អគ្គនាយកដ្ឋានពន្ធដារ បានជូនដំណឹងថាគេបានប្រមូលចំណូលសម្រាប់ថវិកាជាតិបានចំនួនជិត២ពាន់លាន ដុល្លារ ក្នុងរយៈពេល៨ខែឆ្នាំ នេះ។ យោងតាមសេចក្តីប្រកាសព័ត៌មាន ចំណូលពន្ធសម្រាប់ថវិកាជាតិដែល ប្រមូលបាន១ពាន់៩០៩លានដុល្លារអាមេរិក គឺថយចុះ៨ភាគរយបើប្រៀបធៀបនឹងរយៈពេលដូចគ្នាកាលពីឆ្នាំ ២០២០។

ខេត្តប៉ៃលិនបានប្រកាសបើកដំណើរការសាលារៀនឡើងវិញនៅថ្ងៃទី១៥កញ្ញាស្អែកនេះហើយ។ អភិបាល ខេត្តប៉ៃលិន លោកជំទាវ បាន ស្រីមុំ បានថ្លែងអំពាវនាវលោកគ្រូ អ្នកគ្រូត្រូវយកចិត្តទុកដាក់ និងមើលការខុសត្រូវ លើសិស្សានុសិស្សទាំងអស់តាមសាលារៀងៗខ្លួន ដោយធ្វើយ៉ាងណាកុំឱ្យសាលារៀនដែលបើកបង្រៀនហើយ ត្រូវបិទវិញម្តងទៀត ដោយសារការឆ្លងជំងឺកូវីដ១៩។

ខេត្តកំពង់ចាម បានប្រកាសបើកដំណើរការសាលារៀនឡើងវិញ ចាប់ពីថ្ងៃទី២០ កញ្ញា ឆ្នាំ២០២១ នេះតទៅ ។ ការប្រកាសនេះ បានធ្វើឡើងនៅក្នុង សេចក្តីជូនដំណឹងមួយរបស់រដ្ឋបាលខេត្ត នៅថ្ងៃទី១៤ កញ្ញា ២០២១នេះ ដែលបានអនុញ្ញាតបើកឲ្យគ្រឹះស្ថានសិក្សាសាធារណៈ និងឯកជន សម្រាប់កម្រិតអនុវិទ្យាល័យ វិទ្យាល័យ និង ពុទ្ធិកសិក្សា នៅក្នុងភូមិសាស្រ្តខេត្តកំពង់ចាម ។ 

អនុប្រធានធនាគាពិភពលោកប្រចាំតំបន់អាស៊ីខាងកើតនិងប៉ាស៊ីហ្វិចលោកស្រី វីកតូរៀ ខ្វាខ្វា បានសន្យាគាំទ្រ សំណើរបស់កម្ពុជាដែលសុំឲ្យធនាគារពិភពលោកពិចារណាឡើងវិញលើលក្ខខណ្ឌឥណទានដែលមានកម្រិត សម្បទានខ្ពស់ និងស្នើការពន្យាពេលអនុវត្តលក្ខខណ្ឌឥណទានថ្មី ។

សហអាមេរិក បានឲ្យដឹងនូវការគ្រោងផ្តល់នូវសម្ភារៈការពារខ្លួន PPE ចំនួន១០ម៉ឺនកំប្លេដល់បុគ្គលិកសុខា ភិបាលការពារជួរមុខរបស់កម្ពុជាចំនួន២ពាន់នាក់។ ការគ្រោងផ្តល់សម្ភារៈ PPE ១០ម៉ឺនកំប្លេនោះបានលើក ឡើងក្នុងសន្និសីទសារព័ត៌មាននៅព្រឹកថ្ងៃទី១៤ ខែកញ្ញាជាមួយក្រសួងសុខាភិបាលកម្ពុជា, អង្គការ UNICEF និង អង្គការWHO តាមប្រព័ន្ធអនឡាញ ក្នុងការប្រយុទ្ធប្រឆាំងជំងឺកូវីដ១៩។

កម្ពុជាបានអនុញ្ញាតឲ្យក្រុមហ៊ុន ឈ្មោះ រ៉ឺនេសង់ មីនើរ៉ល (ខេមបូឌា) លីមីតធីត Renaissance Minerals (Cambodia) Limited ចាប់ផ្ដើមរុករករ៉ែមាសមួយកន្លែងទៀត នៅក្នុងខេត្តត្បូងឃ្មុំ។ ក្រុមហ៊ុន រ៉ឺនេសង់ មីនើរ៉ល (ខេមបូឌា) លីមីតធីត គឺជាក្រុមហ៊ុនដែលបានទទួលជោគជ័យរួចមកហើយក្នុងការកំពុងធ្វើអាជីវកម្មរ៉ែ មាសក្នុង ខេត្តមណ្ឌលគិរី។

កិច្ចប្រជុំត្រួតពិនិត្យបញ្ហាគ្រឿងញៀនដោយប្រទេសអាស៊ានទាំង១០ តាមរយ:ប្រព័ន្ធវីដេអូ បានប្រព្រឹត្តទៅនៅ ថ្ងៃនេះ។ បញ្ហាគ្រឿងញៀន នៅតែជាចំណោទក្នុងបណ្តាប្រទេសអាស៊ានដោយក្រុមឈ្មួញទុច្ចរិត បានបន្តការ ធ្វើសកម្មភាពជួញដូររបស់ខ្លួនបើទោះបីជាប្រទេសក្នុងតំបន់កំពុងរងនឹងវិបត្តិឆ្លងកូវីដ១៩។

មន្ត្រីជាន់ខ្ពស់អាកាសចរស៊ីវិលបានថ្លែងថាដំណើរការនៃការសាងសង់ព្រលានយន្ដហោះអន្ដរជាតិភ្នំពេញថ្មី នឹង បញ្ចប់តាមការគ្រោងទុក បើទោះបីជាមានការជួបឧបសគ្គដោយសារអាកាសធាតុនោះក្តី។ អ្នកនាំពាក្យអា កាសចរស៊ីវិល លោកស៊ិន ចាន់សិរីវុត្ថា បានថ្លែងថាគម្រោងសាងសង់ព្រលានយន្តហោះហោះអន្តរជាតិភ្នំពេញ ថ្មីតម្លៃជាង១ពាន់៥០០លានដុល្លារក្នុងដំណាក់កាលទី១ នឹងត្រូវរួចរាល់ក្នុងឆ្នាំ២០២៣។

ការប្រកួតប្រដាល់គុនខ្មែរជើងឯកអាស៊ីអាគ្នេយ៍នាខែក្រោយ នឹងត្រូវផ្អាកជាបណ្តោះអាសន្នសិន ដោយសារការ ឆ្លងជំងឺកូវីដ១៩នៅមិនទាន់ធូរស្រាលក្នុងរាជធានីភ្នំពេញ។