ញាធរជួយសង្គ្រោះ និងបញ្ជូនទៅព្យាបាល នៅមន្ទីរពេទ្យ ភ្លាមៗ។ អាជ្ញាធរកំពុងស៊ើបអង្កេត រកមូលហេតុ នៅពីក្រោយឧប្បត្តិហេតុ លើកនេះ។ យ៉ាងណាមិញ គ្រោះថ្នាក់កើតឡើង ជាញឹកញាប់លើដងផ្លូវ នៅក្នុងប្រទេសប៉េរូ ដោយសារតែការបើកបរហួសល្បឿនកំណត់, ស្ថានភាពផ្លូវមិនល្អ, ខ្វះផ្លាកសញ្ញា និងការអនុវត្តច្បាប់ចរាចរណ៍ មិនបានល្អ។ កាលពីឆ្នាំ២០២៣ ឃាតករតាមដងផ្លូវបានសម្លាប់មនុស្សជាង ៣១០០នាក់ ក្នុងប្រទេស ស្ថិតនៅតំបន់អាមេរិកខាងត្បូង មួយនេះ៕ ប្រភពពី AFP ប្រែសម្រួល៖ សារ៉ាត